قازىر ەلىمىزدە ون ءبىر ۇلتتىق مەرەكە جانە جيىرمادان استام كاسىبي مەرەكە مەن اتاۋلى كۇندەر بار. قۇدايعا شۇكىر, توي مەن قۋانىشتان كەندە ەمەسپىز. قۇرساققا بىتكەن كۇنىمىزدەن باستاپ, قارتايعانشا تويلاپ, دۋمانداتۋعا سەبەپتەرىمىز دە از ەمەس. ءداستۇرلىسى بار, سىرتتان كەلىپ جاتقان مەرەكە, سالتتار بار – جالپى تويشىل حالىق ەكەنىمىز راس.
بىراق 1 ناۋرىز – العىس ايتۋ كۇنى بىزگە وسى ءبىر «دۋمانشىل» مىنەزدى قويا تۇرىپ, ۇستامدىراق بولعان جاراساتىن سەكىلدى. ونىڭ ءمانىسىن ءتۇسىنۋ ءۇشىن, مەرەكەنىڭ تاريحىنا ءۇڭىلۋ جەتكىلىكتى.
2015 جىلدىڭ ءساۋىر ايىندا قازاقستان حالقى اسسامبلەياسىنىڭ ءححىى سەسسياسىندا نۇرسۇلتان نازارباەۆ سوناۋ ستالين تۇسىندا الەمنىڭ ءار تۇكپىرىنەن ءتۇرلى ۇلت, ۇلىس وكىلدەرى ءوز ىرقىنسىز جەر اۋدارىلىپ, ەلىمىزگە كوشىپ كەلگەنىن ەسكە الدى. «ولاردى ماجبۇرلەپ ۆاگوندارعا وتىرعىزىپ الىپ كەلىپ, اۋىلدارعا تاستاپ كەتە بەردى. ولاردىڭ ەش دۇنيەسى بولعان جوق. سول ۋاقىتتا بۇل دالادا وزدەرى مۇقتاج بولا وتىرسا دا, قازاق حالقى كەلىمسەكتەردى وزدەرىنىڭ سامان ۇيلەرىنە كىرگىزدى. ءبىر شاتىردى ءبولىسىپ بىرگە تۇردى. ءبىر ءۇزىم نانىنا دەيىن ءبولىپ جەدى» دەدى…
سونىمەن, قازاقستان حالقى اسسامبلەياسى قۇرىلعان 1 ناۋرىز ەلىمىزدە «العىس ايتۋ كۇنى» بولىپ بەلگىلەندى. بۇل مەرەكەنىڭ اقش پەن كاناداداعى 1621 جىلى اعىلشىن كولونيستەرى باستاعان العىس ايتۋ (Thanksgiving Day) كۇنىمەن ماندەس ەكەنى انىق ەدى.
«بۇل كۇنى ەلدەگى بارلىق ەتنوستار ءبىر-بىرىنە مەيىرباندىق تانىتىپ, كەزىندە سىرتتان كەلگەن ادامداردى ءوز تۋعانىنداي قابىلداعان قازاقتارعا العىس ايتۋ كۇنى رەتىندە اتاپ ءوتۋ ادىلەتتى بولار ەدى» دەگەندە دە ەلباسى وسى مەرەكە قۇراۋ-قۇراۋ ەتنوستاردى قازاق مەملەكەتتىلىگىنىڭ ورتاق مۇددەسىنە بىرىكتىرىپ, حالىقتى بۇرىنعىدان دا جاقىنداستىرا تۇسەتىنىنە سەنگەن.
2016 جىلدان بەرى ەلىمىزدە وسى مەرەكە اتاپ ءوتىلىپ كەلە جاتىر.
بىراق, بۇل تويدا «توردە وتىرۋعا» ءتيىس قازاق كورىنگەن قاراعا ەلپەكتەپ, مەرەكەنى اتاپ وتۋدە وزگەلەردىڭ الدىنا ءتۇسىپ الىپ, سوڭىندا بوساعادا وتىرا بەرۋگە بەيىل بولىپ تۇر.
جۇرت العىس ايتۋ كۇنىمەن ءبىر-ءبىرىن قۇتتىقتاپ, مەرەكەنىڭ ءمانىن قاشىرىپ جاتىر. ەلدىڭ قۋانعانىنا قاراپ قۋانساق تا, «تويشىل» مىنەزىمىز تۋرالى ويلاپ, ءسال «مۇڭايدىق».
ءار نارسەگە سانا ولشەمىمەن قاراساق قوي!
ۇستامدىراق بولايىقشى!
