جاقىندا استانا تورىندە تولقىنكول ورتا مەكتەبىنىڭ ءار جىلدارى تۇلەپ ۇشقان تۇلەكتەرى وسى ءبىلىم شاڭىراعىنىڭ ارداگەر ۇستازدارىن شاقىرىپ, كەزدەسۋ كەشىن وتكىزدى.
تىڭ باستاما, عيباراتتى ءۇردىستى كوپكە ۇلگى ەتە بىلگەن شاكىرتتەر كەزىندە بويلارىنا ءبىلىم ءنارى مەن ءتالىمدى تاربيە ءسىڭىرىپ, التىن ۇياسىنان قيماي-قيماي ۇشىرعان جۇرەكتەرىنە جاقىن جانداردى ىستىق ىقىلاستارىنا بولەدى.
وسىندايدا ويعا «ۇستازى جاقسىنىڭ ۇستانىمى جاقسى» دەگەن ءسوز ورالادى. ۇزاق جىل مەكتەپ ديرەكتورى بولعان تولەۋباي اقسەيىتۇلى مەن زايىبى ارداگەر ۇستاز رىستى اپايعا, اينالاسىنا شۋاق شاشىپ جۇرەتىن بىلىكتى جان الدەمبەك جۇسىپبەكوۆ پەن ءون بويىنان مادەنيەت پەن يناباتتىڭ لەبى ەسىپ تۇراتىن ورال ماناپقىزىنا, فيزيكا ءپانىنىڭ بىلگىر مامانى باقىت امانجولوۆا مەن كۇنسۇلۋ, ايتكۇل, ءاليا, رىسالدى اپايعا, تاعى باسقا دا ۇستازدارىنا تولقىنكولدىك تۇلەكتەر ارنايى داستارقان جايىپ, كەزدەسۋ كەشىنىڭ قۇرمەتتى قوناعى رەتىندە سىي-قۇرمەت كورسەتتى.
بالانىڭ بويىنداعى شىنايى ءبىلىم, بىلىكتىلىك داعدىلارى, مىنەز-قۇلقى, شاراپاتتىلىعى جاقسى ۇستازدان قالعان ادەت بولسا كەرەك. «ۇستازدىق ەتكەن جالىقپاس, ۇيرەتۋدەن بالاعا» دەگەن حاكىم ابايدىڭ ءسوزىن ءوزىنىڭ ءومىر قاعيداسى ەتكەن مۇعالىم قاۋىمى دا ەرەكشە تولقىپ ءسوز الدى.
«راس, پەداگوگ بويىنداعى بارلىق مەيىرىمىن, ءبىلىمىن, تاجىريبەسىن الدىنداعى شاكىرتتەرىنە بەرىپ, ولاردىڭ رۋحاني دۇنيەسىن بايىتادى, ومىردە نەعۇرلىم اداسپاي, دۇرىس جولمەن جۇرسە دەپ ولاردىڭ قامىن ءجيدى».
العاشقى بولىپ ءسوز العان مەكتەپتىڭ بۇرىنعى باسشىسى تولەۋباي اعا ەڭسەسىن تىك ۇستاپ, «ەڭبەك – ەردىڭ ساناتى, ءبىلىم – ەردىڭ قاناتى» دەگەندەي, ۇستازدىق ماماندىعىنداعى ەڭبەك جولىندا وسىنداي قۇرمەتتى كۇنگە جەتكىزگەن ەڭبەگى ەكەنىن تاعىلىمدى قىلىپ ايتىپ بەردى. تولقىنكول مەكتەبىندە قىزمەت جاساپ جۇرگەن كەزىندەگى ءاربىر ۇجىمداعى مۇعالىمدەرىنىڭ ەڭبەگىن, بارلىق وقۋشىلاردىڭ جاقسى قابىلەتتەرىن ەسكە ءتۇسىردى. «ول كەزەڭدە مەكتەپ اۋلاسىندا كارتوپ, اعاش-تال ەگىلىپ وتىرعىزىلاتىن. سونىڭ ءار تۇبىنە شەلەكپەن سۋ تاسىپ قۇيىپ ەڭبەكتەنگەن وزدەرىڭسىڭدەر» دەپ تۇلەكتەردىڭ دە مەكتەپ قابىرعاسىنداعى ءبىلىم الۋ مەن قاتار ەتكەن ەڭبەكتەرىن دە اتاپ ءوتتى.
«بەلگىسى بولسا, جولدان جاڭىلماس, ءبىلىمى بولسا سوزدەن جاڭىلماس» دەگەندەي, تولەۋباي اقسەيىتۇلى اقساقال جاسىنا كەلسە دە وتكەندى ونەگە قىلا وتىرىپ, قازىرگى تۇلەكتەرىن ماقتان تۇتاتىنىن, ءبىلىمنىڭ باسى – بەينەت, سوڭى زەينەت ەكەنىن, ەرىنبەي ەڭبەك ەتكەن ءتۇبى مۇراتىنا جەتەتىنىن جاستارعا ادەمىلەپ جەتكىزدى.
ال بايىرعى پەداگوگ الدەمبەك جۇسىپبەكوۆ كەشە كوز الدىندا قۇلىن-تايداي اسىر سالىپ, بۇگىن ۇلكەن ازامات بولىپ, ەلدىڭ ءبىر-ءبىر تۇتقاسىنا اينالعان شاكىرتتەرىن كورىپ, تولقىپ تۇرعانىن ايتتى. «ۇستاز بولۋ – ۇلاعاتتىڭ بەلگىسى» دەپ جاتادى. مەن وسى قيىن دا قىزىق ماماندىقتى تاڭداپ, ۇزاق جىل توككەن تەرىمنىڭ زايا كەتپەگەنىنە قۋانىپ وتىرمىن» دەدى.
بۇدان كەيىن ارداگەر ۇستازدار كۇلاش بايمۇقانوۆا, ورال ماناپقىزى, تاعى باسقالار وسى كەزدەسۋدىڭ تالىمدىك, تاربيەلىك مانىنە توقتالىپ, ونى ۇيىمداستىرۋعا اتسالىسقان تۇرسىن ەسىلبەۆاعا, زاۋرەش قادىرباەۆاعا, بەيبىت قايىرجانوۆقا, ساكەن كارىباەۆقا, مارات اشۋۇلىنا, جاندوس الدەمبەكۇلىنا, باسقا دا كوپتەگەن ازاماتتارعا شەكسىز العىستارىن ءبىلدىردى.
جۇماش قايدارقىزى,
استراحان اۋدانى جارسۋات مەكتەبىنىڭ
قازاق ءتىلى مەن ادەبيەتى ءپانىنىڭ مۇعالىمى
