باس قالا مەكتەپتەرىندەگى «Elorda Aqparat» سەرىكتەستىگى قىزمەتكەرلەرىنىڭ «مەكتەپ جانە مەدياساۋاتتىلىق» تاقىرىبىنداعى كەزەكتى كەزدەسۋى №38 مەكتەپ-ليتسەيىندە ءوتتى. سەرىكتەستىكتىڭ جوباسى اياسىندا وتكەن باسقوسۋدا وقۋشىلار «استانا اقشامى» گازەتىنىڭ جۋرناليستەرىنە وزدەرىن تولعاندىرعان ساۋالدارىن قويدى, قالام ۇستاعان اعا-اپالارى بار بىلگەنىمەن, جيعان-تەرگەنىمەن ءبولىستى.
بۇل مەكتەپتىڭ باسقا وقۋ وردالارىنان ءبىر ەرەكشەلىگى – تاربيەسى, ءبىلىمى ەرەكشە, ءداستۇرى قالىپتاسقان, اتا-انالار قالانىڭ باسقا بولىگىنە كوشىپ كەتسە دە, بالالارىن وسى مەكتەپكە تاسيدى ەكەن. بۋللينگ, باسقا دا كەلەڭسىزدىكتەر كوبەيگەن زاماندا اتا-انالاردىڭ ورنىقتى وقۋ ورداسىنا سەنىم ارتۋى تۇسىنىكتى. اراسىندا شىعارماشىلىقپەن اينالىساتىن, ءسوز ونەرىنە, جۋرناليستيكاعا جاقىن وقۋشىلاردىڭ ساۋالدارى دا قىزىقتى بولدى. «جۋرناليست بولۋ وڭاي ما, نە ءۇشىن وسى ماماندىقتى تاڭدادىڭىز؟», «جۋرناليستيكانىڭ بولاشاعى قانداي؟» دەگەن ساۋالدارعا گازەتتىڭ شەف-رەداكتورى تولەن تىلەۋباي, موبيلوگراف جانسايا تاڭىرقۇل مەن وسى جولداردىڭ اۆتورى جاڭا مەديا تۋرالى, مەدياساۋاتتىلىققا, ماماندىقتىڭ قىر-سىرىنا قاتىستى جان-جاقتى جاۋاپ بەردى.
«جۋرناليست بولعانىڭىزعا وكىنبەيسىز بە؟», «اقشا ءۇشىن ماتەريال جازعان كەزىڭىز بولدى ما؟» دەپ سۇراعان فاريزانىڭ ساۋالىنا «استانا اقشامى» گازەتىنىڭ شولۋشىسى امانعالي قالجانوۆ تولىمدى جاۋاپ بەردى.
«ۇلتقا قاجەتتى دۇنيەلەردى جازۋعا تىرىسامىن. ءوز ۇلتىمنىڭ ماقسات-مۇددەسىنە قايشى كەلەتىن نارسەنى جازباق تۇگىل, ويىما دا العان ەمەسپىن. ايتاققا ەرەتىن, اقشاعا جازاتىن جۋرناليستەر – ءبىر توپ تا, مەملەكەتتىك ساياساتتى جازاتىن ارىپتەستەر – ءبىر توپ, ولاردىڭ اراسىندا سالماقتى دۇنيەلەر جازاتىن قالامداستارىمىز بار. ماعان وقىرمانعا كۇيزەلىس اكەلگەن اقپاراتتان گورى ادامعا قۋانىش سىيلايتىن, ادامعا كۇن سياقتى ساۋلە شاشاتىن نۇرلى دۇنيەلەر ۇنايدى» دەدى ول.
جاقسى سۇراق قويعان فاريزاعا تولەن تىلەۋباي قولتاڭباسىمەن كىتابىن سىيلاپ, 25 قازان – رەسپۋبليكا كۇنى قارساڭىندا وتەتىن, استانانىڭ 25 جىلدىعىنا ارنالعان وقۋشىلار اراسىنداعى «ەل جۇرەگى – ەلوردا» اتتى شىعارمالار بايقاۋىنا قاتىسۋعا شاقىردى, جۋرناليستەردى جىلى قابىلداعان مەكتەپ اكىمشىلىگىنە, ديرەكتورى قادىرقازى مۇقانوۆقا العىسىن ايتتى.
كەزدەسۋدى تۇيىندەگەن مەكتەپ-ليتسەي ديرەكتورىنىڭ ورىنباسارى ايگۇل ساعيتوۆا قولىنان سمارتفونى تۇسپەيتىن, گازەت-جۋرنال مەن كىتاپتى سيرەك وقيتىن جاڭا زامان جاستارى – Z بۋىنىنا ءسوز ونەرى مەن جۋرناليستيكا جايلى قۇندى مالىمەتتەر بەرىپ, ارنايى ۋاقىت ءبولىپ كەلگەن قالامگەرلەرگە شىنايى العىسىن ءبىلدىرىپ, تالاپتى وقۋشىلارمەن شىعارماشىلىق بايلانىس جاساۋ جونىندە ۇسىنىس جاسادى.
1999 جىلى اشىلعان, اقمولا استانا اتانعالى زيالى قاۋىم وكىلدەرى بالالارىن اپارعان, ەسكى بولسا دا, ەڭسەسى بيىك مەكتەپ ءبىلىم ساپاسى جونىنەن الدىڭعىلار قاتارىندا. 2013 جىلى قالا مەكتەپتەرى اراسىندا «كوشباسشى» اتاعىن يەلەنگەن, قازىر مۇندا 2257 وقۋشى ءبىلىم الادى. ەڭ العاش ديرەكتور بولعان جامال قاسىمبەك اتىندا پەداگوگيكالىق شەبەرلىك كابينەتى بار. وندا مەكتەپتىڭ جەتىستىكتەرى, وقۋشىلار مەن مۇعالىمدەردىڭ العان ماراپاتتارى جيناقتالعان. سونداي-اق 2009 جىلى اشىلعان مۇعالىمدەردىڭ جەتەكشىلىگىمەن وقۋشىلاردىڭ قولىمەن جاسالعان قولونەر بۇيىمدارىنىڭ كورمەسى تاڭعالدىردى. وندا اعاشتان ويۋ ويىپ, ءتۇيىن تۇيگەن, سۋرەت سالعان, قاعازدان, ماتادان نەشە ءتۇرلى بۇيىم جاساعان وقۋشىلاردىڭ تۋىندىلارىن كورىپ, تامسانىپ قايتتىق. ەكى اۋىسىممەن وقيتىن وقۋ ورداسىندا قازىر جالپى وقۋشىلارمەن بىرگە وقيتىن ينكليۋزيۆتى ءبىلىم الاتىن جيىرما شاقتى مۇمكىندىگى شەكتەۋلى بالا بار. ولاردىڭ اراسىندا ونەرگە تالپىنعان, عىلىمعا جاڭالىق قوسقان, رەسپۋبليكالىق «زەردە» بايقاۋىنان ورىن العان اسىلجان رايىمبەكقىزى سەكىلدى تالانتتى بالالار بار.
الداعى ۋاقىتتا مەكتەپ اكىمشىلىگى, بۇيىرسا, الاشوردا قايراتكەرى, قازاقتان شىققان تۇڭعىش ماتەماتيك ءالىمحان ەرمەكوۆتىڭ اتىن بەرۋ جونىندە رەسپۋبليكالىق ونوماستيكا كوميسسياسىنىڭ شەشىمىن كۇتىپ وتىر.
