«ەكسپو-2017» حالىقارالىق مامانداندىرىلعان كورمەسىنىڭ قورىتىندىسى بويىنشا استانا قالاسىنىڭ مەملەكەتتىك اكادەميالىق فيلارمونياسى «ۇزدىك مادەني ۇيىم» قۇرمەتتى اتاعىنا يە بولدى.
الەمدىك كورمە ۋاقىتىسىندا, ياعني بيىلعى 10 ماۋسىم-10 قىركۇيەك ارالىعىندا ونەر ۇجىمىنىڭ ارتىستەرى تىنىم كورمەدى دەپ ايتساق تا بولادى. وسى كەزەڭدە فيلارمونيانىڭ شىعارماشىلىق ۇجىمدارى ونەرسۇيەر قاۋىمعا جالپى سانى 191 كونتسەرت ۇسىندى. سونىڭ ىشىندە 14 كونتسەرت استانادان تىس, قازاقستاننىڭ قالالارى مەن وبلىستارىنا جاسالعان گاسترولدىك ساپارلاردا قويىلدى.
ءوز شاڭىراعىندا وتكىزگەن كونتسەرتتەرمەن قوسا ەلوردالىق فيلارمونيا
«ەكسپو-2017» حالىقارالىق كورمەسىنىڭ اشىلۋ جانە جابىلۋ سالتاناتىنا, «ەتنواۋىل» ۇلتتىق-مادەني كەشەنى مەن الامان بايگەدەن قر پرەزيدەنتىنىڭ كۋبوگى ءۇشىن وتكەن جارىستىڭ اشىلۋىنا, ترياتلوننان قر كۋبوگىنىڭ ءىىى كەزەڭىنىڭ كونتسەرتتىك باعدارلاماسىنا, «ۇركەر» سىيلىعىن تاپسىرۋ سالتاناتىنا, كسرو جانە
قازاقستان حالىق ءارتىسى,
مەملەكەتتىك سىيلىقتىڭ لاۋرەاتى بيبىگۇل تولەگەنوۆانىڭ «قازاق وپەراسىنىڭ اڭىزدارى» اتتى جوباسى اياسىنداعى كونتسەرتكە قاتىستى.
«ەكسپو-2017» شەڭبەرىندە «بايتەرەك» مونۋمەنتىنىڭ الدىنداعى الاڭدا وتكەن امبروزيو سپاراني جەتەكشىلىك ەتكەن يتاليا حالىق وركەسترىنىڭ كونتسەرتىنە جانە «استانا وپەرا» تەاترىندا گۋستاۆ مالەردىڭ №8 سيمفونياسىن ورىنداۋ ءۇشىن مىڭنان اسا مۋزىكانتتىڭ باسىن قوسقان كۇردەلى جوباعا اتسالىستى.
فيلارمونيانىڭ شىعارماشىلىق ۇجىمى جاز بويى «شىڭعىسحان», «الپامىس», «كۇي اتاسى – قورقىت», «قىز جىبەك پەن سانسىزباي», «جاساي بەر, قازاق ەلى!», «التاي – تارباعاتاي اندەرى», «ولەڭ ءسوزدىڭ پاتشاسى», «ازيا داۋىسى» سىندى كوپتەگەن ءىرى كونتسەرتتەر وتكىزدى. سونىمەن قاتار, ونەر ۇجىمىنىڭ تانىمال ءارتىستەرىنىڭ جەكە كونتسەرتتەرى دە كوپشىلىك نازارىنا ۇسىنىلدى.
بۇعان قوسا, «استانا سامالى» VIII حالىقارالىق ۇرمەلى اسپاپتار وركەسترلەرىنىڭ فەستيۆالى, «سەرپەر» V رەسپۋبليكالىق قازاق حالىق اسپاپتارى وركەسترلەرىنىڭ فەستيۆالى, قر ەڭبەك سىڭىرگەن ونەر قايراتكەرى م.تلەۋباەۆتى ەسكە الۋعا ارنالعان «شاشۋ» حالىق ءبيىنىڭ II حالىقارالىق فەستيۆالى سىندى ءۇش ءىرى مۋزىكالىق شارا فيلارمونيانىڭ تىكەلەي ۇيىمداستىرۋىمەن ءوتتى. بۇل فەستيۆالدەر بارىسىندا قالالىق الاڭ, «بايتەرەك» مونۋمەنتىنىڭ الدىنداعى الاڭ جانە ەلوردانىڭ «استانالىق», «ستۋدەنتتىك», «جەرۇيىق» ساياباقتارىنداعى الاڭداردا شىعارماشىلىق ۇجىمدار ونەر كورسەتتى.
فيلارمونيانىڭ كوركەمدىك جەتەكشىسى ساكەن ءابدىراحمانوۆتىڭ باستاماسىمەن «ۇلى دالا» اتتى بىرەگەي جوبا قولعا الىندى. جوبا اياسىندا ونەر ۇجىمىنىڭ بارلىق شىعارماشىلىق بولىمدەرى ءار بەيسەنبى جانە جۇما كۇندەرى «استانا» كونتسەرت زالىنىڭ الدىنداعى الاڭدا ءوز ونەرلەرىن ورتاعا سالدى.
بۇگىندە استانا قالاسىنىڭ مەملەكەتتىك اكادەميالىق فيلارمونياسى ەلوردانىڭ جەتەكشى كونتسەرتتىك-اعارتۋشىلىق مەكەمەلەرىنىڭ ءبىرى ەكەنىن تانىتتى. «ەكسپو-2017» حالىقارالىق مامانداندىرىلعان كورمەسىنەن كەيىن ونەر ۇجىمى دەمالىسقا كەتتى. ال جاڭا ماۋسىمدا ونەر ۇجىمىنىڭ كورەرمەنگە ۇسىنار قىزىقتى كونتسەرتتەرى كوپ.
امانعالي قالجانوۆ
