«قازاقستان» ورتالىق كونتسەرت زالىندا «ۇزدىك پەداگوگ» رەسپۋبليكالىق بايقاۋىنىڭ جەڭىمپازدارى ماراپاتتالدى.
ايتۋلى شارانىڭ اشىلۋىندا ءبىلىم جانە عىلىم ءمينيسترى اسحات ايماعامبەتوۆ مۇعالىمدەردى مەرەكەلەرىمەن قۇتتىقتاپ, پەداگوگتاردىڭ مارتەبەسى تۋرالى زاڭنىڭ ازىرلەنىپ, قازىر ول قۇجاتتىڭ پارلامەنتتە قارالىپ جاتقاندىعىن جەتكىزدى.
«اتالعان زاڭدى جۇزەگە اسىرۋ ءۇشىن بيۋدجەتتەن قوماقتى قارجى قاراستىرىلدى. ونى ءبىلىم سالاسىنا دەگەن ۇلكەن قولداۋ دەپ تۇسىنەمىز. پروبلەمالار جوق دەپ ايتا المايمىز. ءبىز ونىڭ بارلىعىن بىلەمىز. ونى ۇستازدارمەن, اتا-انالارمەن, جالپى, قوعاممەن بىرىگىپ شەشەمىز دەپ ويلايمىن. ۇلى ۇستاز احمەت بايتۇرسىنوۆ: «ماعان بارىنەن دە ۇستاز, مۇعالىم جاقىن. مۇعالىم – مەكتەپتىڭ جۇرەگى» دەپ ايتقان. سوندىقتان مۇعالىمدەرگە قانشا جاقسىلىق جاساساق تا ارتىق بولمايدى. ولاردىڭ جۇمىسى وتە ماڭىزدى. ەل بولاشاعىن جارقىن ەتۋ جولىندا الدىڭعى لەكتە تۇرعان ماماندىقتىڭ ءبىرى دەپ ايتامىن» دەدى مينيستر.
بۇل بايقاۋ ءۇش كەزەڭگە بولىنگەن. الدىمەن قاتىسۋشىلار اۋداندىق, وبلىستىق دەڭگەيدەگى سايىستاردا باق سىناعان. سودان وزىپ شىققان 178 پەداگوگ رەسپۋبليكالىق كەزەڭگە جولداما الدى. سونىڭ اراسىنان 64 ۇستازدىڭ باعى جانىپ, ۇزدىك شىقتى.
