ۇزدىكتەر ماراپاتتالدى

 بايقوڭىر اۋدانى اكىمى نۇربول نۇرساعاتوۆ تاۋەلسىزدىكتىڭ 30 جىلدىعىنا وراي كوپبالالى انالاردى جانە ءار سالانىڭ ۇزدىكتەرىن ماراپاتتادى.

انا دەگەن ابزال اتقا لايىقتى كوپبالالى وتباسىنىڭ ۇيىتقىسى بولىپ وتىرعان كەلەسى انالارىمىزدى «التىن القا» ماراپاتىمەن جانە بايقوڭىر اۋدانى اكىمدىگىنىڭ اتىنان حاديشا اقبەرديەۆا, سالتانات مولداعاليەۆا, زەينەپ مۋحاتاەۆا, ارايلىم تەمىرعاليەۆالارعا باعالى سىيلىق – زاماناۋي سمارت ساعاتتارىن تابىستالدى.

ءار سالانىڭ ءوز مايتالمانى بار, ءار سالانىڭ ءوز ۇزدىگى بار. ولاردى ماراپاتتاۋ, ماداقتاۋ, قۇرمەت كورسەتۋ – جاس ماماندارعا موتيۆاتسيا, ۇلگى. قالا اكىمدىگىنىڭ ۇسىنۋىمەن كەلەسى سالا ماماندارى العىس حاتتار مەن بايقوڭىر اۋدانى اكىمدىگىنەن باعالى سىيلىق – تەلەديدار تابىستالدى:

بايقوڭىر اۋدانى بويىنشا «ەڭ ۇزدىك دەنساۋلىق ساقتاۋ قىزمەتكەرى» بولىپ تانىلعان بروسكا لاريسا ­پەتروۆنا;

بايقوڭىر اۋدانى بويىنشا «ەڭ ۇزدىك ۇستاز» نوميناتسياسىندا №21 ورتا مەكتەبىنىڭ ماتەماتيكا ءپانىنىڭ مۇعالىمى – سۇلەيمەنوۆا گۇلجاۋحار بالتابايقىزى;

بايقوڭىر اۋدانى بويىنشا «ەڭ ۇزدىك ازاماتتىق قورعانىس سالاسىنىڭ مامانى» بولىپ تانىلعان بايقوڭىر اۋدانىنىڭ توتەنشە جاعدايلار باسقارماسىنىڭ باس مامانى ­قۋانىشەۆ اسىلحان سەرىكۇلى;

بايقوڭىر اۋدانى بويىنشا «ەڭ ۇزدىك پوليتسيا قىزمەتكەرى» بولىپ تانىلعان جۋكەنوۆ تەمىرلان ­ەرعابىلۇلى ماراپاتتالدى.

سوڭعى ەكى جىلدا الەمدىك پاندەميا كەزىندە قاسيەتى مەن قادىرى ەرەكشە بىلىنگەن, اق حالاتتى ابزال جانداردىڭ ەڭبەگى ەرەكشە. شىر ەتىپ جارىق دۇنيە ەسىگىن اشقان نارەستەدەن باستاپ, ەڭكەيگەن قارتقا دەيىن اق حالاتتى دارىگەرلەر قىزمەتىنە جۇگىنەتىنى راس. ولاردىڭ ەڭبەگىن قاجەتسىنبەيتىن جان بۇل ومىردە كەمدە-كەم. «دوستىق» وتباسىلىق دەنساۋلىق ساقتاۋ ورتالىعىنىڭ مەيىربيكەسى اقەركە بەيبىتقىزى, «دوس­تىق» وتباسىلىق دەنساۋلىق ساقتاۋ ورتالىعىنىڭ جالپى تاجىريبە دارىگەرى بيبىگۇل ناۋرىزبايقىزى, №8 قالالىق ەمحاناسىنىڭ ستاتيستيكا ءبولىمىنىڭ مەڭگەرۋشىسى امينا ومىرجانقىزى, №3 وتباسىلىق دەنساۋلىق ساقتاۋ ورتالىعىنىڭ مەڭگەرۋشىسى جانيا عالىمعاليقىزى ادال ەڭبەكتەرى ءۇشىن العىس حات پەن باعالى سىيلىق – ۇيالى تەلەفونمەن ماراپاتتالدى.

سونىمەن قوسا ۇزدىك قىزمەتكەرلەر 2021 جىلعى 2 جەلتوقسانداعى قر پرەزيدەنتىنىڭ جارلىعى بويىنشا «قازاقستان تاۋەلسىزدىگىنە 30 جىل» مەرەكەلىك مەدالىمەن ماراپاتتالدى. اسكەري-تاريح مۋزەيىنىڭ ساحناسىندا وتكەن ءىس-شارا مەرەكەلىك كونتسەرتكە ۇلاستى.