«استانا ورمانى» جشس دامۋ بويىنشا باسقارۋشى ديرەكتورى يۋسۋپ كەليگوۆ ەلوردانىڭ جاسىل اۋماعىندا ۆەلوسيپەد ينفراقۇرىلىمى دامىتىلاتىنىن حابارلادى.
رەكرەاتسيالىق دەمالىس اۋماعى دامىتۋدىڭ جەتى كەزەڭىنەن تۇرادى. ءبىرىنشى جانە ەكىنشى كەزەڭدە «جاسىل بەلدەۋدە» ۇزىندىعى 24 شاقىرىم ۆەلوجول پايدا بولدى. كەلەسى جىلى بۇل جەردە جايلى ءارى قاۋىپسىز دەمالىس اۋماعى قۇرىلادى. «استانا ورمانى» جشس ۆەلوجولدار جۇيەسىن دامىتۋدان بولەك تۇرعىنداردىڭ دەمالىس ايماعىنا اينالعان ورىننىڭ ينفراقۇرىلىمىن دامىتۋدى قولعا الماق.
– وسى اۋماقتا جاياۋ جۇرگىنشىلەر جولىن سالۋ جانە اباتتاندىرۋ جوسپارلانۋدا. فۋتبول, ۆولەيبول, باسكەتبول ويىندارى ءۇشىن سپورت الاڭدارى پايدا بولادى. ەكسترەمالدىق سىرعاناۋعا ارنالعان ارنايى الاڭ دا سالىنادى. بۇدان بولەك, جۋىنۋ كابينالارى جانە شەشىنەتىن بولمەسى بار ۆەلوسيپەدتەردى جالعا بەرۋدىڭ زاماناۋي ورنىن اشۋ جوسپارلانۋدا, – دەدى يۋسۋپ كەليگوۆ.
«جاسىل بەلدەۋدەگى» استانالىق ۆەلوجول جۇيەسى تەك جازدا عانا ەمەس, قىستا دا شاڭعى سپورتىنا جول اشادى. جىل باسىنان مۇندا قالالىق جانە رەسپۋبليكالىق دەڭگەيدەگى 27 سپورت جارىسى وتكەن. ال كەلەسى جىلعى ەكىنشى كەزەكتە 19 131 م ۆەلوجولدى 1,4 مەترگە كەڭەيتۋ جانە قارقارالى تاسجولى جاعىنان قوسىمشا شاعىن 2,4 شاقىرىم ۆەلوجول سالۋ جوسپارلانۋدا.الداعى بەس جىلدىڭ ىشىندە قالادا ۆەلوسيپەد پايدالانۋشىلارىنا ارنالعان ءۇش ءتۇرلى باعىت پايدا بولادى. ول تۋرالى «استانا باس جوسپار» عزي رەسمي ءمالىم ەتتى.
تۇجىرىمداماعا سايكەس, استانا قالاسىنداعى ۆەلوسيپەد مارشرۋتتارىنىڭ جالپى ۇزىندىعى 1717 شاقىرىمدى قۇرايدى. ونىڭ 1362 شاقىرىمى ۋتيليتارلى, ياعني, كۇندەلىكتى-ىسكەرلىك ءبىر جەردەن كەلەسى نۇكتەگە جەتۋگە باعىتتالعان. 233 شاقىرىمى رەكرەاتسيالىق, ياعني, ساياباقتار مەن وزەن جاعاسىنداعى باسقا دا لاندشافتى ايماقتاردا ۆەلوسيپەد باعىتتارى, ودان بولەك 32,6 شاقىرىمى تۋريستىك جانە 19,4 شاقىرىم ۋاقىتشا باعدارلار بولماق.الداعى ۋاقىتتا استانادا پايدا بولاتىن ۆەلومارشرۋتتار قىزعىلت سارى تۇسپەن بويالىپ, ايشىقتالاتىن بولادى.
ايگۇل ۋايسوۆا
