قوعامدىق ءتارتىپتى ساقتاۋدا ءاردايىم العى شەپتە تۇراتىن تىنىشتىق كۇزەتشىسى – ۋچاسكەلىك پوليتسيا ينسپەكتورى. جۇمىسى سىرتتاي سالماقتى, جايباراقات كورىنگەنىمەن, ءتۇرلى شىتىرمانعا تولى بولادى ەكەن. 23 ماۋسىم – قازاقستان رەسپۋبليكاسىنىڭ پوليتسيا كۇنى قارساڭىندا قۇقىق قورعاۋ قىزمەتكەرىنىڭ جۇمىسىمەن تانىسۋ بارىسىندا وعان كوزىمىز جەتتى. ءبىز ەلوردانىڭ الماتى اۋدانى پوليتسيا باسقارماسىنا قاراستى №8 ۋچاسكەلىك پوليتسيا پۋنكتىنە باردىق. قالانىڭ سول جاعالاۋىندا ورنالاسقان نىساندا ءبىزدى ۋچاسكەلىك پوليتسيا ينسپەكتورى, پوليتسيا لەيتەنانتى قايىرجان نازاربەكوۆ قارسى الدى.
كۇندىزگى اۋىسىمدا ىستەيتىن قىزمەتكەر تاڭمەن تالاسا ويانىپ, جۇمىسىن ساعات 7:30-دا باستادى. كەزەكشىلىككە تۇسكەن ول ساپتىق جيىنعا قاتىستى. جيىن بارىسىندا پوليتسەيلەر تۇگەندەلىپ, ولاردىڭ قىزمەت كۋالىگى, پلانشەتى تەكسەرىلدى. ودان كەيىن تاپسىرمالار بەرىلىپ, جوعالىپ كەتكەن ادامدار, ىزدەۋدە جۇرگەن قىلمىسكەرلەر جايلى باعدارلار, قالا, اۋدان اۋماعىندا وتكىزىلىپ جاتقان جەدەل الدىن الۋ شارالارى تۋرالى ايتىلدى. مىندەتتى بولىنىستەرى ايقىندالعان سوڭ, ۋچاسكەلىك ينسپەكتور دەرەۋ جۇمىسىنا كىرىسىپ كەتتى.
سول كۇنگى جۇمىس تىرەك پۋنكتى بويىنشا تۇسكەن ارىز-شاعىمدارمەن جۇمىس ىستەۋدەن باستالدى. پوليتسەي قىزمەت بارىسىندا قورعاۋ نۇسقاماسى, تابەلدىك قارۋ جانە راتسيا سەكىلدى قاجەتتى جابدىقتارىن بىرگە الىپ ءجۇردى. اتقارىلۋى ءتيىس جۇمىستاردى باعدارلاپ جاتقان ساتتە راتسيا ارقىلى «102» ورتالىعىنان ۋچاسكەلىك ايماق بويىنشا تاپسىرما ءتۇستى. ساعات 10:30-دا ا.بايتۇرسىنوۆ كوشەسى, 5 مەكەنجايىندا ىشىمدىك ىشكەن ەكى ەر ادامنىڭ اراسىندا جانجال تۋىنداعان ەكەن. ءبىرى ەكىنشىسىن پىشاقپەن ءتىلىپ تە جىبەرگەن. ال ورتالىققا قوڭىراۋ شالعان ا.سارسەنباەۆ ەسىمدى ازامات – سول ەكى ەر ادامنىڭ ءبىرى. بولىمشەگە كەلگەن ول تۇسىنىكتەمە بەرۋ بارىسىندا مەكەمەدە شۋ شىعارىپ, ءتىپتى پوليتسيا قىزمەتكەرلەرىنە داۋىس كوتەرگەنىن كورگەنىمىزدە, تاڭىرقاعانىمىز راس. ال قايىرجان نازاربەكوۆ ءۇشىن بۇل 24/7 قايتالاناتىن قالىپتى جاعداي. ول بايىپپەن ەر ادامعا جاعدايدى ءتۇسىندىرىپ, تارتىپكە شاقىردى. ونى الكوگول نە پسيحوتروپتى زات قابىلداعانىن انىقتاۋ ءۇشىن قالالىق ناركولوگيا ديسپانسەرىنە الىپ كەلىپ, مامانداردىڭ مەديتسينالىق تەكسەرىسىنەن وتكىزدى. تەكسەرىستەن وتكەن سوڭ, ءتۇسىندىرۋ جۇمىسىن جۇرگىزدى.
«شاقىرتۋ ءارتۇرلى بولادى. ءبىر كۇندە ونىڭ سانى 10-15-كە جەتسە, كەيدە ءتىپتى دە بولمايدى. الايدا ايتۋ كەرەك, ونىڭ ىشىندە وتباسى جانجالى ءجيى كەزدەسەدى. وسى تۇستا ءبىز وتباسى مۇشەلەرىنە قورعاۋ نۇسقامالارىن بەرەمىز. قىزمەت بارىسىندا ەستە قالعان جايتتىڭ ءبىرى وسى وتباسىنداعى ماسەلەگە قاتىستى بولدى. اۋماقتاعى الدەبىر تۇرعىن تاراپىنان وتباسى جانجالىنا بايلانىستى قوڭىراۋ ءتۇستى. وقيعا ورنىنا جەتتىك. اجىراسقان ەرلى-زايىپتى اراسىندا كيكىلجىڭ تۋعان. ايەلىنە, بالالارىنا ەشقانداي كومەك كورسەتپەيتىن ەر ادام ەشتەڭە بولماعانداي ءتۇن ورتاسىندا كەلىپ, جانجال شىعاردى. ول جانۇيانىڭ سول كىسىنىڭ كەسىرىنەن بەرەكەسى كەتكەنىن بايقاۋ قيىن ەمەس ەدى. شىن ايتايىن, مۇندايدى العاش كورگەندە قاتتى تاڭعالدىم. بىراق وسىنداي جانجالدار قايتالانا بەرگەن سوڭ, ول ۇيرەنشىكتى جاعدايعا اينالىپ كەتتى» دەدى پوليتسيا لەيتەنانتى.
تۇنگى ساعات 22:00-دە قاربالاسى مول ۋچاسكەلىك ينسپەكتوردىڭ جۇمىس كۇنى اياقتالدى. سىرتتاي قاراعاندا ەش الاڭسىز قىزمەت بولىپ كورىنگەنىمەن, ايتقانداي جاۋاپكەرشىلىگى وراسان جۇمىستىڭ ءبىرى.
ىشكى ىستەر ورگاندارىندا قايىرجان نازاربەكوۆ 2018 جىلدان باستاپ قىزمەت ەتەدى. ۋچاسكەلىك ينسپەكتور قىزمەتىنە جۇمىسقا ورنالاسۋىنا بىردەن-ءبىر سەبەپكەر بولعان – بالالارى. ول – ءۇش قىز, ءبىر ۇل تاربيەلەپ وتىرعان ۇلگىلى اكە.
– ۋچاسكەلىك پوليتسيا ينسپەكتورلارىنىڭ جۇمىسى ءوزىنىڭ اكىمشىلىك اۋماعىنداعى حالىقپەن تىعىز بايلانىستى قاجەت ەتەدى. كۇندەلىكتى قىزمەت قاۋىرت. ينسپەكتور بولۋ ءۇشىن ەڭ اۋەلى شىدام قاجەت. ودان كەيىن ءارتۇرلى جاعدايدا دۇرىس شەشىم قابىلداي الۋ كەرەك. ارينە, جۇمىستىڭ قىزىعى دا, قيىنشىلىعى دا قاتار جۇرەدى. حالىققا قول ۇشىن سوزىپ, ساۋاپتى ءىس جاساپ, بالالارىما ۇلگى بولعىم كەلەدى, – دەيدى ول.
الماتى اۋدانىنا قاراستى №8 ۋچاسكەلىك پوليتسيا پۋنكتىندە 8 قىزمەتكەر جۇمىس ىستەيدى. «Highvill» تۇرعىن ءۇي كەشەنىنىڭ ىرگەسىندە ورنالاسقان پۋنكت قىزمەتكەرى بۇل جەردىڭ تۇرعىندارى ءتارتىپ ساقتايتىنىن ايتتى. ارينە, مۇندا دا قوعامدىق ءتارتىپتى قاتاڭ ساقتاپ, قاي ىستە بولماسىن قىراعىلىق تانىتاتىن ۋچاسكەلىك پوليتسيا ينسپەكتورلارىنىڭ ۇلەسى بار.
– كوپقاباتتى ۇيدە قانشا پاتەر بولسا, ارقايسىسىنىڭ ءبىر-بىرىنە ۇقسامايتىن ءوز تاعدىرى بار. نەگىزىنەن, جاعدايلار تۇرعىن ءۇي اۋماعىنداعى قوناق ءۇي, مەيرامحانالاردا, ودان بولەك, پاتەردى جالعا الىپ تۇرۋشىلار تاراپىنان تۋادى. بولىمشەگە تۇرعىن ءۇيدىڭ كۇزەتشىلەرى كەلىپ, كولىگىن دۇرىس قويماعان جۇرگىزۋشىلەرگە ەسكەرتۋىن سۇرايدى. ءبىز كولىكتىڭ ءنومىرى ارقىلى تۇرعىندارعا حابارلاسىپ ايتامىز. ۋچاسكەلىك پوليتسەي قاتال بولاتىن تۇستا قاتالدىق تانىتىپ, قاجەت كەزىندە كەشىرىمشىل دە بولا الۋى قاجەت دەپ ەسەپتەيمىن. سوندىقتان دا بولىمشەمە قارايتىن تۇرعىننىڭ بارلىعىمەن جىلى سويلەسىپ, بارىنشا سىرلاس, دوس بولۋعا تىرىسامىن. ءبىز ەڭ ءبىرىنشى ادامبىز, سودان كەيىن عانا مامانبىز, – دەدى ق.نازاربەكوۆ.
مەملەكەت باسشىسى قاسىم-جومارت توقاەۆتىڭ پارمەنىمەن وتكەن جىلى پوليتسيا قىزمەتى قاۋىپسىزدىكتى قامتاماسىز ەتۋدىڭ سەرۆيستىك مودەلىنە كوشتى. مۇنداعى نەگىزگى ماقسات – «جۇرتقا جاقىن ءتارتىپ ساقشىسى» تۇسىنىگىن قالىپتاستىرۋ. جىل بۇرىن مەملەكەت باسشىسىنىڭ تاپسىرماسىمەن قولعا الىنعان باستاما بۇگىن ءوز ناتيجەسىن بەرىپ كەلەدى.
«سەرۆيستىك پوليتسياعا كوشۋدىڭ ەرەكشەلىگى وتە كوپ. ونى ءبىز ۋچاسكەلىك پوليتسيا ينسپەكتورى رەتىندە كۇندە بايقاپ ءجۇرمىز. الدىمىزعا تالاپ قويىلعان سوڭ, مەملەكەتتىك بيلىكتىڭ وكىلى رەتىندە ونى ورىندايمىز. جالپى پوليتسيا قىزمەتى قوعامدىق بىرلەستىكتەرمەن, ونىڭ ىشىندە پاتەر يەلەرىنىڭ كووپەراتيۆى, دەنساۋلىق ساقتاۋ ۇيىمدارى, مەملەكەتتىك ورگاندارمەن تىعىز قارىم-قاتىناستا, بىرلەسە جۇمىس ىستەيدى» دەدى ۋچاسكەلiك پوليتسيا ينسپەكتورى قايىرجان نازاربەكوۆ.
جاڭا ءتاسىل نەگىزىندە كەز كەلگەن ۋچاسكەلىك پوليتسەي تۇرعىنداردىڭ الەۋمەتتىك جەلىدەگى ورتاق چاتىنا قوسىلۋعا مىندەتتى. بۇل ولاردىڭ حالىقپەن تىعىز بايلانىسىنا, ۋاقىتىلى قولجەتىمدىلىگىنە مۇمكىندىك بەرەدى. قازىردىڭ وزىندە استانادا 500-گە جۋىق ۋچاسكەلىك پوليتسەي بار. ارقايسىسى شامامەن 2500 تۇرعىنى بار اۋماققا جاۋاپتى.
