قازاقستاندا تۇرمىستىق زورلىق-زومبىلىق فاكتىلەرى بويىنشا پوليتسياعا جىلىنا 100 مىڭعا جۋىق ارىز-شاعىم كەلىپ تۇسەدى.
زاڭ بۇزعان, قىلمىس جاساعان كەز كەلگەن ازامات ءتيىستى جازاسىن الاتىنىن, ال جابىرلەنۋشى مەملەكەت پەن قوعام ونى قورعايتىنىنا سەنىمدى بولۋى كەرەك. بۇل تۋرالى پارلامەنت سەناتى اپپاراتىنىڭ باسشىسى, قحا مۇشەسى ماكسيم سپوتكاي ايتتى.
مەملەكەت باسشىسىنىڭ تاپسىرماسى بويىنشا بيىل وتباسىلىق-تۇرمىستىق قاتىناستار سالاسىنداعى قىلمىستار ءۇشىن جاۋاپكەرشىلىكتى قاتاڭداتۋ جونىندە ەلەۋلى قادامدار جاسالدى. الايدا وتباسىنىڭ شىرقىن بۇزىپ, زورلىق-زومبىلىق جاساعانداردىڭ 10%-ى عانا جاۋاپقا تارتىلادى. سەبەبى جابىرلەنۋشىلەردىڭ باسىم كوپشىلىگى ءوتىنىشىن قايتارىپ الادى نەمەسە مەدياتسيا ارقىلى تاتۋلاسادى. وسىلايشا قۇقىق بۇزعان ازامات جاۋاپكەرشىلىكتەن سىتىلىپ شىعا كەلەدى.
مەملەكەت باسشىسى ادىلەتتى قازاقستاننىڭ نەگىزگى قۇندىلىعى – زاڭ مەن ءتارتىپ ەكەنىن ناقتى اتاپ ءوتتى. پرەزيدەنت قالىپتاسقان جاعدايعا الاڭداۋشىلىق ءبىلدىردى جانە كوشەدەگى مادەنيەتسىزدىكتەن باستاپ توبەلەسكە, ۇرلىق پەن كىسى ولىمىنە دەيىنگى بارلىق قۇقىق بۇزۋشىلىقتارعا قاتىستى ىمىراسىزدىقتىڭ ماڭىزدىلىعىن اتاپ ءوتتى. تۇرمىستىق زورلىق-زومبىلىق, ۆانداليزم, دورەكىلىك, بۇزاقىلىق – مۇنىڭ بارىمەن تەك مەملەكەت پەن قۇقىق قورعاۋ ورگاندارى عانا ەمەس, بۇكىل قوعام بولىپ, ارقايسىمىز كۇرەسۋىمىز كەرەك.
«سەنات پارلامەنت فۋنكتسياسىن اتقارۋ كەزەڭىندە قك مەن اقبتك-گە ءتيىستى تۇزەتۋلەر قابىلداعان بولاتىن. زاڭناماداعى وزگەرىستەر قىلمىسكەردى جابىرلەنۋشىدەن وقشاۋلاۋ ءۇشىن ونى تۇتقىنداۋعا مۇمكىندىك بەردى, سونىمەن قاتار ورتاشا زيان كەلتىرگەنى ءۇشىن 3 جىلعا دەيىن جانە اۋىر قىلمىس ءۇشىن 10 جىلعا دەيىن جاۋاپكەرشىلىك كۇشەيتىلدى. جابىرلەنۋشىنىڭ ءوتىنىشى بولماسا دا زورلىق-زومبىلىق فاكتىلەرى بويىنشا قىلمىستىق ءىس قوزعاۋعا مۇمكىندىك بەرەتىن تۇزەتۋلەر قابىلداندى.تاراپتاردى قايتا تاتۋلاستىرۋ مۇمكىندىگى الىنىپ تاستالدى. ياعني مۇنداي قىلمىس ءۇشىن جاۋاپكەرشىلىكتى قاتاڭداتۋ بويىنشا ەلەۋلى قادامدار جاسالدى» دەدى ماكسيم سپوتكاي.
ونىڭ ايتۋىنشا, مۇنىڭ بارلىعى – زاڭ مەن تارتىپكە باعىناتىن مەملەكەت بولۋ باعىتىندا جاسالىپ جاتقان ناقتى قادام. الايدا تەك زاڭنامالىق شارالاردىڭ جەتكىلىكسىز ەكەنى اقيقات. ەڭ باستىسى, قوعامدا مۇلدە توزبەۋشىلىك قاعيداسى قالىپتاسۋى كەرەك.
تورعىن امان
