مانات اسىلقىزى, ەلوردا تۇرعىنى:
– بىردە بوتەن ادام ۇيالى تەلەفونىما حابارلاسىپ, مەنىڭ شىمكەنت قالاسىنان ءبىر ماقساتقا نەسيە العانىمدى حابارلادى. «ءسىز كىمسىز؟» دەپ سۇراپ ەدىم, «بانكتىڭ قىزمەتكەرىمىن» دەدى. ءتىپتى, ءوزىنىڭ ءنومىرىن جىبەرىپ, ماعان حابارلاسۋدى سۇرادى. كەيىنىرەك بىلگەنىمدەي, مەن الاياقتاردىڭ تۇزاعىنا ءتۇسىپ قالا جازداپپىن. مۇنداي جاعدايدان ساقتانۋ ءۇشىن نە ىستەۋ كەرەك؟ الاياقتارمەن قالاي سويلەسۋ كەرەك؟
بۇل سۇراققا زاڭگەر ەگور رەدين جاۋاپ بەرەدى:
– كوپ جاعدايدا ادامدار ۇرەي مەن ابدىراپ قالۋ سالدارىنان الاياقتار قۇربانىنا اينالادى. مۇمكىندىك بولسا, اڭگىمەنى وربىتپەگەن ءجون. سەبەبى بانك پەن باسقا دا قىزمەت تۇرلەرى كۇدىكتى وپەراتسيالار تۋرالى تەلەفون قوڭىراۋىنسىز-اق حاباردار ەتەدى. كارتاداعى اقشانى ۇرلاۋعا قاتىستى كۇدىكتى سىلتاۋ ەتۋ ارقىلى كارتا دەرەكتەرىن انىقتاۋ – الاياقتاردىڭ ەڭ ءجيى قولداناتىن ءادىسى. وسىنداي اڭگىمەنى ەستىگەن بولساڭىز, بىردەن تەلەفون تۇتقاسىن قويىڭىز. ەگەر كۇدىكتىمەن سويلەسكەن بولساڭىز, وندا ەشقانداي ساندى اتاماۋ كەرەك جانە سۇراقتارعا «ءيا» جانە «جوق» دەپ جاۋاپ بەرمەگەن ابزال. سەبەبى ءسىزدىڭ داۋىسىڭىزدى ديكتوفونعا جازىپ الۋى مۇمكىن. ازاماتتىڭ جەكە دەرەگىن بىلگەننەن كەيىن مۇنداي جازبانى داۋىستى انىقتاۋ قىزمەتى بار بانك نەمەسە باسقا دا قىزمەتكە قوڭىراۋ شالۋ ءۇشىن قولدانۋعا بولادى. سونداي-اق جاسىرىن ءنومىر قوڭىراۋلارىنا دا جاۋاپ بەرمەۋ كەرەك جانە كۇدىكتى سىلتەمەلەر ارقىلى وتپەگەن دۇرىس. شىنايى بانكتەردەن تەك رەسمي نومىرلەر ارقىلى حابارلاسادى جانە حابارلاما جولدايدى.
تولەن تىلەۋباي