1 شىلدەدەن باستاپ ەلىمىزدەگى 2,1 ملن زەينەتكەردىڭ جاسىنا بايلانىستى جانە ەڭبەك سىڭىرگەن جىلدارى بويىنشا بەرىلەتىن زەينەتاقى مولشەرى 11 پايىزعا ارتادى.
ناقتى ايتقاندا, 2017 جىلدىڭ 1 شىلدەسىنەن باستاپ بازالىق زەينەتاقى تولەمىنىڭ مولشەرى 14466 تەڭگەنى قۇرايدى. سول سياقتى انا مەن بالانى قولداۋ ماقساتىندا بالا تۋعاندا بەرىلەتىن بىرجولعى جاردەماقى مولشەرى 20 پايىزعا ارتادى. ياعني, بالا تۋعاندا بەرىلەتىن بىرجولعى مەملەكەتتىك جاردەماقى ءبىرىنشى, ەكىنشى جانە ءۇشىنشى بالاعا – 38 اەك نەمەسە 86222 تەڭگە; ءتورتىنشى جانە ودان دا كوپ بالاعا – 63 اەك نەمەسە 142947 تەڭگە بولادى.
قازىرگى ۋاقىتتا استانا قالاسىنىڭ «الەۋمەتتىك تولەمدەردى ۆەدومستۆوارالىق ەسەپتەۋ ورتالىعى» دەپارتامەنتى زەينەتاقى مەن جاردەماقى مولشەرلەرىن قايتا ەسەپتەۋ بويىنشا بارلىق ءتيىستى جۇمىستاردى جۇرگىزدى.
– «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى ەلباسى جولداۋىندا اتاپ وتكەن تاپسىرمانى ورىنداۋ زەينەتاقى تولەمدەرىنىڭ مولشەرى 11 پايىزعا ارتادى. قايتا ەسەپتەۋ اۆتوماتتى تۇردە جۇزەگە اسىرىلدى, سوندىقتان زەينەتاقى الۋشىلاردىڭ ءبىزدىڭ مەكەمەگە وسى ماسەلە بويىنشا قوسىمشا جۇگىنۋى قاجەت ەمەس, – دەيدى الەۋمەتتىك تولەمدەردى ۆەدومستۆوارالىق ەسەپتەۋ ورتالىعى دەپارتامەنتىنىڭ ديرەكتورى گاۋحار مۇحانبەتجانوۆا.
گۇلميرا ايماعانبەت
