ولار دوپپەن ويناعاندى ۇناتادى, ءبىر-ءبىرىن ۆالسكە شاقىرىپ, بي بيلەيدى, ءوز تىلدەرىندە ءان دە سالادى… اڭگىمە ادامدار ەمەس, دەلفيندەر جايلى. كەشە Mega Silk Way ورتالىعىندا ورنالاسقان دەلفيناريدە جۇزدەگەن ەلوردالىق بالا اقىلدى ماقۇلىقتاردىڭ وسىنداي ونەرلەرىنە كۋا بولىپ, كول-كوسىر اسەرگە بولەنىپ قايتتى.
زەۆس پەن دي-دي ەسىمدى «ەرلى-زايىپتى» دەلفيندەر ەلورداعا سوچي قالاسىنان اكەلىنىپتى. افالينا تۇقىمىنان شىققان سۇيكىمدى سۋ جانۋارلارىنىڭ جاسى –12-14-تە. ولاردىڭ جاساندى ورتاعا ۇيرەنگەندەرىنە 10 جىلدان اسقان كورىنەدى. دەلفيناريدىڭ جەتەكشىسى بوريس تۋحانيننىڭ ايتۋىنشا, بۇلاردىڭ ارقايسىسىنا كۇنىنە 10-12 كەلىدەي تەڭىز بالىعىن بەرەدى. ولاردىڭ ىشىندە قۇنىس, قىزىل بالىق, مينتاي, سالاكا بار. مايشاباقتى ءسۇيسىنىپ جەيدى ەكەن.
– دەلفيندەردىڭ مىنەزى بالانىكى ءتارىزدى. ءتىلى شىقپاعان بالامەن ءتىل تابىسۋدىڭ جولى – ونى ەركەلەتۋ عوي. زەۆس پەن دي-ديگە دە تۋرا سولاي قارىم-قاتىناس جاسايمىز. ەگەر كوڭىل-كۇيلەرى جوق بولسا, كوماندانى ورىنداعىسى كەلمەسە, ولاردى ماجبۇرلەۋ مۇمكىن ەمەس, – دەدى ول.
دەلفيناري جەتەكشىسى بۇل ماقۇلىقتاردىڭ ەموتسيانى تاني الاتىنىن دا ايتتى. مۇنىسى راس سەكىلدى. ويتكەنى شوۋ بارىسىندا بالالار تاڭ-تاماشا بولىپ قول سوققان سايىن ولار ودان ءارى بەلسەندى قيمىلداپ, بار ونەرلەرىن ءساتتى كورسەتىپ شىقتى. قيقۋلاپ جارىسا ءان سالدى, جاتتىقتىرۋشىلارىمەن بىرگە ۆولەيبول وينادى, سۋ بەتىنەن 3-4 مەتر بيىكتىككە قارعىپ شىعىپ, نەبىر تريۋكتى ورىندادى, ول از دەسەڭىز, تۇمسىقتارىنا قىلقالامدى قىستىرىپ الىپ اق قاعازعا سۋرەت تە سالدى. ەڭ قىزىعى, ونەرىن پاش ەتىپ بولعان سوڭ قۇددى ءبىر ساحنا ارتىستەرىندەي قولىن بۇلعاپ, باسىن يەدى.
ءبىر ايتا كەتەرلىگى, بۇل جولعى شوۋ بارلىق كورەرمەنگە تەگىن بولدى. ۇيىمداستىرۋشىلار وسىلايشا استانالىق شاكىرتتەرگە, ونىڭ ىشىندە مۇمكىندىگى شەكتەۋلى وقۋشىلارعا وسىنداي تاماشا قۋانىش سىيلاعىسى كەلىپتى.
– ءبىز قالاداعى №2 ارنايى مەكتەپتەن كەلدىك. 120 بالانى اكەلىپ وتىرمىن. دەلفينوتەراپيانىڭ بالالارعا قانشالىقتى جاقسى اسەر ەتەتىنى تالاي رەت دالەلدەنگەن عوي. شوۋدان سوڭ بالالار دا ءبىر جاساپ, مارە-سارە بولىپ قالدى, – دەپ اعىنان جارىلدى اتالمىش مەكەمەنىڭ الەۋمەتتىك پەداگوگى تاتيانا قۇسايىنوۆا.
Happylon Park-تەگى دەلفيناري باسشىسى ءلاززات تۇرسىنباەۆانىڭ سوزىنە قاراعاندا, دەلفيناريگە 400 ادام سىيادى. مۇندا قوس دەلفينمەن قاتار, ەكى تەڭىز مىسىعى دا ونەر كورسەتەدى. باسسەيننىڭ كولەمى – 1200 تەكشە مەتر, ەرەجە بويىنشا ءار جانۋارعا 300 تەكشە مەتر كەڭىستىك كەرەك ەكەنىن ەسكەرسەك, باسسەين ماقۇلىقتارعا تارلىق قىلمايدى. قايىرىمدىلىق شاراسى تەك مۇنىمەن شەكتەلىپ قالمايدى. – ءار ايدىڭ العاشقى بەيسەنبىسىندە ءبىز الەۋمەتتىك وسال توپتارعا جاتاتىن 200-دەي بالانى پاركتە تەگىن ويناتامىز. ول ءۇشىن سوعان جاۋاپتى قوعامدىق ۇيىمدار بىزگە حات جازىپ, سۇرانىس جىبەرۋى كەرەك, – دەيدى Happylon Park ماركەتولوگى ارسەن بەكتاەۆ.
ەستەرىڭىزگە سالا كەتەيىك, دەلفيندەر شوۋى اپتاسىنا بەس كۇن – سارسەنبى, بەيسەنبى, جۇما (ساع. 19.00-دە), سەنبى (ساع. 17.00 جانە 20.00-دە) جانە جەكسەنبى (ساع. 12.00, 15.00 جانە 18.00-دە) ۇيىمداستىرىلادى.
