ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە جاستارعا ارنالعان بوس جۇمىس ورىندارى جارمەڭكەسى ۇيىمداستىرىلدى. ءىس-شاراعا 70 شاقتى مەكەمە قاتىسىپ, 2 مىڭعا جۋىق بوس جۇمىس ورنى ۇسىنىلدى.
«بۇل – بيىل وتكىزىلگەن التىنشى ءىس-شارا. جىل سوڭىنا دەيىن ونعا جۋىق جارمەڭكە وتكىزىلمەك. الدىڭعى بوس جۇمىس ورىندارى جارمەڭكەسىندە 200 جاس جۇمىسپەن قامتىلسا, وسى جولى مىڭعا جۋىق جۇمىس ورنى ۇسىنىلدى. ۋنيۆەرسيتەت الاڭىندا مەملەكەتتىك مەكەمەلەردەن باستاپ, جەكە كاسىپكەرلىك وكىلدەرىنە دەيىن قاتىسىپ, وسىلايشا جۇمىسسىز جاستار ءبىر ۋاقىتتا بىرنەشە مەكەمەگە ءوز تۇيىندەمەسىن بەرە الدى» دەدى «استانا جاستارى» كمم-ءنىڭ مامانى اسەل بولاتقىزى.
ۇيىمداستىرۋشىلاردىڭ ايتۋىنشا, تاڭەرتەڭ باستالعان بوس جۇمىس ورىندارى جارمەڭكەسى تۇسكى ۋاقىتقا دەيىن سوزىلدى. ايتا كەتەيىك, اتالعان اۋقىمدى ءىس-شارانى استانا قالاسىنىڭ جاستار ساياساتى ماسەلەلەرى باسقارماسى, «استانا جاستارى» جاستار رەسۋرستىق ورتالىعى, قالالىق «حالىقتى جۇمىسپەن قامتۋ ورتالىعى» جانە ل.گۋميلەۆ اتىنداعى ەۋرازيا ۇلتتىق ۋنيۆەرسيتەتى بىرلەسە ۇيىمداستىردى. جارمەڭكەگە AirAstana, «SOS استانا بالالار اۋىلى», «ريكسوس بۋراباي» قوناق ءۇيى, «بانك تسەنتركرەديت» اق, «BI Group» حولدينگى, «KazAeroSpace» جانە ت.ب. ءىرى ۇيىمدار مەن كومپانيالار قاتىستى.
– اتالعان جارمەڭكەدە جۇمىس ىزدەۋشى جاستارمەن قوسا جوعارى كۋرستىڭ ستۋدەنتتەرى ءىس-تاجىريبەدەن ءوتۋ ءۇشىن مەكەمەلەرمەن كەلىسىم جاسادى. وسى ءبىلىم ورداسىنان جىلدا 5 مىڭ تۇلەك ءبىتىرىپ شىعادى. سول ستۋدەنتتەرىمىز ماماندىعىنا ساي جۇمىس تابۋى ءۇشىن ۋنيۆەرسيتەتىمىزدىڭ الاڭىندا بوس جۇمىس ورىندارى جارمەڭكەسىنىڭ ءوتۋى – ۇلكەن كومەك. ۋنيۆەرسيتەتىمىزدە مۇنداي ءىس-شارا جىل سايىن ەكى مارتە وتكىزىلىپ تۇرادى. تۇيىندەمەلەرىن اكەلەدى, جۇمىس بەرۋشىلەرمەن سۇحباتتاسادى. ءار جارمەڭكەدە جۇمىس ىزدەۋشى جاستاردىڭ شامامەن 20-30 پايىزى ماماندىقتارىنا ساي جۇمىس تاۋىپ جاتادى, – دەدى ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ كارەرا جانە بيزنەس ارىپتەستىك ءبولىمى باسشىسى گۇلنۇر سماعۇلوۆا.
