كەشە ەلورداداعى تاۋەلسىزدىك سارايىندا UNWTO-نىڭ «اقىلدى قالالار – اقىلدى دەستيناتسيالار» اتتى VIII جاھاندىق ءسامميتى باستالدى. ءۇش كۇنگە سوزىلاتىن حالىقارالىق جيىنعا 700-دەن اسا مەيمان قاتىسۋدا. ولاردىڭ قاتارىندا شەتەلدىك تانىمال كاسىپكەرلەر, ساۋلەتشىلەر, جۋرناليستەر مەن تۋريستىك ۇيىمداردىڭ وكىلدەرى بار. UNWTO-نىڭ قالالىق تۋريزم ماسەلەلەرىنە ارنالعان 8-ءسامميتى «اقىلدى» قالالاردى دامىتۋ, ولاردىڭ بۇگىنگى تاڭداعى كۇردەلى قالالىق پروبلەمالاردى شەشۋگە ىقپالى جونىندە بولماق. ويتكەنى مۇنداي ماسەلە الەمدەگى كوپتەگەن دەستيناتسيالاردى الاڭداتىپ وتىر.
القالى جيىندا قالالىق باسقارۋدىڭ ورنىقتىلىعى, قولجەتىمدىلىگى, يننوۆاتسيالار مەن تەحنولوگيالار سياقتى ماڭىزدى ماسەلەلەر اشىق تالقىلانادى. نەلىكتەن بۇل ءسامميتتى وتكىزۋگە نۇر-سۇلتان قالاسى تاڭدالدى؟ سەبەبى قازاقستاننىڭ باس قالاسى «اقىلدى» قالانىڭ العاشقى تەحنولوگيالارىن ساتىمەن قولدانىسقا ەنگىزدى. مىسالى, گادجەتتەردى قۋاتتاۋعا مۇمكىندىك بەرەتىن جىلى ايالدامالار, كۇن باتارەيالارى مەن ۆەلوتۇراقتار – وسىنىڭ دالەلى. بۇدان باسقا دا جاڭا تەحنولوگيالار ەلوردادا قولدانىلۋدا.
بۇل سامميت بىزگە نە بەرەدى؟ قازىر جەر شارىنداعى حالىقتىڭ جارتىسىنان كوبى قالالاردا ءومىر سۇرەدى. 2050 جىلعا قاراي الەمدەگى قالالاردا تۇراتىن ادامداردىڭ سانى 2,5 ملرد-قا وسەدى دەگەن بولجام بار. الايدا قالالار كوبەيگەن سايىن, ونداعى حالىقتىڭ تۇرمىسىنىڭ ساپاسىنا اسەر ەتەتىن نارسەلەر دە ۇلعايۋدا. مۇنداي جاعدايدا تەك «اقىلدى» قالالار عانا كومەككە كەلەدى. سونىڭ ىشىندە قالانى وركەندەتۋگە ءتۋريزمنىڭ قوساتىن ۇلەسى ۇشان-تەڭىز. قازاقستان سياقتى قارقىندى دامۋ جولىنا تۇسكەن مەملەكەت ءۇشىن تۋريزم ەكونوميكانىڭ قوزعاۋشى كۇشى عانا ەمەس, سونداي-اق ەلىمىزدى الەمدىك قاۋىمداستىققا تانىتۋدىڭ تۋرا جولى.
بۇل ورايدا جاھاندىق دەڭگەيدەگى باسقوسۋدىڭ وتكىزىلۋى ەلىمىزدەگى قالالاردىڭ زاماناۋي جانە تەحنولوگيالىق جاڭارۋىنا جاعىمدى اسەرىن تيگىزىپ قانا قويماي, باس قالامىز – نۇر-سۇلتاننىڭ تۋريستەرگە تارتىمدى دەستيناتسيا رەتىندە كەلبەتىن وزگەرتەدى. سونىمەن قاتار, شەتەلدىك قوناقتار تۋريستىك سالانى دامىتۋدىڭ وزىق تاجىريبەسىمەن بولىسەدى. القالى جيىندا قازاقستان جانە قاتىسۋشى-ەلدەر اراسىندا ءتيىستى دەكلاراتسياعا قول قويىلادى. دەمەك, بۇل جيىن ءبىزدىڭ ماماندارىمىز بەن شەتەلدىكتەردىڭ ىسكەرلىك جانە سەرىكتەستىك قارىم-قاتىناستارىن كەڭەيتۋگە مۇمكىندىك بەرەدى.
ەڭ باستىسى, قالالىق تۋريزم جونىندەگى UNWTO-نىڭ 8-ءشى جاھاندىق ءسامميتىن وتكىزۋ ەلوردامىزدىڭ بەدەلىنە جاعىمدى ىقپال ەتەدى. باس قالامىز قازاقستاننىڭ مادەني, رۋحاني, ىسكەرلىك ورتالىعى ەكەنىن تاعى ءبىر مارتە دالەلدەيدى. ال شەتەلدىك مەيماندار قازاق حالقىنىڭ باي تاريحىمەن, وزىق مادەنيەتىمەن, عاجايىپ سالت-داستۇرلەرىمەن تانىسادى. ەلدى, ۇلتتى الەمگە تانىتۋعا تاماشا مۇمكىندىك تۋادى.
