جىل باسىنان بەرى ەلوردادا ەڭبەك زاڭناماسىنىڭ تالاپتارىن ساقتاماعان 82 زاڭدى تۇلعاعا 20 ملن تەڭگە ايىپپۇل سالىندى. بۇل تۋرالى كوممۋنيكاتسيالار قىزمەتىندە وتكەن ءباسپاسوز ءماسليحاتىندا قالالىق ورتا ساپاسى جانە باقىلاۋ باسقارماسى باسشىسىنىڭ ورىنباسارى ەرلان ىسماعۇلوۆ مالىمدەدى.
– جىل باسىنان بەرى ەڭبەك زاڭناماسىنىڭ ساقتالۋىن باقىلاۋ ماقساتىندا مەملەكەتتىك ەڭبەك ينسپەكتورلارى جوسپاردان تىس 247 تەكسەرىس جۇرگىزدى. بىلتىر سايكەس كەزەڭدە 267 تەكسەرىس جاسالعان بولاتىن. ناتيجەسىندە تالاپقا ساي كەلمەۋ فاكتىلەرى بويىنشا 133 نۇسقاما, سونداي-اق 20 ملن تەڭگە سوماسىنا 82 زاڭدى تۇلعاعا اكىمشىلىك ايىپپۇل سالىندى. وتكەن جىلى بولعان تەكسەرىستەر قورىتىندىسى بويىنشا 87 سۋبەكتىگە 16 ملن تەڭگە ايىپپۇل سالىنعان ەدى, – دەدى ەرلان ىسماعۇلوۆ.
سونىمەن بىرگە بيىل 800-گە جۋىق استانالىقتىڭ جالاقى بويىنشا بەرەشەگى وتەلدى.
– بيىل 86,2 ملن تەڭگەدەن استام جالاقى بويىنشا بەرەشەك وتەلدى. وسىلايشا, 795 قىزمەتكەردىڭ ەڭبەك جانە كونستيتۋتسيالىق قۇقىقتارى قورعالدى. 2022 جىلى 1 758 قىزمەتكەردىڭ جالپى سوماسى 430 ملن تەڭگە جالاقى بەرەشەگى وندىرىلگەن ەدى, – دەدى قالالىق ورتا ساپاسى جانە باقىلاۋ باسقارماسى باسشىسىنىڭ ورىنباسارى.
ونىڭ ايتۋىنشا, جالاقى بويىنشا بەرەشەك ماسەلەلەرىن شەشۋ جانە ەڭبەك جانجالدارىن بولدىرماۋ ماقساتىندا تۇراقتى نەگىزدە پروبلەمالى جۇمىس بەرۋشىلەر جانە وزگەدە جاۋاپتى ورگاندار وكىلدەرى مەن اكىم ورىنباسارىنىڭ توراعالىعىمەن ەڭبەك قاتىناستارىن رەتتەۋ جونىندەگى قالالىق كوميسسيانىڭ وتىرىستارى وتكىزىلىپ تۇرادى. جىل باسىنان بەرى وتكەن وسىنداي 5 وتىرىستىڭ ناتيجەلەرى بويىنشا جالاقى بويىنشا بەرەشەكتى وتەۋ, وندىرىستىك جاراقاتتانۋدى ازايتۋ, الەۋمەتتىك اۋدارىمداردى تولەۋ بويىنشا بەرەشەك ماسەلەلەرىن شەشۋ جانە رەتتەۋ جونىندە شارالار قابىلداندى.
بۇگىنگى تاڭدا ەلوردادا 299 الاڭدا قۇرىلىس جۇمىستارى جۇرگىزىلۋدە. بۇل رەتتە بارلىق قۇرىلىس كومپانيالارى بىردەي قاۋىپسىزدىك تەحنيكاسىن ساقتاي بەرمەيتىنى شىندىق. قارجىنىڭ ءتيىستى دەڭگەيدە بولىنبەۋى سالدارىنان كەيدە وندىرىستىك جاراقاتتانۋلار ورىن الىپ, بۇزۋشىلىقتارعا جول بەرىلىپ جاتادى.
– تالداۋ كورسەتكەنىندەي, ەڭبەك قاۋىپسىزدىگى جانە ەڭبەكتى قورعاۋ ەرەجەلەرىنىڭ ساقتالماۋى, جۇمىسشىلاردىڭ جەكە قورعانىش قۇرالدارىمەن قامتاماسىز ەتىلمەۋى اۋىر جاراقاتتارعا, ءتىپتى جازاتايىم وقيعالارعا اكەلىپ سوعادى. وسىنداي وقىس وقيعالاردىڭ الدىن الۋ ماقساتىندا ەڭبەك ينسپەكتورلارى كاسىپورىنداردىڭ ەڭبەك ۇجىمدارىمەن ەڭبەك قاۋىپسىزدىگى جانە ەڭبەكتى قورعاۋ جونىندەگى تالاپتاردى ساقتاۋ بويىنشا بيىل 1500-دەن استام قىزمەتكەردى قامتي وتىرىپ, 50 ەڭبەك ۇجىمىندا ءتۇسىندىرۋ جۇمىستارىن جۇرگىزدى. الەۋمەتتىك جانە ەڭبەك قاتىناستارىن رەتتەۋ ماقساتىندا قالادا 34 000-نان استام ۇجىمدىق شارت جاسالدى, – دەدى ەرلان ىسماعۇلوۆ.
