مەملەكەت باسشىسى قاسىم-جومارت توقاەۆ «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى ءوزىنىڭ العاشقى جولداۋىندا مادەنيەت قىزمەتكەرلەرىن قولداۋ شارالارىنا ەرەكشە توقتالعان ەدى. مادەنيەت سالاسىندا جۇمىس ىستەيتىن ازاماتتارعا جەتكىلىكتى تۇردە كوڭىل بولىنبەي وتىرعانىن اتاپ وتكەن پرەزيدەنت بۇل, ەڭ الدىمەن, كىتاپحانا, مۋزەي, تەاتر قىزمەتكەرلەرىنە قاتىستى ماسەلە ەكەنىن, ولاردىڭ ەڭبەكاقىسى سوڭعى جىلدارى مۇلدە كوبەيمەگەنىن ايتىپ, ۇكىمەتكە مادەنيەت قىزمەتكەرلەرىنىڭ جالاقىسىن كوبەيتۋگە تاپسىرما بەردى. جالاقىنىڭ ازدىعىنان ولار جەڭىلدىگى بار تۇرعىن ءۇي باعدارلامالارىنا قاتىسا المايتىنىن, سوندىقتان ءبىلىم بەرۋ جانە دەنساۋلىق ساقتاۋ سالالارىنداعى الەۋمەتتىك جەڭىلدىكتەر مادەنيەت سالاسىنىڭ وكىلدەرىنە دە بەرىلۋ كەرەكتىگىن باسا ايتتى. باس قالامىزدا پرەزيدەنتتىڭ وسى باعىتتاعى تاپسىرمالارى ورىندالىپ جاتىر.
جۋىردا نۇر-سۇلتان قالاسى ءماسليحاتىنىڭ كەزەكتەن تىس سەسسياسىندا قالا اكىمىنىڭ ورىنباسارى ەسەت بايكەن بيۋدجەتتىك مەكەمەلەر, سونىڭ ىشىندە مادەنيەت قىزمەتكەرلەرىنىڭ جالاقىسىن كوتەرۋ ماسەلەسى بويىنشا ەسەپ بەردى. ونىڭ ايتۋىنشا, بيىلعى 7 ماۋسىمدا نۇر-سۇلتان قالاسى اكىمدىگىنىڭ ءتيىستى قاۋلىسى شىقتى. سوعان سايكەس قالا اكىمدىگىنە قاراستى 56 مەكەمەنى قوسا العاندا مادەنيەت سالاسىنىڭ 12 ۇيىمى قىزمەتكەرلەرىنىڭ جالاقىسى 30 پايىزدان 100 پايىزعا دەيىن ءوسىرىلدى.
سول جيىندا قالالىق ءماسليحات حاتشىسى ەرلان كاناليموۆ سوڭعى ءۇش جىلدا ءماسليحات دەپۋتاتتارى بيۋدجەت قىزمەتكەرلەرىنىڭ جالاقىسىن كوتەرۋ ماسەلەسى بويىنشا ۇسىنىستى سەنات پەن ماجىلىسكە جانە ورتالىق اتقارۋشى ورگاندارعا بىرنەشە رەت جولداعانىن جەتكىزدى. وسىلايشا بيىلعى جازدىڭ باسىنان باستاپ قالاداعى 4 مىڭنان استام قىزمەتكەردىڭ جالاقىسى ءوستى.
ە.راحماديەۆ اتىنداعى مەملەكەتتىك اكادەميالىق فيلارمونياسىنىڭ باس ديرەكتورى, نۇر-سۇلتان قالاسى ءماسليحاتىنىڭ دەپۋتاتى, قازاقستاننىڭ مادەنيەت قايراتكەرى ەرلان داكەنوۆتىڭ پىكىرىنشە, كوپ جاعدايدا مەملەكەتتىك ەكونوميكانى, ساياساتتى الدىڭعى ورىنعا قويىپ, مادەنيەتتىڭ ماڭىزدىلىعىن سەزىنبەي جاتامىز. وسىنداي قالىپتاسقان كوزقاراسقا بايلانىستى بولسا كەرەك, ەلىمىزدىڭ مادەنيەت سالاسىنداعى قىزمەتكەرلەردىڭ جالاقى ماسەلەسى ۇزاق ۋاقىت بويى شەشىمىن تاپپاي كەلدى. ونەر ادامدارى تابىسىن ارتتىرۋ ءۇشىن باسقا سالالاردا قوسىمشا جۇمىستار اتقارۋعا ءماجبۇر بولدى. ال مۇنداي جاعدايدا شىعارماشىلىق دامۋ, ءوسۋ جۇرمەيتىنى بارشاعا ايان.
«نۇر-سۇلتان قالاسىنىڭ اكىمى التاي سەيدىرۇلى ونەر جاناشىرى رەتىندە ۇلكەن قولداۋ كورسەتىپ, بيىل «جەرگىلىكتى بيۋدجەتتەن قارجىلاندىرىلاتىن ۇيىمدار جۇمىسكەرلەرىنىڭ لاۋازىمدىق ەڭبەكاقىلارىنا ىنتالاندىرۋ ۇستەماقىلارىن بەلگىلەۋ تۋرالى» قاۋلىسىنا قول قويدى. بۇل جولى ەل الدىندا ونەر كورسەتىپ جۇرگەن ءارتىس, انشىلەرگە عانا ەمەس, ساحنا سىرتىنداعى قىزمەتكەرلەرگە دە ەرەكشە كوڭىل ءبولىندى. ءبىر ءىس-شارانى باسىنان سوڭىنا دەيىن اتقارىپ شىعۋ ءۇشىن نەگىزگى پەرسونالعا قوسىمشا قانشاما اكىمشىلىك, تەحنيكالىق قامتاماسىز ەتۋ بولىمدەرىنىڭ قىزمەتكەرلەرى جانە قوسالقى جۇمىسشىلار ەڭبەكتەنەدى. وسى ماسەلەگە ەرەكشە كوڭىل بولىنگەنى قۋانتادى. قاۋلىعا سايكەس قىزمەتكەرلەردىڭ لاۋازىمدىق جالاقىلارىنا 20, 30, 50 پايىزعا دەيىنگى مولشەردە ىنتالاندىرۋ ۇستەمەاقىلارى قوسىلدى. ارينە, بۇل قىزمەتكەرلەردىڭ الەۋمەتتىك جاعدايىن ءجۇز پايىز وزگەرتتى دەپ ايتا المايمىز. الايدا وڭ وزگەرىستەر شىعارماشىلىق دامۋعا, جۇمىس ساپاسىنا جاقسى اسەر ەتەتىنى ءسوزسىز» دەيدى ەرلان ەرعازىۇلى.
مادەنيەت سالاسىنىڭ ىشىندە ەڭ تومەنگى جالاقى كىتاپحاناشىلاردا ەدى. نۇر-سۇلتان قالاسىنىڭ ءماسليحاتى قالانىڭ ورتالىقتاندىرىلعان كىتاپحانالار جۇيەسىنىڭ ماسەلەلەرىنە ارنالعان بىرنەشە وتىرىس وتكىزدى. سونداي جيىنداردىڭ بىرىندە ەڭبەكاقى, باسپانامەن قامتۋ ماسەلەلەرى دە تالقىلاندى. سوندا تاجىريبەسى جوق جاس ماماننىڭ جالاقىسى بار بولعانى 50-60 مىڭ تەڭگە ەكەنى ايتىلدى. ارينە, مۇنداي جالاقىمەن پاتەر ماسەلەسىن شەشۋ مۇمكىن ەمەس. قالالىق مادەنيەت باسقارماسىنىڭ باسشىسى سانات شاپاشوۆ تا مۇنى مويىندايدى.
«Elorda Jastary» باعدارلاماسىنا كەلگەندە كىتاپحانا قىزمەتكەرلەرىندە قيىندىقتار تۋىنداپ وتىر. قازىرگى تاڭدا باسقارماعا قاراستى مەكەمەلەردەن 22 ادام, كىتاپحانالاردان 4 قىزمەتكەر قازاقستان يپوتەكالىق كومپانياسى ارقىلى باعدارلاماعا قاتىسىپ جاتىر. وكىنىشكە قاراي, جالاقى جاعىنان سايكەسسىزدىكتەر تۋىندادى» دەگەن ەدى ول قالالىق ءماسليحاتتىڭ ءبىر جيىنىندا. جالاقى كوتەرىلگەننەن كەيىن بۇل جاعى دا رەتتەلۋى ءتيىس دەپ ويلايمىز.
جاس ماماننىڭ ديپلومىن العاننان كەيىن بەلگىلى ءبىر قىزمەتكە تۇرىپ, تاجىريبەسى تولىسقاندا جالاقىنىڭ ازدىعىنان باسقا جۇمىسقا اۋىسۋ جاعدايلارى ءجيى كەزدەسەدى. اشىلعانىنا ءبىر جارىم جىلدان عانا اسقان ەلورداداعى مۋزىكالىق جاس كورەرمەن تەاترىنىڭ قۇرامى, نەگىزىنەن, جاستاردان جاساقتالعان. ونەر ۇجىمىنا ازىرگە كەلگەندەر بولماسا, كەتكەندەر جوق. وسى تەاتر ديرەكتورى, قازاقستاننىڭ ەڭبەك سىڭىرگەن قايراتكەرى اسحات ماەميروۆتىڭ ايتۋىنشا, جالاقىنىڭ كوتەرىلۋى ۇجىمنىڭ جۇمىسقا دەگەن ىنتاسىن ارتتىردى.
«بيىلعى جازدىڭ باسىندا قالا اكىمدىگىنىڭ قاۋلىسىمەن ەڭ تومەنگى جالاقى العان «ۆ», «س», «D» ساناتىنداعى قىزمەتكەرلەردىڭ جالاقىسىنا ۇستەمە قوسىلدى. بۇل ساناتتاعى تەحنيكالىق قىزمەتكەرلەر – اۋلا سىپىرۋشىلار, كۇزەتشىلەر, ساحنا ماشينيستەرى, رەكۆيزيتورلارعا 50 پايىز, تەاتر ينسپەكتورلارى, مەنەدجەرلەرگە 30 پايىز, ال شىعارماشىلىق ترۋپپا – اكتەرلەر, رەجيسسەرلەر, سۋرەتشىلەر, بالەتمەيستەرلەر, حورمەيستەرلەرگە 20 پايىز ۇستەمە قوسىلىپ جاتىر. بۇل – قۋانتاتىن جاعداي. پرەزيدەنتىمىز 2025 جىلعا دەيىن جىل سايىن پايىزدىق ۇستەمەاقى قوسىلاتىنىن, ياعني ەڭبەكاقى ءار جىلدا كوتەرىلەتىنىن ايتتى. ەلوردادا سونىڭ العىشارتتارى جاسالدى دەپ ەسەپتەيمىز» دەيدى اسحات ماەميروۆ.
باسپانامەن قامتۋ جاعىنا كەلگەندە, قالا اكىمدىگىنىڭ باعدارلاماسى ارقىلى مۋزىكالىق جاس كورەرمەن تەاترىندا جۇمىس ىستەيتىن ءۇش وتباسى باسپانالى بولدى. ال التى وتباسى مەملەكەتتىك قىزمەت ىستەرى اگەنتتىگىنىڭ جاتاقحاناسىندا تۇرىپ جاتىر.
– ونەر سالاسىنا كەلگەندە ءبىر بولمەلى بولسا دا, ۋاقىتشا تۇرۋعا ارنالعان تۇرعىن جاي سالىنۋى ءتيىس سياقتى. بۇرىن «اكتەرلەر ءۇيى» دەگەن ۇعىم بولعان. سونى جاڭعىرتىپ, «ارتىستەر ءۇيى» دەپ اتاۋ كەرەك دەپ ويلايمىن. وسىندا تۇراتىن ونەر ادامدارى اقشا جيناپ, مەملەكەتتىك باعدارلامالارمەن پاتەر الا الادى. وسى ورايدا مەملەكەتتىك قىزمەت ىستەرى اگەنتتىگىنىڭ توراعاسى دارحان جازىقباەۆقا اگەنتتىكتىڭ جاتاقحاناسىنان تەاترىمىزدىڭ التى وتباسىنا ورىن بەرگەنى ءۇشىن العىس ايتقىم كەلەدى. «تۇرمىس بولماسا, بولمىس بولمايدى» دەپ بابالارىمىز ايتقان. ال اكتەرلەردىڭ بولمىسى – تالانتى, شىعارماشىلىق الەۋەتى. مەن سول بولمىستىڭ جارقىراپ كورىنگەنىن قالايمىن. ول ءۇشىن تۇرمىستىق ماسەلەلەر شەشىلۋى ءتيىس» دەيدى اسحات ماكسيمۇلى.
