جالعان اقپاراتتى جوققا شىعاردى
استانا قالاسىنىڭ اكىمدىگى ازاماتتارعا بۇگىنگى كۇنى قالادا جەكە تۇرعىن ءۇي قۇرىلىسىنا جەر تەلىمدەرىن ءبولۋ جۇزەگە اسىرىلىپ جاتقانىن جانە بيىلعى جىلعا جوسپارلانباعانىن حابارلايدى.
قازىرگى ۋاقىتتا الەۋمەتتىك جەلىلەردە (WatsApp, Facebook, Instagram جانە ت.ب.) استانادا جەكە تۇرعىن ءۇي قۇرىلىسىنا جەر تەلىمدەرىن ءبولۋ باستالعانى تۋرالى ۆيرۋستىق اقپارات تاراتىلۋدا, بۇل شىندىققا سايكەس كەلمەيدى.
الاياقتىق فاكتىلەرىنە جانە اقپاراتتى قاتە تۇسىنۋگە جول بەرمەۋ ماقساتىندا استانا قالاسىنىڭ اكىمدىگى حالىقتى ورتالىق مەملەكەتتىك ورگانداردىڭ رەسمي اقپاراتتارىنىڭ حابارلامالارىنا عانا سەنۋگە شاقىرادى.
2006 جىلدىڭ تامىزىنان ءبۇگىنگى كۇنگە دەيىن جەكە تۇرعىن ءۇي قۇرىلىسىنا جەر تەلىمدەرىن الۋعا كەزەككە 117 مىڭ ازامات ءتىركەلگەن. تيىسىنشە, بۇعان دەيىن جەر تەلىمىن الۋعا ءوتىنىش بەرگەن جانە ارنايى ەسەپتە (كەزەكتە) تۇرعانداردان قايتادان كەزەككە تۇرۋ قاجەت ەتىلمەيدى, ويتكەنى ولاردىڭ كەزەكتىلىگى ساقتالادى.
كەزەكتىلىك تۋرالى مالىمەتتەردى ەلەكتروندى اكىمدىكتىڭ e.astana.kz جانە www.uzo.astana.kz سايتىنان «جەرگە كەزەك ءنومىرىن ىزدەۋ» تاراۋىنان بىلۋگە بولادى.
قالا بيلىگى ازاماتتاردى الەۋمەتتىك جەلىلەردەگى وسىنداي تاراتىلىمدارعا ساقتىقپەن قاراپ, «فەيك» اقپارات تۋرالى قالا اكىمدىگىنە نەمەسە قۇقىق قورعاۋ ورگاندارىنا حابارلاۋعا شاقىرادى.