جاقىندا ۇكىمەتتىڭ كەڭەيتىلگەن وتىرىسىندا مەملەكەت باسشىسى قاسىم-جومارت توقاەۆ ەلىمىزدەگى بايلانىس پەن ينتەرنەت ساپاسىن سىنعا الدى. «تاعى ءبىر ماسەلە – ينتەرنەت جىلدامدىعىنىڭ تومەندىگى. بايلانىس وپەراتورلارى تاراپىنان تاريفتىك جوسپارلار ۇنەمى جاڭارتىلىپ وتىرادى. ال ينتەرنەت جىلدامدىعى مەن ساپاسى رەسمي مالىمدەمەدەن ناشار. ۇكىمەتكە وسى سالادا تۇتىنۋشىلاردىڭ قۇقىقتارىن قورعاۋ جانە ناقتىلى پارامەترلەردىڭ مالىمدەلگەندەردەن ايتارلىقتاي الشاقتىعى ءۇشىن جاۋاپكەرشىلىكتى ەنگىزۋ ماسەلەسىن پىسىقتاۋدى تاپسىرامىن» دەدى پرەزيدەنت.
2019 جىلى قر پرەمەر-ءمينيسترى اسقار مامين «2021 جىلدىڭ سوڭىندا ەلىمىزدە 5G بايلانىس جەلىسى ەنگىزىلەدى, جاڭا جەلى الدىمەن ەلوردادا سىناق ەتىلىپ, كەيىن باسقا وڭىرلەرگە تاراتىلادى, سونىڭ ارقاسىندا رەسپۋبليكا حالقىنىڭ 97 پايىزىن كەڭ جولاقتى ينتەرنەت جەلىسىمەن قامتۋعا مۇمكىندىك تۋادى» دەگەن ەدى. سودان بەرى ءۇش جىلعا جۋىق ۋاقىت ءوتتى. بىراق ەشتەڭە وزگەرمەگەن سياقتى, 5G جەلىسىن قويىپ, ەلىمىزدىڭ باس قالاسى نۇر-سۇلتاننىڭ وزىندە ينتەرنەتتىڭ قارقىنى قالىپسىز نەمەسە دۇرىس ۇستامايدى. سوڭعى كەزدەرى ينتەرنەت ساپاسىنىڭ ناشارلىعىنان بۇكىل الەۋمەتتىك جەلى كەش باتا كىبىرتىكتەپ, تۇندە «ءتىلىن تىستەپ قالىپ» ءجۇر. «تۇيەنى جەل ۇشىرسا, ەشكىنى اسپاننان كورەسىڭ» دەگەندەي, ەلىمىزدىڭ باس قالاسىندا ينتەرنەتتىڭ جاعدايى وسى بولعاندا, شەت-شالعاي اۋىلدارعا نە سىن؟! ال قۇزىرلى ورگانداردىڭ ايتۋى بويىنشا بىزدە ءبارى كەرەمەت! «ەلىمىزدە 117 قالا مەن 3324 اۋىلدا كەڭ جولاقتى ينتەرنەت قولجەتىمدى. ول ءارتۇرلى تەحنولوگيالارمەن قامتاماسىز ەتىلگەن. سولاردىڭ ىشىندە تالشىقتى-وپتيكالىق جەلى, 3G جانە 4G جەلىلەرى بار» دەپ سوعادى. بىراق وتكەن جىلى ونلاين وقۋ باستالعاندا, اۋىلداعى وقۋشىلاردىڭ «ينتەرنەت قۋىپ» ءار ءۇيدىڭ ىرگەسىندە, ات قورانىڭ توبەسىندە, مايانىڭ ۇستىندە جۇرگەنىن كوزىمىز كوردى. بىلايشا ايتقاندا, قازاقستاندا ينتەرنەت ۇستامايتىن جەرلەر جەتەدى. بىراق ونىمەن ەسەپتەسىپ جاتقان ۇكىمەت جوق, «دامىعان 50 ەلدىڭ قاتارىنا قوسىلدىق» دەگەن قۇر ماقتاندى مىسە تۇتىپ, جالعان مالىمەتپەن جۇرتتى جارىلقاپ ءجۇر. ماسەلەن, بيىل كوكتەمدە ەلوردانىڭ ىرگەسىندەگى قوياندى اۋىلىنىڭ تۇرعىنى ينتەرنەت سيگنالىنىڭ ناشارلىعىنا شاعىمدانعان ەدى. تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات مۋسين حالىق الدىندا ەسەپ بەرگەندە وسى ماسەلەگە دە توقتالىپ, «ەلىمىزدە ءموبيلدى ينتەرنەت ساپاسىنىڭ ەڭ تومەنگى شەگى بەكىتىلدى. سونىمەن قاتار مەن ينتەرنەت ساپاسىن ولشەۋ ءۇشىن قالا ماڭىن ارالايتىن ۆيتسە-ءمينيستردى بەلگىلەدىم. ءبىرىنشى كەزەكتە ەلوردا ماڭىن ارالاۋ كوزدەلگەن» دەگەن ەدى. سودان بەرى دە ەشتەڭە وزگەرگەن جوق. ەندى پرەزيدەنتتىڭ سىنىنان كەيىن نە وزگەرەدى؟ ونى دا ۋاقىتتىڭ سىنى مەن ينتەرنەتتىڭ ساپاسى كورسەتەدى.
