استانا قالاسىنىڭ دەنساۋلىق ساقتاۋ باسقارماسى قر ىشكى ىستەر ءمينيسترىنىڭ اتىنا ەڭبەككە جارامسىزدىق پاراقتارى مەن جۇمىسقا ۋاقىتشا جارامسىزدىق انىقتامالارىن زاڭسىز دايىنداۋعا, ساتۋعا جانە ساتىپ الۋعا, سونىمەن قاتار, اتالمىش مەديتسينالىق قۇجاتتاردى زاڭسىز پايدالانۋعا قاتىستى قر قىلمىستىق كودەكسىنە قوسىمشا باپ ەنگىزۋ تۋرالى حات جولداعان. بۇل تۋرالى كەشە وتكەن استانا قالالىق ءماسليحاتىنىڭ زاڭدىلىق, قۇقىقتىق ءتارتىپ جانە قوعاممەن جۇمىس جونىندەگى تۇراقتى كوميسسيا وتىرىسىندا اتالمىش باسقارما باسشىسى كامالجان نادىروۆ مالىمدەدى.
ونىڭ ايتۋىنشا, بۇل ۇسىنىس باس پروكۋراتۋرا جانىنداعى ۆەدومستۆوارالىق جۇمىس توبىنىڭ وتىرىسىندا قارالىپ, مەديتسينالىق قۇجاتتارعا قاتىستى زاڭ بۇزۋشىلىققا قىلمىستىق كودەكستىڭ 383-بابىنا سايكەس جازا تاعايىندالاتىندىقتان, قوسىمشا باپ ەنگىزۋ ارتىق دەپ سانالدى.
قالالىق دەنساۋلىق ساقتاۋ باسقارماسى مىندەتتى مەديتسينالىق تەكسەرۋدەن ءوتۋدىڭ الگوريتمىن ازىرلەپ, بەكىتتى. وعان سايكەس مەديتسينالىق ۇيىمداردا جەكە قۇرىلىمدىق بولىمشەلەر قۇرىلدى. بۇل قادامعا باسقارما حالىققا ىڭعايلى جاعدايلار تۋدىرۋ جانە ادامداردى تەكسەرۋدەن جىلدام
وتكىزۋ ءۇشىن باردى. قورىتىندىسىندا تەكسەرۋدىڭ مەرزىمى ەداۋىر قىسقاردى. قالادا مەملەكەتتىك جانە جەكەمەنشىك مەديتسينالىق ۇيىمدار مەديتسينالىق تەكسەرۋ وتكىزەتىنىن ايتا كەتۋ كەرەك.
بۇعان قوسا, 086.kz پورتالى جاسالدى. بۇل پورتالعا باسقارماعا قاراستى بارلىق مەديتسينالىق ۇيىمدار مەديتسينالىق انىقتامانى العان ادامداردىڭ اتى-جوندەرىن ەنگىزەدى. بۇل پورتال تىركەۋى بار مەديتسينالىق ۇيىمدارعا عانا قولجەتىمدى. بيىلعى جىلدىڭ ءتورتىنشى توقسانىندا جەكەمەنشىك مەديتسينالىق ۇيىمداردىڭ قاتىسۋىمەن پورتالدى جەتىلدىرۋ بويىنشا جيىن وتكىزۋ جوسپارلاندى.
بانكنوتتىق فابريكالاردا جاسالاتىن قۇجات پاراقتارى مەديتسينالىق ۇيىمدارعا بەرىلگەندە پاراقتىڭ ءنومىرى سايكەس جونەلتپە قۇجاتتا كورسەتىلەدى. دەنساۋلىق ساقتاۋ باسقارماسى باسشىسىنىڭ پىكىرىنشە, ىشكى ىستەر دەپارتامەنتى ورگاندارى بۇل ماسەلەنى باقىلاۋعا الۋى كەرەك. سەبەبى بۇل قۇجاتتى بانكنوتتى فابريكالاردان باسقا جەردەن الۋ مۇمكىن ەمەس.
«سونداي-اق, ءمور جاسايتىن ۇيىمداردى باقىلاۋعا الۋ كەرەك. ءىىد ورگاندارى جالعان ەڭبەككە جارامسىزدىق پاراقتارىن بەرۋ فاكتىلەرى بويىنشا قىزمەتتىك تەكسەرىس جۇرگىزىپ, كىنالىلەردى جازاعا تارتۋ قاجەت» دەيدى كامالجان نادىروۆ.
جالپى, ءبىر عانا №7 قالالىق ەمحانا ۇسىنعان مالىمەت بويىنشا 2015 جىلى – 95, 2016 جىلى – 88 جانە بيىلعى جىلدىڭ 9 ايىندا 32 جالعان ەڭبەككە جارامسىزدىق پاراقتارى بەرىلگەن.
امانعالي قالجانوۆ
