«جاستار» تەاترىنىڭ جاڭا تۋىندىسى كورەرمەندەرگە جول تارتتى. كورنەكتى جازۋشى ورالحان بوكەيدىڭ «ۇيقىم كەلمەيدى» اڭگىمەسىنىڭ جەلىسىمەن ساحنالانعان مۋزىكالىق مونوسپەكتاكلدى تەاتر ءارتىسى داۋرەن سەرعازين قويدى. جالعىز اكتەرگە ارنالعان قويىلىمدا باس كەيىپكەر – جەڭىسحاننىڭ بەينەسىن دە رەجيسسەردىڭ ءوزى سومداپ شىقتى.
اڭگىمەنى وقىعان جۇرت ونداعى وقيعالار ءبىر جاقتان, ياعني اۆتوردىڭ سوزىمەن عانا باياندالاتىنىن بىلەدى. بۇل تۇرعىدان العاندا, شىعارما ساحنالانعاندا جانرى دۇرىس ايقىندالعان. تاقىرىپ تا تەاتر باعىتىنا ساي تاڭدالدى. «ماحاببات جاسقا قارامايدى» دەسەك تە, عاشىقتىق جاستىققا عانا جاراساتىن سەزىم ەكەنىن مويىنداۋىمىز كەرەك.
اكتەر, رەجيسسەر رەتىندە ءوزىمىز تانيتىن داۋرەن سەرعازيننىڭ بۇل قويىلىمدا تاعى ءبىر قىرى اشىلدى. «ءان اعا» تەلەحيكاياسىندا ءشامشى قالداياقوۆتىڭ جىگىت كەزىن ول بەكەردەن-بەكەر سومداماعان ەكەن. مونوسپەكتاكل جانرىندا اتالمىش تەاتردا العاش رەت قويىلعان قويىلىمنىڭ مۋزىكاسىن ءوزى جازىپ, بىرنەشە اۆتورلىق ءانىن قوستى.
«ءان جازۋمەن ءبىرازدان بەرى اۋەستەنگەن ەدىم. بارا-بارا اندەرىمدى قايدا قولدانسام ەكەن دەپ ويلانا باستادىم. سودان مونوسپەكتاكل ارقىلى جارىققا شىعارۋعا بولاتىنىنا كوزىم جەتتى. سوعان ساي كەلەتىن ماتەريال قاراستىرىپ جۇرگەنىمدە, ورالحان بوكەيدىڭ «ۇيقىم كەلمەيدى» اڭگىمەسىنە توقتادىم. وسى شىعارمانى ساحنالاپ, وعان ون شاقتى ءانىمدى قوستىم. ءان جازۋ قولىمنان كەلە مە, كەلمەي مە دەگەن وي ءوزىمدى كوپ مازالادى. سوندىقتان ماعان اندەرىم جونىندە حالىقتىڭ پىكىرى كەرەك بولدى. الايدا بۇل ماقساتتى عانا ۇستانعان جوقپىن, وسى مونوسپەكتاكل ارقىلى اكتەرلىك پەن رەجيسسەرلىگىمدى شىڭداسام دەگەن ويدى باسشىلىققا الدىم» دەيدى د.سەرعازين.
مونوسپەكتاكلدە قوسىمشا ۆوكالمەن باس كەيىپكەردى مەيىرعات امانگەلدين مەن ءىڭكار ءناسيەۆا, ال مۋزىكالىق سۇيەمەلدەۋمەن اقجان ورىنباساروۆا جانە ايسۇلتان جاليەۆ دەمەپ تۇردى. رەجيسسەردىڭ سوزىنشە, بۇل قويىلىم كورەرمەننىڭ كوڭىلىنەن شىقسا, ونى تۇراقتى رەپەرتۋارعا قوسۋ كوزدەلۋدە. سونداي-اق, ول اتالمىش جانرداعى ىزدەنىستەرىن توقتاتپايتىندىعىن جەتكىزدى.
امانعالي قالجانوۆ
