قامقورلىققا ءزارۋ زەينەتكەرلەردىڭ جازعى دەمالىسىن ۇيىمداستىرۋدى داستۇرگە اينالدىرعان قالالىق ارداگەرلەر كەڭەسى بيىل تاعى 150 قاريانى قامقورلىققا الدى. ەندى ولار ەلوردا ماڭىنداعى «نۇرا» دەمالىس ورنىندا دەمالادى.
استانا قالالىق ارداگەرلەر كەڭەسىنىڭ توراعاسى امانكەلدى سىزدىقوۆتىڭ ايتۋىنشا, قارتتار بۇل جەرگە تاڭەرتەڭ ەرتەمەن ارنايى كولىكپەن كەلەدى ەكەن. تاڭعى استارىن ىشكەننەن كەيىن ولار ءبىر-بىرىمەن اڭگىمەلەسىپ, سول جەردە گازەت-جۋرنال وقىپ, شاحمات نەمەسە دويبى ويناپ, تەلەديدار كورەدى. مۇندا بىرەۋلەر ءىس تىكسە, ەكىنشىلەرى ولەڭ ايتىپ, گارمون تارتىپ, قىسقاسى, بوس ۋاقىتتارىندا اركىم وزىنە ۇنايتىن ىسپەن اينالىسادى. سونداي-اق, تۇسكى استارىن ءىشىپ, شاشتارازعا بارۋلارىنا, ءتىپتى, قاريالاردىڭ قان قىسىمىن تەكسەرتىپ, قاجەتتى دارىلەرىن دە ىشۋلەرىنە جاعداي جاسالعان. كەشكى استان كەيىن ارنايى بولىنگەن كولىك ولاردى ۇيلەرىنە جەتكىزىپ سالادى دا, ەرتەڭگىسىن تاڭەرتەڭ وسىندا تاعى الىپ كەلەدى. وسىلايشا, ولار مۇندا ون كۇن دەمالادى.
«بالا-شاعالارى جوق, جالعىزىلىكتى قارتتاردىڭ كوبىنە ءوز بەتتەرىمەن ەشقايدا بارا المايتىنى بەلگىلى. ۇزاقتى كۇن ۇيلەرىندە وتىراتىن 150 ادامدى بىلتىر ءبىرىنشى رەت قالا ىشىندەگى دەمالىس ورنىنا اپارىپ, ساۋىقتىرۋعا سەپتىگىمىزدى تيگىزگەن ەدىك. سول ءداستۇردى جالعاستىرعان قالالىق ارداگەرلەر كەڭەسى دەمەۋشىلەردىڭ كومەگىمەن بيىل تاعى وسىنشا ادامنىڭ دەمالۋىنا جاعداي جاساپ وتىر. ءبىر ايتا كەتەرلىگى, مۇندا كەز كەلگەن قارت ادام دەمالا المايدى. بۇل رەتتە ءبىزدىڭ باستى ماقساتىمىز – كەزىندە ەلدىڭ دامۋىنا ەڭبەك ەتكەن جانداردىڭ, بۇگىندە بوگدە بىرەۋلەردىڭ كومەگىنسىز, ءوز بەتىمەن جۇرە الاتىن تىل ارداگەرلەرى مەن جاسىنا بايلانىستى زەينەتكە شىققان جالعىزىلىكتى قاريالاردىڭ دەمالىسىن ۇيىمداستىرۋ» دەيدى امانكەلدى حامزەۇلى.
قاريالار مۇندا ماۋسىم ايىنىڭ 10-ىنان 1قازانعا دەيىن دەمالادى. وسىعان وراي, ىزگىلىكتى شارادا استاناداعى ءۇش اۋداننىڭ دا قارتتارى قامتىلماقشى. دەگەنمەن, دەمالىس ورنىنا الدىمەن سارىارقا اۋدانىنىڭ جالعىزىلىكتى زەينەتكەرلەرى بارادى. الدىن الا بەرىلەتىن ءتىزىم بويىنشا ولاردىڭ 15-ءى قازىردىڭ وزىندە دايىن وتىر.
جالپى, استانادا قازىرگى تاڭدا جۇمىسپەن قامۋ جانە الەۋمەتتىك باعدارلامالار باسقارماسىنا جالعىزىلىكتى, قامقورلىققا ءزارۋ زەينەتكەر رەتىندە 361 ادام تىركەلگەن. ولارعا قالالىق اكىمدىك تاراپىنان ءتۇرلى قامقورلىقتار جاسالۋدا.
گۇلبارشىن وكەشقىزى
