دەمالىس كۇندەرى استانالىقتار مەن قالا قوناقتارى «الاۋ» سپورت كەشەنىندە وتكەن مۇزداعى تارتىستى دا قىزىقتى موتوجارىستى تاماشالاۋعا مۇمكىندىك الدى. ەلوردادا العاش رەت ۇيىمداستىرىلعان دوداعا رەسەي, قازاقستان, گەرمانيا, شۆەتسيا, اۆستريا جانە نيدەرلاندتان كەلگەن سپورتشىلار الەم چەمپيوناتىنىڭ جۇلدەسىن ساراپقا سالدى. ەكى كۇنگە جالعاسقان موتوجارىستىڭ قورىتىندىسى بويىنشا رەسەي كوش باستادى.
قازاقستان اتىنان شىققان اندرەي شيشەگوۆ جارىستىڭ ءبىرىنشى كۇنى شيرەك فينالعا دەيىن جەتتى. وندا اندرەي موتوبايكقا يەلىك ەتە الماي, فينالعا جولدامانى قولدان جىبەرىپ الدى. ونىڭ الدىنا شۆەدتىك مارتين حااراحيلتۋنەن شىعىپ كەتتى. ەكىنشى كۇنى شيشەگوۆ شيرەك فينالعا دا جەتپەي, قايتادان شۆەدتىك سپورتشىدان قالىپ قويدى. ءار بۇرىلىستا, ءار اينالىمدا بارىن سالعان قازاقستاندىق سپورتشىعا تاجىريبە جەتىسپەدى دەيدى ماماندار.
جەڭىسكە ۇمتىلعان مارتين حااراحيلتۋنەننىڭ ويىنى كوپشىلىكتى تاڭعالدىردى. سەبەبى قازىرگى الەم چەمپيونى دميتري كولتاكوۆتىڭ كورسەتكىشتەرىنە جاقىنداۋ جاس سپورتشىعا وڭاي تۇسپەگەنى انىق. «جول جاپ-جاقسى. جارىستىڭ ءتورت اينالىمىندا دا ەشقانداي قيىندىق بولمادى» دەدى ءمارتيننىڭ ءوزى. وسىلايشا, شەتتەن كەلگەن شۆەدتىك موتوشاباندوز كۇمىس جۇلدەگە يە بولسا, كولتاكوۆ جارىستىڭ العاشقى جانە سوڭعى كۇنى ءبىرشاما باسىمدىلىقپەن جەڭىستى جۇلىپ الدى.
ادەتتە, رەسەيلىك موتوشاباندوزدار دەربەس جانە توپتىق جارىستاردا ءبىرىنشى ورىنمەن قاتار جەڭىس تۇعىرىنىڭ ءۇش بىردەي ورنىن يەمدەنەدى. بۇل جولى دا رەسەيدەن كەلگەن دميتري حوميتسەۆيچ العاشقى كۇنى III ورىن يەلەنسە, كەلەسى كۇنى سەرگەي كاراچينتسەۆ پەن دانيل يۆانوۆ II جانە III ورىنعا جايعاستى. الەمدەگى ەڭ قاۋىپتى ءارى ەكسترەمالدى سپورت ءتۇرىنىڭ ەلوردادا العاش رەت وتكىزىلۋى – مۇزداعى موتوجارىستىڭ ەلىمىزدەگى تانىمالدىلىعىن ارتتىرادى دەپ ۇمىتتەنەدى ۇيىمداستىرۋشىلار. بيىلعى الەم چەمپيوناتىنىڭ فينالى 5 كەزەڭنەن تۇرادى. سپورتشىلار رەسەي, گەرمانيا جانە نيدەرلاند ەلدەرىندە وتەتىن كەلەسى كەزەڭدەردە باق سىناسادى.
جارىستى استانا قالاسى اكىمدىگىنىڭ قولداۋىمەن قازاقستاننىڭ اۆتوموتوسپورت فەدەراتسياسى ۇيىمداستىردى.
گۇلدانا تالعاتقىزى
