وسى كۇندەرى استانا قالالىق ءماسليحاتىندا 2019-2021 جىلدارعا ارنالعان قالا بيۋدجەتىنىڭ جوباسى تالقىلانىپ جاتىر. وسىعان ارنالعان العاشقى وتىرىستاردىڭ ءبىرىن ءماسليحاتتىڭ الەۋمەتتىك-مادەني دامۋ ماسەلەلەرى ءجونىندەگى تۇراقتى كوميسسياسى وتكىزىپ, قالالىق ستراتەگيالىق جانە بيۋدجەتتىك جوسپارلاۋ باسقارماسىنىڭ باسشىسى راسۋل ورازعۇلوۆتىڭ, ءتيىستى باسقارما باسشىلارىنىڭ باياندامالارىن تىڭدادى.
راسۋل ورازعۇلوۆتىڭ مالىمدەۋىنشە, ءۇش جىل ىشىندە بولجام بويىنشا بيۋدجەتكە 857 ملرد تەڭگە كىرىس كىرەدى. سونىڭ ىشىندە سالىق كىرىسى 851 ملرد تەڭگە بولماق. ال 2019 جىلى 270 ملرد كىرىس كىرمەك.
«ەلباسىنىڭ بيىلعى 5 قازانداعى جولداۋىنا سايكەس كەلەسى جىلدىڭ 1 قاڭتارىنان ەڭ از جالاقى 1,5 ەسەگە ءوسىپ, 28 مىڭ تەڭگەدەن, 42,5 مىڭ تەڭگەگە كوتەرىلەدى. بۇل جاعداي ءبىر جاعىنان 80 مىڭنان استام ادامنىڭ تابىسىن ارتتىرادى, ەكىنشى جاعىنان, سالىق كىرىسىن كوبەيتەدى. استانا بويىنشا 25 اەك كورسەتكىشىنەن تومەن تابىسى بار 86 مىڭ ادام تىركەلدى. ولارعا سالىق ستاۆكاسى ازايتىلادى» دەدى ر. ورازعۇلوۆ.
ونىڭ ايتۋىنشا, ءۇش جىلدىق بيۋدجەت 1 ترلن 177 ملرد 652 ملن تەڭگەنى قۇراماق. سونىڭ 413 ملرد 191 ملن تەڭگەسى 2019 جىلعا تيەسىلى. بۇل بەكىتىلگەن 2018 جىلدىڭ بيۋدجەتىنە قاراعاندا 8 پايىزعا كوپ. قالانىڭ ءۇش جىلدىق بيۋدجەتىنە وسى مەرزىم ىشىندە رەسپۋبليكالىق بيۋدجەتتەن 310 ملرد تەڭگە كولەمىندە ماقساتتى ترانسفەرتتەر كىرمەك. بۇل سوما كەلەسى جىلى 130 ملرد تەڭگەنى قۇراماق. بۇعان كەرىسىنشە, 2019 جىلى جەرگىلىكتى بيۋدجەتتەن رەسپۋبليكالىق بيۋدجەتكە 30 ملرد تەڭگە جىبەرىلەدى. بۇل بيىلعى كورسەتكىشتەن 1,4 ەسە كوپ.
وتىرىستا انىقتالعانداي, باسقارمالاردىڭ بارلىق سۇرانىستارى قاناعاتتاندىرىلعان جوق. ءماسليحات دەپۋتاتتارى مەن باسقارما باسشىلارى وسىعان نازار اۋداردى. اسىرەسە, الەۋمەتتىك جانە مادەني نىسانداردىڭ قۇرىلىسى مەن كۇردەلى جوندەلۋى ءبىراز اڭگىمە بولدى.
«تالدىقورعان قالاسىندا جاقىندا جاڭا تەاتر اشىلدى. ءبىز 20 جىلدىڭ ىشىندە ءبىر قازاق تەاترىن سالا الماي وتىرمىز. جالپى تەاتردىڭ قۇرىلىسى قاشان باستالادى؟» دەگەن سۇراقتى قويدى ءماسليحات دەپۋتاتى ميراس شەكەنوۆ.
بۇل مادەني وشاقتىڭ سالىنۋى استانانى دامىتۋدىڭ بەس جىلدىق جوسپارىنا ەنگىزىلگەن. الايدا قۇرىلىسى 2020 جىلى بىراق باستالادى. وتىرىستا وعان وسىنداي جاۋاپ بەرىلدى. قازىرگى قازاق تەاترى – ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ عيماراتى ءتيىستى تالاپقا سايكەس كەلمەيدى. ساحناداعى جارىق پەن دىبىستى رەتكە كەلتىرۋ ءۇشىن, ياعني جاڭا جابدىقتاردى الۋ ءۇشىن 340 ملن تەڭگە كەرەك.
قالالىق مادەنيەت جانە سپورت باسقارماسىنىڭ باسشىسى بولات ماجاعۇلوۆ قۋىرشاقتار تەاترى مەن «جاستار» سارايىنىڭ جاعدايى دا ءماز ەمەستىگىن ەمەۋرىنمەن جەتكىزدى. شاھارداعى ەسكى عيماراتتاردىڭ ءبىرى م.گوركي اتىنداعى مەملەكەتتىك اكادەميالىق ورىس دراما تەاترىنا تيەسىلى. بيىل ونىڭ كۇردەلى جوندەۋىنە قارجى ءبولىندى. اتالمىش تەاتر ەندى ەكى جىل بويى جوندەلىپ, ارتىستەر بەيبىتشىلىك جانە كەلىسىم سارايىندا قويىلىمدارىن قويادى. ءتورت جىل بۇرىن پايدالانۋعا بەرىلگەن «بارىس ارەنا» سپورتتىق كەشەنىنىڭ ءىشى دە توزىڭقىراعان. «قازاقستان» سپورت كەشەنى دە ءتيىستى جاعدايدا ەمەس.
مەكتەپتەر ماسەلەسى دە كۇردەلى ەكەنى بەلگىلى. «كيرپيچنىي» كەنتىندەگى №12 مەكتەپ بۇرىن بالاباقشا بولعان. اتالعان عيمارات مەكتەپكە لايىقتالماعان. ءماسليحات دەپۋتاتى زەينوللا شىبكەنوۆ مۇنىڭ جايىن ءبىلىم باسقارماسىنىڭ باسشىسى ءانۋار جانعوزيننەن سۇرادى.
«بولاشاقتا بۇل مەكتەپتى قايتادان بالاباقشاعا اينالدىرامىز. وقۋشىلاردى №80 مەكتەپكە اۋىستىرامىز. ول ءۇشىن وقۋشىلاردى تاسىمالدايتىن مەكتەپ اۆتوبۋسىن ۇيىمداستىرامىز» دەدى باسقارما باسشىسى.
سونداي-اق ول №23 مەكتەپتىڭ سپورتزالى بويىنشا ماسەلە تۋىنداپ جاتقانىن جەتكىزدى. №27 جانە №62 مەكتەپتەردى جوندەۋدەن دە تۇيتكىلدەر بارىن ايتتى. جالپى ورتا ءبىلىم بەرۋ وشاقتارىن جوندەۋدى ءبىلىم باسقارماسىنان الىپ, قالالىق ورتانى رەگەنەراتسيالاۋ باسقارماسىنا بەرۋ ماسەلەسىن كوتەردى. ءبىراز داۋ تۋدىرعان №8 مەكتەپ بويىنشا بۇل ماسەلە قاراستىرىلىپ جاتقانىن ايتتى. راسۋل ورازعۇلوۆ مەكتەپتەردى جوندەۋگە 8 ملرد تەڭگە كەرەكتىگىن قوسا كەتتى.
وتىرىستا قوعامدىق دەنساۋلىق ساقتاۋ باسقارماسىنىڭ باسشىسى كامالجان نادىروۆ, تىلدەردى دامىتۋ جانە ارحيۆ ءىسى باسقارماسىنىڭ باسشىسى تىلەۋعالي قىشقاشباەۆ, جۇمىسپەن قامتۋ جانە الەۋمەتتىك قورعاۋ باسقارماسى باسشىسىنىڭ ورىنباسارى ارتەم ءابىلدينوۆ اتالمىش باسقارمالاردىڭ مۇقتاجدىقتارىن دەپۋتاتتارعا جەتكىزدى.
وتىرىس سوڭىندا قالالىق ءماسليحات حاتشىسى جانات نۇرپەيىسوۆ ءبىر ايدان ءسال اسقاندا بيۋدجەت بەكىتىلەتىنىن ايتىپ, وعان دەيىن ءتيىستى ۇسىنىستاردى بەرۋدى ەسكەرتتى.
