بەيسەنبى كۇنى مەملەكەت باسشىسى قاسىم-جومارت توقاەۆ قالالىق ءماسليحاتتىڭ كەزەكتەن تىس وتىرىسىنا قاتىسىپ, دەپۋتاتتارعا نۇر-سۇلتاننىڭ جاڭا اكىمى لاۋازىمىنا التاي كولگىنوۆتىڭ كانديداتۋراسىن ۇسىندى. دەپۋتاتتار پرەزيدەنتتىڭ ۇسىنىسىن ءبىراۋىزدان قولدادى.
قازاقستان پرەزيدەنتى شاھار اكتيۆىمەن كەزدەسۋدە بۇعان دەيىنگى نۇر-سۇلتان قالاسىنىڭ اكىمى باقىت سۇلتانوۆتىڭ اتقارعان جۇمىسىنا جوعارى باعا بەردى. «قازاقستان رەسپۋبليكاسىنىڭ كونستيتۋتسياسىنا سايكەس, قالا اكىمى باقىت سۇلتانوۆتى قىزمەتىنەن بوساتۋ جونىندە شەشىم قابىلدادىم. الدىمەن باقىت تۇرلىحانۇلىنا وسىنداي تاريحي ءارى جاۋاپتى كەزەڭدە وزىنە ارتىلعان سەنىمدى اقتاپ, تاپسىرىلعان مىندەتتى ابىرويمەن اتقارعانى ءۇشىن ريزاشىلىعىمدى بىلدىرەمىن» دەدى مەملەكەت باسشىسى.
قاسىم-جومارت توقاەۆ قالانىڭ جاڭا اكىمىنىڭ الدىندا ماڭىزدى مىندەتتەر تۇرعانىن اتاپ ءوتتى. «نۇر-سۇلتان قالاسىنىڭ اكىمى بولىپ التاي كولگىنوۆ تاعايىندالدى. ول – ۇيىمداستىرۋشىلىق قابىلەتى مەن بىلىكتىلىگى جوعارى جاس مامان. باتىس قازاقستان وبلىسىندا بىرنەشە جىل تابىستى ەڭبەك ەتىپ, جەرگىلىكتى حالىقتىڭ الدىندا زور بەدەلگە يە بولدى. ونىڭ ءبىلىمى مەن تاجىريبەسىن ەسكەرە وتىرىپ, نۇر-سۇلتان قالاسىنىڭ اكىمى قىزمەتىنە تاعايىنداۋ تۋرالى شەشىم قابىلدادىم» دەدى مەملەكەت باسشىسى.
قازاقستان پرەزيدەنتى حالىقتىڭ ءومىر ءسۇرۋ ساپاسىن ارتتىرۋ ماسەلەسىنە ەگجەي-تەگجەيلى توقتالدى. «ازاماتتاردىڭ ءال-اۋقاتىن ارتتىرۋعا باسا ءمان بەرىلەتىن بولادى. جاقىن كۇندەرى تۇرعىنداردىڭ الەۋمەتتىك ماسەلەلەرىن شەشۋگە باعىتتالعان ماڭىزدى شەشىم قابىلدانادى. بۇل ۇدەرىستەردەن استانامىز قالىس قالماۋى كەرەك. كەرىسىنشە, الەۋمەتتىك ماسەلەلەردى شەشۋ ىسىندە الدىڭعى قاتاردا ءجۇرۋى قاجەت» دەدى قاسىم-جومارت توقاەۆ. جيىن سوڭىندا مەملەكەت باسشىسى جاڭا اكىمگە بىرقاتار ناقتى تاپسىرما بەردى.
مەملەكەت باسشىسى قالالىق اكتيۆپەن كەزدەسۋدە ەلورداداعى ەڭ تۇيتكىلدى ماسەلەنىڭ ءبىرىن قوزعادى. ول ادامداردىڭ ومىرىنە قاۋىپ توندىرەتىن قاقپاعى اشىق جاتقان قۇدىقتار ماسەلەسىنە نازار اۋداردى. «باس قالادا مۇنداي قۇدىقتاردىڭ بولۋى – ناعىز ماسقارا! ءبىز «ەۋرازيانىڭ استاناسى» دەپ اتاپ جۇرگەن قالادا ادامدار قۇدىققا ءتۇسىپ, كوز جۇمۋدا. كۇللى ۇكىمەت اكىمدىكپەن بىرگە وسى ماسەلەنى شەشە الماي وتىرعانى وكىنىشتى-اق» دەپ مالىمدەدى ق.توقاەۆ.
ەل پرەزيدەنتى جەرگىلىكتى بيلىكتىڭ بۇل ماسەلەگە نۇكتە قويۋعا جاقىن قالعانىن جەتكىزدى. «بۇل – ناعىز ماسقارا! دەمەك, قۇزىرلى ورگاندار ەل كوكەيىندەگى ماسەلەلەرمەن اينالىسۋى ءتيىس. ءبىز كوپىرتىپ كوپ ءسوز سويلەيمىز, بىراق بۇل جەردە ناقتى ءىستىڭ ناتيجەسى كەرەك. قاراپايىم ادامدار بيلىكتەن سونى كۇتەدى» دەپ قاداپ ايتتى مەملەكەت باسشىسى. سوڭعى كەزدەرى ەلوردادا بالالاردىڭ قۇدىققا قۇلاپ, مەرت بولۋ وقيعالارى بولعانى راس. وتكەن جىلدىڭ قاراشا ايىندا 13 جاسار وقۋشىنىڭ ءمايىتى تابىلدى. ەكىنشى قايعىلى وقيعا بيىل بولدى. بۇل جولى 13 جاسار ەر بالا اشىق قۇدىققا ءتۇسىپ, كوز جۇمدى.
