بيىل استانادا جاڭا تەمىرجول ۆوكزالى كەشەنى جۇمىسىن باستايدى. وسىعان وراي «استانا» كونتسەرت زالىندا بوس جۇمىس ورىندارى جارمەڭكەسى ءوتتى. شارا بارىسىندا «قازاقستان تەمىر جولى» ۇك» اق جانە ەلوردالىق حالىقتى جۇمىسپەن قامتۋ ورتالىعى اراسىندا ىنتىماقتاستىق تۋرالى كەلىسىمگە قول قويىلدى.
قوس تاراپتىڭ رەسمي تۇردە كەلىسىمگە قول قويۋ راسىمىنە «استانا» جاڭا تەمىرجول ۆوكزالى كەشەنىنىڭ ديرەكتورى دىنمۇحامەد قۇسايىنوۆ, قالالىق جۇمىسپەن قامتۋ, ەڭبەك جانە الەۋمەتتىك قورعاۋ باسقارماسىنىڭ باسشىسى ەرمەك وسپانوۆ جانە حالىقتى جۇمىسپەن قامتۋ ورتالىعىنىڭ ديرەكتورى ولجاس وماروۆ قاتىستى.
– جاڭا تەمىرجول ۆوكزالى 1 ماۋسىمدا تولىققاندى پايدالانۋعا بەرىلەدى. سول ۋاقىتتان باستاپ قازاقستاننىڭ بارلىق ايماقتارىنا باعىتتار اشىلادى. تاۋلىگىنە 56 پويىز قاتىنايدى. بۇگىن ءبىز قىزمەتكەرلەر جيناۋ ماقساتىندا ەلوردا اكىمدىگىنىڭ حالىقتى جۇمىسپەن قامتۋ باسقارماسىمەن بىرلەسىپ, بوس جۇمىس ورىندار جارمەڭكەسىن وتكىزىپ جاتىرمىز. التى قاباتتان تۇراتىن «استانا» تەمىرجول ۆوكزالى كەشەنىنىڭ بۇل فيليالىندا شتاتتار سانى 217 ادامدى قۇرايدى. ال نەگىزگى قۇرامدا 190 ادام جۇمىس ىستەيدى. كادرلاردى ىرىكتەگەندە ۆوكزال جانە پەررون كەزەكشىلەرى, انىقتامالىق-اقپاراتتىق ءبولىمنىڭ قىزمەتكەرلەرى, ديكتورلار سەكىلدى ماماندارعا باسىمدىق بەرىلەدى. قىزمەتكەرلەردىڭ اعىلشىن ءتىلىن بىلگەنى دە ماڭىزدى. ءبىزدىڭ جۇمىسىمىز – جولاۋشىلاردى كۇتىپ الىپ-شىعارىپ سالۋ, جايلى جاعداي جاساۋ. جاڭا ۆوكزال «ەكسپو» كورمەسىنە باستايتىن استانانىڭ قاقپاسى بولماق, – دەدى دىنمۇحامەد قۇسايىنوۆ.
ال حالىقتى جۇمىسپەن قامتۋ ورتالىعىنىڭ ديرەكتورى ولجاس وماردىڭ ايتۋىنشا, بۇل وتكىزىلىپ جاتقان جارمەڭكە – بيىلعى ءۇشىنشى شارا. جىلدىڭ اياعىنا دەيىن تاعى التى جارمەڭكە ۇيىمداستىرۋ جوسپارلانعان.
– ءبىز «استانا» جاڭا تەمىرجول ۆوكزال كەشەنىمەن ىنتىماقتاستىق تۋرالى كەلىسىمگە قول قويدىق. بۇل باستاما ءبىراز جۇرتتى جۇمىسپەن قامتۋعا, مامانداردى قايتا دايارلاۋعا سەپتىگىن تيگىزەدى. تەك جاڭا ۆوكزالدىڭ ءوزى 200-گە جۋىق جۇمىس ۇسىنىپ وتىر. بۇعان قوسا, جارمەڭكەگە تاعى 60-قا جۋىق جۇمىس بەرۋشى ۇيىمدار قاتىسىپ جاتىر. ولار 1000-عا تارتا مامان ىزدەيدى. جۇمىسپەن قامتۋ ورتالىعىنا جىل باسىنان بەرى 3 701 ادام جۇگىندى. ولاردىڭ جارتىسى جۇمىسقا ورنالاستىرىلدى, – دەدى ول.
بۇرىنعى «كونگرەسس-حولل» عيماراتىنا ەكى قولعا ءبىر كۇرەك ىزدەپ كەلگەن جۇرتتىڭ قاراسى قالىڭ بولدى. ولاردىڭ ىشىندە تەمىرجول سالاسىندا تالاي جىل ەڭبەك ەتكەندەر دە بار. سولاردىڭ ءبىرى – بەرىك ابيەۆ. ول بايلانىسشى بولىپ 20 جىلدان استام ۋاقىت جۇمىس ىستەپتى. بۇگىندە جۇمىستان قىسقارتىلىپ قالعان ەكەن. ەندىگى ءۇمىتى وسى ۆوكزال ەكەنىن جاسىرمادى. وعان, ارينە, مول تاجىريبەسى ىقپال ەتەتىنىنە سەنىمدى.
جۇمىس ىزدەپ بۇل جارمەڭكەگە ارنايى كەلگەندەردىڭ اراسىندا وقۋىن ەندى بىتىرگەن تۇلەكتەر دە بار ەكەن.
– مەن وسى استاناداعى كولىك جانە كوممۋنيكاتسيا كوللەدجىن تامامداعانمىن. ماماندىعىم – جولاۋشىلار تاسىمالىن ۇيىمداستىرۋ. ديپلوم بويىنشا ءالى ەش جەردە جۇمىس ىستەپ كورگەن جوقپىن. جاڭا ۆوكزال ءوز سالامدا ەڭبەك جولىن باستاۋىما جاقسى مۇمكىندىك بولىپ تۇر. جۇمىس بەرۋشىلەردىڭ ۇدەسىنەن شىعامىن دەپ ۇمىتتەنەمىن, – دەدى ابىلايحان ابدىۋاقاتوۆ ەسىمدى قالانىڭ جاس تۇرعىنى.
كوپ ۇزاماي ىسكە قوسىلاتىن جاڭا تەمىرجول ۆوكزالىنا جۇمىسشىلار تارتۋ وسىلايشا قارقىندى جۇرگىزىلىپ جاتىر. ىرىكتەلگەن ماماندار جۇمىسقا كىرىسپەستەن بۇرىن جاڭا ورىنعا ۇيرەنىسۋى ءۇشىن ءساۋىر ايىنان باستاپ الدىن الا وقىتۋ شارالارى ۇيىمداستىرىلادى.
ورىنبەك وتەمۇرات,
«استانا اقشامى»
