الماتى اۋدانىنداعى №44 مەكتەپتىڭ جانىنان 540 ورىنعا ارنالعان جاڭا عيمارات اشىلدى. ءىس-شارا ءبىلىم ورداسىنىڭ جارتى عاسىرلىق مەرەيتويىنا تۇسپا-تۇس كەلدى.
ءىس-شاراعا قالالىق ءماسليحات دەپۋتاتتارى, ءبىلىم سالاسىنىڭ ماماندارى مەن اۋدان تۇرعىندارى قاتىستى.
– 1972 جىلى 640 ورىنعا ارنالعان مەكتەپ ەسىگىن اشتى. ەلوردانىڭ حالىق سانى جىل سايىن كوبەيىپ, مەكتەپكە قاجەتتىلىك ارتتى. وسىنى ەسكەرىپ, 2000 جىلداردان قالا باسشىلارىنا ءوتىنىش بىلدىرە باستادىم. وسى ارمانىم ىسكە اسۋىندا شاھار باسشىسى جەڭىس قاسىمبەك قامقورلىق تانىتتى. «NAK» قۇرىلىس كومپانياسىنىڭ باسشىسى سەرىك قاسىمبەكوۆ بەرەكەلى ىسكە دەم بەردى. ەل دەگەن ازاماتتارعا العىس بىلدىرەمىن, – دەپ اعىنان جارىلدى اشىلۋ سالتاناتىندا مايرا قورازوۆا.
بۇگىندە مەكتەپتە 1027 وقۋشى ەكى اۋىسىمدا وقيدى. ارينە, شاكىرتتەردىڭ ساپالى ءبىلىم الۋى ءۇشىن كەڭ دە جارىق عيماراتقا سۇرانىس بار. سوندىقتان مەكتەپتىڭ قوسىمشا عيماراتى اشىلۋى, وقۋشىلارعا ساپالى ءبىلىم بەرۋدىڭ ءبىر تەتىگى دەپ قابىلدادىق.
قالالىق ءبىلىم باسقارماسى جالپى ورتا ءبىلىم بەرۋدىڭ مازمۇنى مەن ادىستەمە ءبولىمىنىڭ باسشىسى اسىل امانكەلديەۆا:
– ءبىلىم ورداسى ساپالى ءبىلىم بەرۋ تۇرعىسىنان كەمشىن ەمەس بولاتىن, بىراق ەكى اۋىسىمدا وتكىزىلەتىن وقۋ پروتسەسىندە قيىنشىلىقتار بولعانى شىندىق. سوندىقتان بولار, قالا اكىمدىگى اۋدان تۇرعىندارىنىڭ سۇرانىسىن جەرگە تاستاماي جەرگىلىكتى بيۋدجەتتەن قارجى ءبولىپ, ۋاقىت تالابىنا ساي عيماراتتى سالدىردى. عيمارات پرەزيدەنتى قاسىم-جومارت توقاەۆتىڭ تاپسىرماسىمەن جۇزەگە اسىرىلىپ جاتقان «جايلى مەكتەپ» ۇلتتىق جوباسىنىڭ تالاپتارىنا ساي سالىندى. ەندى مەكتەپتىڭ بۇرىنعى عيماراتىندا باستاۋىش سىنىپ وقۋشىلارى ءبىلىم السا, جاڭا عيماراتتا جوعارعى سىنىپقا ارنالادى, – دەدى.
مەكتەپ ديرەكتورى ءلاززات كۇلتاەۆا قوناقتاردى مەكتەپتىڭ جاڭا عيماراتىمەن تانىسۋعا شاقىردى. حيميا, فيزيكا, بيولوگيا كابينەتىندە تاجىريبەلىك ساباق وتكىزۋگە ىڭعايلى ەتىپ قۇرىلىپتى. باستىسى, قىز بالالارعا ارنالعان تىگىن جانە اسپازدىق كابينەتى, ۇلدارعا ارنالعان شەبەرحانا بار. 570 شارشى مەتردى قامتيتىن سپورت زال, اۋقىمدى كىتاپحانا, اسحانا قوسىلىپتى.
ماناپ ادىرەشەۆ, قالالىق ارداگەرلەر كەڭەسىنىڭ مەدياتوبىنىڭ
مۇشەسى
