جاقىندا تۇڭعىش پرەزيدەنت – ەلباسى نۇرسۇلتان نازارباەۆتىڭ «شتريحي ك پورترەتۋ» دەرەكتى فيلمىنە بەرگەن سۇحباتىنا نەگىزدەلىپ جازىلعان جاڭا كىتاپ جارىققا شىعادى. بۇل تۋرالى ەلباسىنىڭ ءباسپاسوز حاتشىسى ايدوس ۇكىباي مالىمدەدى. «الداعى كۇندەرى ەلباسىنىڭ «شتريحي ك پورترەتۋ» دەرەكتى فيلمىنە بەرگەن سۇحباتى نەگىزىندە كىتاپ جارىققا شىعادى. كىتاپقا جوبانىڭ تەلەۆيزيالىق نۇسقاسىندا كورسەتىلمەگەن ماتەريالدار ەنگىزىلگەن» دەپ جازدى ول Twitter-دەگى پاراقشاسىندا.
كىتاپتىڭ اۆتورى – نۇرسۇلتان نازارباەۆتان سۇحبات العان جۋرناليست ايگۇل ءادىلوۆا. «شتريحي ك پورترەتۋ» – نۇرسۇلتان نازارباەۆتىڭ ءومىرى مەن قىزمەتىنە ارنالعان كوپ ءبولىمدى دەرەكتى فيلم. فيلم ەلباسىنىڭ ەكسكليۋزيۆتى سۇحباتى نەگىزىندە تۇسىرىلگەن. ءبىرىنشى ءبولىم 1 جەلتوقسان – قازاقستاننىڭ تۇڭعىش پرەزيدەنتى كۇنى كورەرمەن نازارىنا ۇسىنىلدى.
«نۇرسۇلتان نازارباەۆ مەملەكەت باسشىسى قىزمەتىن اتقارعان كەزدە الەمنىڭ 75 ەلىنە رەسمي ساپارمەن بارىپ, شەتەل پرەزيدەنتتەرىمەن جانە ۇكىمەت باسشىلارىمەن 1500-دەن اسا كەزدەسۋلەر وتكىزگەن. تەلەۆيزيالىق سۇحباتقا ەنگىزىلمەي قالعان اڭگىمەنىڭ ءبىرازى وسى كىتاپتا ايتىلادى. سۇحباتتا نۇرسۇلتان نازارباەۆ ۇلكەن ساياساتتىڭ شىمىلدىعىنىڭ ارعى جاعىنداعى قۇپيالارمەن ءبولىسىپ, تاۋەلسىز ەلدى قالىپتاستىرۋ جولىنداعى ماسەلەلەردى اشىق اڭگىمەلەيدى. «شتريحي ك پورترەتۋ» جاقىندا «مەلومان» دۇكەندەر جەلىسىندە ساتىلا باستايدى. تاۋەلسىز ەلدىڭ تاريحىن تەرەڭىرەك تانىپ-بىلگىسى كەلەتىن ءار قازاقستاندىقتىڭ ۇيىندە وسى كىتاپ بولۋعا ءتيىس دەپ ويلايمىن» دەپ جازدى ايگۇل ءادىلوۆا كىتاپ تۋرالى.
