22 قىركۇيەك كۇنى استانادا ءىىى حالىقارالىق «جىبەك جولى» فەستيۆالى باستالدى. ەكى ايعا جۋىق ۋاقىتقا سوزىلاتىن فەستيۆال اياسىندا «استانا-وپەرا» مەملەكەتتىك وپەرا جانە بالەت تەاترى ساحناسىندا ءارالۋان قويىلىمدار قويىلادى. سونىڭ العاشقىسى – اتالمىش تەاتردىڭ ءتورتىنشى ماۋسىمىن اشقان ا. جۇبانوۆ پەن ل. ءحاميديدىڭ«اباي» وپەراسى بولدى.
شەتەلدىك رەجيسسەر دجانكارلو دەل موناكو (يتاليا) مەن بەلگىلى ديريجەر الان بورىباەۆ قويعان ۇلتتىق سپەكتاكل اتالمىش تەاتر رەپەرتۋارىنداعى شوقتىعى بيىك تۋىندى سانالادى. ونى ۇستىنە قازاق مۋزىكاسىن كاسىبي دەڭگەيگە كوتەرگەن كومپوزيتورلار – احمەت جۇبانوۆ پەن لاتيف ءحاميديدىڭ تۋعانىنا بيىل 110 جىل تولىپ وتىر. سوندىقتان «استانا-وپەرا» تەاترىنىڭ جاڭا ماۋسىمىنىڭ ناق وسى تۋىندىمەن اشىلۋىندا ۇلكەن ءمان جاتىر.
جالپى, ءار قازاق ءۇشىن اباي – اسقار شىڭ. ءسوزىمىزدىڭ باسىن كوبىنەسى ابايمەن باستايتىنىمىز دا راس. اباي تۇلعاسىنا قاتىستى «ۇلى» دەگەن تىركەستى دە شىن مانىندە سولاي بولعاننان كەيىن ۇيالماي قولدانا بەرەمىز. ال اباي فيلوسوفياسىنىڭ تەرەڭىنە بويلاي المايتىن كەزدەرىمىز كوپ. وندايدا دانىشپاننىڭ شىعارمالارىن وقۋدان بولەك ونى سيپاتتايتىن ونەر تۋىندىلارىنا جۇگىنەمىز.
«اباي» وپەراسىنا كەلسەك, قويىلىم دەكوراتسياسى يتالياندىق سۋرەتشى-ستسەنوگراف ەتسيو فريدجەريدىڭ يدەياسىنان تۋىندادى. ال كەيىپكەرلەردىڭ كوستيۋمدەرى ونىڭ زايىبى فرانكو سكۋارچاپينونىڭ قولىنان شىققان. ءبىرىنشى اكتىدى ابايدىڭ شاڭىراعى كورىنگەندە, ساحنانى ءوز ءىسىنىڭ ناعىز شەبەرلەرى بەزەندىرگەنىن اڭعاراسىز. ال ارتىستەر شىعا كەلگەندە ولاردىڭ كوستيۋمدەرى دە كورەرمەندەردى سۇيسىنتەدى. وپەرادا ابايدىڭ ءرولىن, ياعني باس پارتيانى قازاقستاننىڭ ەڭبەك سىڭىرگەن قايراتكەرى جانات شىبىقپاەۆ ورىندايتىنىن ايتا كەتەيىك. اجار پارتياسى ارقىلى قازاقستاننىڭ ەڭبەك سىڭىرگەن قايراتكەرى سالتانات احمەتوۆانىڭ ونەرى كورىنەدى. باسقا ارتىستەردىڭ رولدەرىن ايتساق, قازاقستان مەن تاتارستاننىڭ ەڭبەك سىڭىرگەن قايراتكەرى نۇرلان بەكمۇحامبەتوۆ (ايدار), ارمەنيانىڭ حالىق ءارتىسى بارسەگ تۋمانيان (سىرتتان), بەيىمبەت تاڭارىقوۆ ء(ازىم), ەۆگەني چاينيكوۆ (جيرەنشە), سالتانات مۇراتبەكوۆا (قارلىعاش), تالعات عالەەۆ (كوكباي), نارىمبەت – رامزات بالاكيشيەۆ (نارىمبەت), نۇرلىبەك قوسبارماقوۆ (مەس) بولىپ جالعاسىپ كەتە بەرەدى.
وپەرا فينالى كورەرمەنگە ەرەكشە اسەرلەندىرەدى. شىعارما اياقتالعاندا كوككە جىبەرىلەتىن قىراندى جاي قۇس ەمەس, اسپانعا سامعاعان اباي رەتىندە ەلەستەتەسىز. ونى كورىپ, ارقالى اقىن سەرىك اقسۇڭقارۇلىنىڭ «ديپلومسىز اباي اسپانعا جونەپ جۇرتىندا…» دەگەن ولەڭ جولدارى ەسكە تۇسەدى ەكەن. «استانا-وپەرا» تەاترىنىڭ ءىىى ماۋسىمى دا ءدال وسى تۋىندىمەن اشىلعانىن ايتا كەتەيىك. دەمەك, ونەر ۇجىمى «ابايمەن» جۇمىسىن باستاۋدى يگى داستۇرگە اينالدىردى.
امانعالي قالجانوۆ
