«استانا وپەرا» تەاترىنىڭ ءVى ماۋسىمى قازاقستاننىڭ ەڭبەك سىڭىرگەن ءارتىسى, قر مەملەكەتتىك سىيلىعىنىڭ لاۋرەاتى مايرا مۇحامەدقىزىنىڭ «استانا – اسىل ارمانىم» كونتسەرتىمەن اشىلدى. استانانىڭ 20 جىلدىعىنا ارنالعان كونتسەرتتە ايگىلى انشىمەن بىرگە تۇركيا, گەرمانيا, يتاليا ونەرپازدارى ونەر كورسەتتى.
كەزىندە قازاقستاننىڭ ەڭبەك سىڭىرگەن قايراتكەرى, بەلگىلى ديريجەر الان بورىباەۆ گەرمانيادا نەمىس تىلىندە احمەت جۇبانوۆ پەن لاتيف ءحاميديدىڭ «اباي» وپەراسىن قويدى. وندا ايداردىڭ پارتياسىن رودريگو پورراس گارۋلو ورىندادى. كونتسەرتكە قاتىسقان شەتەلدىك قوناقتاردىڭ اراسىندا ول دا بولدى.
ايتپاقشى, 8 قاراشا كۇنى «اباي» وپەراسى گەنۋيانىڭ «كارلا فەليچە» تەاترىندا ساحنالانباق. «استانا وپەرا» تەاترى ديرەكتورىنىڭ ءبىرىنشى ورىنباسارى تولەۋبەك الپيەۆتىڭ سوزىنشە, بۇل رۋحانياتىمىز ءۇشىن ۇلكەن وقيعا, مادەنيەتىمىزدىڭ زور جەتىستىگى بولماق.
ال ماۋسىماشار كونتسەرتتە تۇركيالىق ءانشى مۇرات قاراحان, ارمەنيانىڭ حالىق ءارتىسى بارسەگ تۋمانيان مايرا مۇحامەدقىزىمەن دۋەتتە دە, جەكەلەي دە ءان سالدى. يتاليالىق يۆان چامپا مەن قازاقستاننىڭ ەڭبەك سىڭىرگەن قايراتكەرى ابزال مۇحيتدينوۆ ديريجەرلىك پۋلتتە تۇرىپ, سيمفونيالىق وركەسترگە جەتەكشىلىك ەتتى.
ارينە, كورەرمەننىڭ كوزى وسى كەشتىڭ يەسى مايرا مۇحامەدقىزىندا بولدى. قازاق ءانشىسى «گۇلدەرايىم», «جايدارمان» سەكىلدى حالىق اندەرىنەن باستاپ, كلاسسيكالىق ونەردىڭ جاۋھارلارى سانالاتىن تۋىندىلاردى شىرقادى. سونىڭ ىشىندە كۇردەلى وپەرالىق پارتيالار بولىپ سانالاتىن ي.كالماننىڭ «سيلۆا» وپەراسىنداعى سيلۆانىڭ ارياسىن, د.ۆەرديدىڭ «ترۋبادۋر» وپەرالىق شىعارماسىنداعى لەونورانىڭ كاۆاتيناسىن, ت.ب. اۆتورلاردىڭ تۋىندىلارىن, سونىڭ ىشىندە قازىرگى زامان كومپوزيتورلارىنىڭ اندەرىن دە سالدى.
يسپانيانىڭ سارسۋەلا دەپ اتالاتىن مۋزىكالىق-درامالىق جانرى ارتىستەن ءان سالۋمەن قاتار ديالوگتاردى, بيلەردى تالاپ ەتەدى. جانىبەك ساپاراەۆ بۇل جانردا مايرا مۇحامەدقىزىن گيتارامەن سۇيەمەلدەپ, ءانشىنىڭ بۇل ونەرىنە كوپشىلىك قول سوقتى.
جالپى جاڭا ماۋسىمدى انشلاگ تۋدىرعان وسىنداي كونتسەرتپەن اشقان «استانا وپەرا» تەاترى الدا دا كورەرمەندەردى جالىقتىرمايتىن قىزىقتى پرەمەرالار مەن كەشتەردى وتكىزەمىز دەپ وتىر.
