ءمولدىر مىرزاقاسىموۆا,
«Kazakh TV» ارناسىنىڭ پروديۋسەرى:
– ءمولدىر قۋاندىققىزى, 2002 جىلدىڭ 25 قازانىندا «حابار» اگەنتتىگى جانىنان «Caspionet» تەلەارناسى اشىلدى. بىلتىردان بەرى «Kazakh TV» بولىپ ءوزگەرگەن تەلەارنانىڭ تۋعان كۇنى قۇتتى بولسىن! ارنانىڭ بۇگىنگى تىنىس-تىرشىلىگى قانداي؟
– ءيا, الەمنىڭ 100-گە جۋىق ەلىندە 800 ميلليوننان استام كورەرمەنى بار قازاقستاننىڭ تۇڭعىش سپۋتنيكتىك تەلەارناسى 10 جىلدان استام ۋاقىت ەفيردە. وتكەن جىلدىڭ 1 قىركۇيەگىنەن باستاپ «Kazakh TV» بولىپ وزگەرتىلگەن تەلەارنا بۇگىنگى اقپارات كەڭىستىگىندە ءوزىنىڭ كوزقاراسىن ايقىنداپ, تاۋەلسىز ەلىمىزدى شەتەلگە ناسيحاتتاۋدا, جاعىمدى ءيميدجىن قالىپتاستىرۋعا ەسەلى ەڭبەك ەتۋدە.
– باعدارلامالار ءوندىرىسى ءبولىمىنىڭ پروديۋسەرىسىز. جاڭا ماۋسىمداعى جاڭالىقتارمەن بولىسسەڭىز…
– جاڭا ماۋسىمدا كورەرمەن نازارىنا ونداعان جاڭا تەلەجوبالار ۇسىنامىز. ناقتىراق ايتسام, «Central Asian: report» – اقپاراتتىق-ساراپتامالىق جوبا. بۇل ورتا ازيا ايماعىنداعى ءبىر اپتا ىشىندە ورىن العان ماڭىزدى وقيعالارعا شولۋ. «Kazakhstan: International Vectors» – قازاقستان الەمدىك ساياسي الاڭدا, كوپسالالى سىرتقى ساياسي باعىتتىڭ جەتىستىكتەرى, «EXPO 2017» – الەمدەگى ەڭ بەدەلدى كورمەلەردىڭ ءبىرىن لايىقتى قابىلداۋعا قازاقستاننىڭ ءازىرلىگى جونىندە اپتا سايىنعى ەسەپ. «Discovering Kazakhstan» – كولەمى بويىنشا الەمدە 9-ورىندا تۇرعان مەملەكەتتىڭ شەكسىز دالاسىن شەتەلدىك جۋرناليست ارالايدى. ايشىقتى اسەرلەرىمەن, كوزقاراسىمەن ءبولىسەدى. «ادەبيەت الەمى» اتتى جاڭا جوبادا وتاندىق اقىن-جازۋشىلاردىڭ شىعارماشىلىعىن ناسيحاتتايمىز. قازاق تىلىندەگى تاعى ءبىر ءتول باعدارلاما – «ۇلتتىق ەنتسيكلوپەديا». اتالمىش حاباردا حالقىمىزدىڭ سالت-ساناسى, داستۇرى تەرەڭ قوزعالىپ, ۇلتىمىزدىڭ تەك وزىنە عانا ءتان قۇندىلىقتار تۋرالى ايتىلادى. ءبىزدىڭ ەلدىڭ تاريحي-مادەني مۇراسى مەن وركەنيەتتەر قۇپياسىن «Heritage» جوباسىنان كورسەتەمىز. ال «Kazakhstan in Fates» – قازاق جەرىنە تابانى ءتيىپ, وسى كيەلى مەكەننەن ۇلى ىستەرگە شابىت العان, الەم تاريحىندا ايرىقشا ورىن العان ادامدار تۋرالى باعدارلاما. سونىمەن قاتار, شەتەلدە بىرنەشە جىل تۇرىپ ەلگە قايتا ورالعاندار – «East Or West Home Is Best» جوباسىنىڭ كەيىپكەرلەرى بولا الادى. رەسپۋبليكانىڭ كوپۇلتتى قوعامى تۋرالى «اكتسەنت» باعدارلاماسى, عىلىمداعى جەتىستىكتەر تۋرالى «Infinite Science» جوباسى اشىلىپ وتىر. «Astana – سity Of The World» جوباسى ارقىلى كورەرمەن ساۋلەت ونەرىنىڭ الدىڭعى قاتارلى جانە ايرىقشا ۇلگىلەرىمەن, ەلوردانىڭ قايتالانباس اسەم بەينەسىمەن تانىسسا, «Travel Guide» باعدارلاماسىنان قازاقستاننىڭ كەڭ بايتاق جەرى تۋرالى ماعلۇمات الۋعا بولادى. جالپى, جاڭا ماۋسىمدا كورەرمەندى قۋانتار وسىنداي ءدۇنيەلەرىمىز بار.
– شىنىندا قىزىقتى جاڭا جوبالار كوپ ەكەن. جالپى, «حابار» اگەنتتىگى «Euronews Network» بىرلەستىگىنىڭ قۇرامىنا كىرگەنىن بىلەمىز. بۇل بايلانىستىڭ سالماعى قانداي؟
– بيىل جاز ايىندا پاريج قالاسىندا تاۋلىك بويى حابار تاراتاتىن اقپاراتتىق «Euronews» ارناسىنىڭ اتقارۋشى كەڭەس ءتوراعاسى مايكل پيتەرس, «حابار» اگەنتتىگىنىڭ باسقارما توراعاسى ايدوس ۇكىباەۆ جانە «Kazakh TV» تەلەارناسىنىڭ ديرەكتورى انيسا بەردينا «حابار» اگەنتتىگىنىڭ «Euronews Network» ءبىرلەستىگىنىڭ قۇرامىنا كىرۋ تۋرالى ەكىجاقتى كەلىسىمگە قول قويدى. حالىقارالىق اقپارات كەڭىستىگىندە «Euronews» تەلەۆيزيالىق حولدينگىمەن ىنتىماقتاستىق ورناتۋعا مۇددەلىلىك تانىتۋ – ۋاقىت تالابى. «Euronews» ءۇشىن قازاقستان مەن ورتالىق ازيانىڭ ساپالى تۆ-كونتەنتى تارتىمدى بولىپ تۇر. سوندىقتان ەۋروپالىق ءارىپتەستەرىمىز ءوزارا ىنتىماقتاستىق تۋرالى باستامانى ىقىلاسپەن قابىل العانىن ايتقىم كەلەدى.
– اتالمىش كەلىسىم قانداي مۇمكىندىكتەرگە جول اشادى؟
– «Euronews» – 13 تىلدە الەمدىك وقيعالاردىڭ بەينە حرونيكاسىن جانە اۋديو-تۇسىنىكتەمەلەردى بىرىكتىرەتىن, تاۋلىك بويى حابار تاراتاتىن اقپاراتتىق تەلەارنا.
ونىڭ كابەلدىك, سپۋتنيكتىك جانە ەفيرلىك حابار تاراتۋى الەمنىڭ 150-دەن استام ەلىندە 350 ميلليون ءۇيدى قامتيدى. وسى كەلىسىم ءناتيجەسىندە «Euronews»-ءتىڭ كاسىبي كومانداسى دايىنداعان جاڭالىقتار كونتەنتىن, ءتۇرلى تاقىرىپتى قامتيتىن ساپالى ماتەريالدارىن پايدالانۋعا ءمۇمكىندىگىمىز مول.
تاعى ءبىر ايتارىم, «Kazakh TV» تەلەارناسىنىڭ جۋرناليستەرى ەندى «Euronews» ءۇشىن ماتەريالدار دايىنداپ ءجۇر. ماسەلەن, جۋىرداعانا «Euronews» تەلەارناسىنان ەلوردادا اشىلعان «استانا وپەرا» مەملەكەتتىك وپەرا جانە بالەت تەاترى تۋرالى سيۋجەت بەرىلدى.
– «Kazakh TV» الەمگە تارايتىن ارنا. شەتەلدەگى قازاقتارمەن بايلانىس قانشالىقتى جولعا قويىلعان؟
– ارينە, بۇگىنگى تاڭدا الەمنىڭ 35 ەلىندە ءتورت ميلليوننان ارتىق قانداستارىمىز تۇرادى عوي. الىستاعى اعايىنمەن ءبىز ۇنەمى بايلانىستامىز, جاڭا باعدارلامالار تۋرالى ولاردىڭ پىكىرلەرىن ءبىلىپ, ۇسىنىستارىن قابىلداپ, حات جازىسامىز. جىراقتا جۇرگەن قانداستارىمىزدىڭ تىنىس-تىرشىلىگى تۋرالى باياندايتىن «اعايىن» اتتى باعدارلامامىز بار.
گۇلميرا ايماعانبەت
