كەڭەس زامانىنداعى سۇر كويلەك پەن اق فارتۋكتىڭ ۋاقىتى ءوتتى. ودان بەرىدە ءار مەكتەپ ءارتۇرلى فورما ويلاپ تاۋىپ, وقۋشىلار ءتۇرلى شالبارلار مەن قىسقا يۋبكالار, الاباجاق كەۋدەشەلەر كيىپ كەتتى. ولاردىڭ وقۋشى ەكەنىن اجىراتا الماي قالاتىن كەزدەر بولدى. وسىعان دەيىن مينيسترلىك رەسمي تۇردە مىندەتتەمەگەندىكتەن, جاڭا باستامانى جۇزەگە اسىرۋعا قۇلشىنىس از بولعان ەدى. الەۋمەتتىك تەڭسىزدىكتى ايقىن اشكەرەلەپ تۇراتىن بۇل ماسەلەگە بيىل نۇكت قويىلدى. جاڭا وقۋ جىلىنان باستاپ ەلىمىزدەگى بارلىق مەكتەپتەر بىرىڭعاي مەكتەپ فورماسىنا كوشەدى. استانا بۇل باستامانى ءبىرىنشى بولىپ باستاپ كەتتى.
1 قىركۇيەكتە استانالىق وقۋشىلار مەكتەپكە بىرىڭعاي كيىم ۇلگىسىندە بارادى. قالالىق ءبىلىم باسقارماسى فورمانىڭ ءتۇسى, ۇلگىسى مەن ماتاسىنىڭ ساپاسى كورسەتىلگەن نۇسقاۋلىقتى بارلىق مەكتەپتەرگە جولداپ, بۇل جولداعى جۇيەلى جۇمىستاردى باستاپ كەتتى. جاڭا وقۋ جىلىنان باستاپ استاناداعى بارلىق مەكتەپ وقۋشىلارى قويۋ كوك ءتۇستى فورما كيەدى. ايتا كەتۋ كەرەك, وقۋشىلار بۇل كيىم ۇلگىسىنە بىرتىندەپ كوشەدى. ءبىرىنشى سىنىپ وقۋشىلارى ءبىرىنشى بولىپ وسى فورمانى الۋ كەرەك. ال وزگە سىنىپ وقۋشىلارى قويۋ كوك ءتۇستى مەكتەپ كيىمىن قولدانىستاعى مەكتەپ فورمالارى ەسكىرگەننەن كەيىن بارىپ السا بولادى.
ءادىل شوراەۆ, №65 ورتا مەكتەپتىڭ ديرەكتورى:
– بىرىڭعاي مەكتەپ فورماسىنا كوشۋ وتە ءتيىمدى. اسىرەسە, بۇگىنگىدەي ۋاقىتتا الەۋمەتتىك تەڭسىزدىك, ءدىني پىكىر مەن ازاماتتىق پىكىردىڭ سانالۋاندىعى ورىن الىپ, رۋح تارازىسىنىڭ تەڭسەلىپ تۇرعان ۋاقىتىندا قاي ىستە دە بىركەلكىلىك پەن بىرىڭعايلىلىق قاجەت دەپ ويلايمىن.
وسىلايشا, ءبىر ءتۇستى مەكتەپ فورماسىنا كەزەڭ-كەزەڭىمەن كوشۋ كوزدەلىپ وتىر. ۇلدارعا ارنالعان مەكتەپ كيىمىنىڭ جيىنتىعىندا پيدجاك, جيلەت, شالبار, مەرەكەلىك اق كويلەك, كۇندەلىكتى كويلەك, توقىما كەۋدەشە, ۆودولازكا بار. ەرەجەگە ساي, ەڭ كەم دەگەندە كويلەك, جيلەت پەن شالبار بولۋى ءتيىس. قىزدارعا ارنالعان تولىق جيىنتىقتا پيدجاك, جيلەت, بەلدەمشە, كلاسسيكالىق بلۋزكا, توقىما كەۋدەشە, سارافان, ۆودولازكا بار. مەكتەپ فورمالارىن ءبىر-بىرىنەن اجىراتاتىن ءار ءبىلىم وشاعىنىڭ ءوز بەلگىلەرى بولادى. ولار پيدجاكقا جانە جيلەتكە تىگىلەدى. مەكتەپتەر بۇل كيىمدەردى قۇجاتتا كورسەتىلگەن تالاپتارعا ساي ەتىپ تىگىپ بەرەتىن مەكەمەنى وزدەرى تاڭدايدى.
گۇلنۇر ورالباەۆا, اتا-انا:
– ءوزىمنىڭ 5 بالام بىردەي مەكتەپكە بارادى. ولاردىڭ بارلىعىنا بىردەي جاڭا فورما الۋعا جاعدايىم كەلمەيدى. بىراق, مەكتەبىمىز ولاي مىندەتتەپ وتىرعان جوق. بۇرىنعى فورمامىز ەسكىرگەننەن كەيىن, جاڭاسىن الساق تا بولادى ەكەن. جالپى بۇل باستاما مەنى قاتتى قۋانتتى. ءبىر قالانىڭ ىشىندە بىرنەشە رەت كوشىپ جۇرە بەرەتىن قازاقپىز عوي. ەندى بالامىز قانداي مەكتەپتە وقىسا دا بىرىڭعاي مەكتەپ فورماسى ارقىلى, بۇل ماسەلەگە باس اۋىرتپايتىن بولدىق.
قىزدارعا ارنالعان شالبارلار ەركىن تىگىلگەن جانە ۇزىندىعى بويىنشا توبىقتى جاۋىپ, يۋبكانىڭ ۇزىندىعى تىزەدەن 5 سم-دەن جوعارى بولماۋى كەرەك. بۇل كيىمدەردى بالالار كيەتىندىكتەن ماتانىڭ ساپاسىنا دا ءمان بەرۋ كەرەك. مەكتەپ فورماسىنىڭ ماتاسى رەتىندە جارتىلاي ءجۇن جانە ماقتا, كيىسكە ءتوزىمدى, انتيباكتەريالدىق, انتيميكروبتىق جانە انتيستاتيكالىق قاسيەتتەرى بار ماتالار قولدانىلادى. كيىمنىڭ 75-85 پايىزى تابيعي ماتالاردان تۇرۋى كەرەك. ونىڭ قىرتىسىن بولدىرماۋ ماقساتىندا سينتەتيكالىق قوسپالاردىڭ 15-25 پايىزى بار ماتالار ۇسىنالادى.
گۇلجان
راحمان
