جاڭا ءتاسىل جۇمىستى جەڭىلدەتتى

استانادا وتكەن دۇيسەنبىدەن باستاپ باس پروكۋراتۋرا جانە قر ءىىم قالا اكىمدىگىنىڭ قولداۋىمەن «ەلەكتروندى حاتتاما» جوباسى جۇمىسىن باستاعان بولاتىن.

جاڭا جوبانىڭ نەگىزىندە ەلوردالىق پوليتسەيلەر ءبىر تاۋلىك ىشىندە پلانشەت ارقىلى 100-دەن اسا ايىپپۇل راسىمدەپ ۇلگەردى. جاڭا تەحنولوگيالاردىڭ كومەگىمەن ادەتتەگى بۇزۋشىلىقتى تىركەۋ ۋاقىتىن 5 مينۋتقا دەيىن قىسقارتۋعا مۇمكىندىك بەرەدى, دەپ حابارلادى استانا قالاسى اكىمدىگىنىڭ جاعداياتتار ورتالىعى. ەندى جول-پاترۋل قىزمەتى وكىلدەرى گادجەتكە جۇرگىزۋشىنىڭ ين ءنومىرىن ەنگىزە سالىسىمەن بۇزۋشىلىق جاساعان ازامات جونىندە اقپارات پايدا بولادى. جاڭاشىل ءادىستى ەنگىزۋدىڭ ءبىرىنشى كۇنى ەلوردالىق پوليتسەيلەر پلانشەت ارقىلى 117 بۇزۋشىلىق راسىمدەگەن.«ءراسىم تەز جاسالادى, ۋاقىت ۇنەمدەيمىز. بۇزۋشىلىق جاساعان ازاماتتى تىركەۋ ءۇشىن نەبارى 3-5 مينۋت كەتەدى. كەيبىر جۇرگىزۋشىلەر بۇل جۇيەگە تاڭقالىپ تا جاتىر» دەدى جەرگىلىكتى پوليتسيا قىزمەتىنىڭ  قىزمەتكەرى سامات ءسابيت.

ايگۇل ۋايسوۆا