مادەنيەت جانە سپورت مينيسترلىگىنىڭ باستاماسىمەن ۇلى اقىننىڭ 175 جىلدىق مەرەيتويى اياسىندا جاقىندا «اباي ينستيتۋتى» اشىق ءبىلىم بەرۋ جوباسى جۇرتشىلىققا جول تارتادى.
اتالمىش جوبا الدىمەن قازاق ءتىلى مەن ادەبيەتىن جانە مادەنيەتىن دارىپتەۋدى كوزدەيدى. سونىمەن بىرگە مەملەكەتتىك ءتىلدى وقىتۋ باعدارلاماسىنىڭ جالپىعا قولجەتىمدىلىگىن قامتاماسىز ەتۋ ءۇشىن رەسپۋبليكادا جانە شەتەلدە قازاق تىلىندە اشىق ءبىلىم الۋدى جۇزەگە اسىرادى. قازىرگى كۇنى «وتانداستار» قورىمەن بىرلەسىپ, بەس مەملەكەتتە – تۇركيا, يران, رەسەي, بەلگيا جانە اقش ەلدەرىندە قازاق ءتىلىن وقىتۋ كۋرستارى جۇمىسىن باستادى.
الەمدىك تاجىريبەگە جۇگىنسەك, ءتىل ۇيرەنۋگە, ءبىر حالىقتىڭ ادەبيەتىن, تاريحىن جانە جالپى بولمىس-ءبىتىمىن ناسيحاتتايتىن مۇنداي تاجىريبە جەتكىلىكتى. دۇنيەجۇزى بويىنشا وسىنداي 25-كە جۋىق ورتالىق بار. سولاردىڭ ىشىنەن الەم تانىعان ءبىر-ەكەۋىن ايتساق, ماسەلەن, تۇرىكتىڭ يۋنۋس ەمرە ينستيتۋتى مەن نەمىستىڭ گيوتە ينستيتۋتى. بۇلار ءتىل ۇيرەتۋمەن شەكتەلمەي, مادەنيەتارالىق ءوزارا بايلانىس پەن الەۋمەتتىك قۇندىلىقتاردى تۇگەل قامتيدى. «اباي ينستيتۋى» وسىلاردىڭ لايىقتى سەرىكتەسى رەتىندە قازاق ءتىلىن شەتەلدەردەگى قازاق دياسپوراسىنا, سونىمەن قاتار تاريحىمىزعا قىزىعۋشى شەتەلدىك جانە ەلىمىزدەگى قازاق ءتىلىن جەتكىلىكتى كولەمدە مەڭگەرمەگەن ازاماتتارعا ۇيرەتۋدە ءرولى ايرىقشا بولادى.
