استانادا تۇرعىندار مەن ەمدەۋ ۇيىمدارىنىڭ اراسىنداعى بايلانىستى جەتىلدىرۋ ماقساتىندا «دەنساۋلىقتى بىرگە ساقتايمىز» اتتى اكتسيا باستالدى. تامىزدىڭ ونىنان باستاپ بارلىق مەديتسينالىق مەكەمەلەردە كەرى بايلانىستى جاقسارتۋ ماقساتىندا بىرقاتار شارالار ىسكە اسىرىلادى. ونىڭ ىشىندە الەۋمەتتىك بايلانىس جەلىلەرى قولدانىلادى.
دەنساۋلىق ساقتاۋ سالاسىنداعى الەۋمەتتىك مۇددەلەردى قورعاۋدىڭ مەملەكەتتىك جۇيەسى – مىندەتتى الەۋمەتتىك مەديتسينالىق ساقتاندىرۋعا قاتىستى ناقتى شارالار وسىلايشا جالعاسىن تابۋدا. سونىمەن بىرگە, جاڭا جۇيەنىڭ وڭ ناتيجەسى ەلورداداعى مەديتسينالىق مەكەمەلەردىڭ ماتەريالدىق بازاسى مەن قىزمەت كورسەتۋ ساپاسىنا دا تىعىز بايلانىستى بولماق.
وسى رەتتە №2 قالالىق اۋرۋحانانىڭ باس دارىگەرى يۆان لي باق وكىلدەرىمەن كەزدەستى. باس دارىگەر اۋرۋحانا قىزمەتكەرلەرىنىڭ جۇمىسىن جاڭاشا ۇيلەستىرۋ ماسەلەلەرى بويىنشا جۋرناليستەر سۇراعىنا جاۋاپ بەرىپ, ەمدەۋ مەكەمەسىنىڭ الەۋەتىمەن تانىستىردى.
№2 قالالىق اۋرۋحانا – كەڭ كولەمدى جوعارى مامانداندىرىلعان مەديتسينالىق كومەك كورسەتەتىن 360 ورىندىق كوپبەيىندى ستاتسيونار. ياعني, اۋرۋحانا كەشەنىندە ءارتۇرلى ءپروفيلدى مامانداردىڭ شوعىرلانۋى ارقاسىندا جەدەل دياگنوستيكالاۋ جانە اۋرۋدىڭ سەبەبىن ءدال قويىپ, ەم-دومىنىڭ ءتيىمدى بولۋىن قامتاماسىز ەتەدى.
يۆان لي, №2 قالالىق اۋرۋحانانىڭ باس دارىگەرى:
– جاڭا جۇيە مەديتسينالىق مەكەمەلەردىڭ جۇمىسىن ۇيىمداستىرۋدا بىرقاتار وزگەرىستەردى تالاپ ەتەدى. ءبىزدىڭ ۇجىم دا شەتەلدىك وزىق تاجىريبەلەرگە سۇيەنە وتىرىپ, ناۋقاستارعا بارلىق جاعدايدى جاساپ وتىر. سونىڭ ءبىرى جەدەل جاردەم كولىگىمەن جەتكىزىلگەن پاتسيەنتەردىڭ اعىمىن رەتتەپ, ناۋقاستىڭ جاعدايىنا بايلانىستى «اسا شۇعىل» جانە «شۇعىل» دەپ العاشقى مەديتسينالىق كومەك كورسەتۋ ۋاقىتىن ۇتىمدى پايدالانامىز. بۇل اسا قاتتى ناۋقاس ءۇشىن ءاربىر ءساتتىڭ ماڭىزدىلىعىن ەسكەرۋدەن تۋىندايدى. سونىمەن بىرگە, جوسپارلى تۇردە ەمدەلۋگە كەلگەن ناۋقاستار ءۇشىن دە قابىلداۋ ەرەجەسى بار. ولار بۇرىنعىداي ءارتۇرلى مامانداردىڭ قابىلداۋىنا ۋاقىتىن وتكىزبەيدى. ءبىزدىڭ بارلىق كۇشىمىز پاتسيەنتتىڭ اۋرۋحانادا بولعان كۇندەرىن قولايلى ەتىپ, ونىڭ تەز ايىعىپ كەتۋىنە نازار اۋداراتىن بولامىز.
ايگۇل
ۋايسوۆا
