كەشە ەلوردا اكىمدىگىندە «ەكسپو-2017» حالىقارالىق مامانداندىرىلعان كورمەسىن وتكىزۋ كەزەڭىندە استانادا جول قوزعالىسىن كولىكتىك قامتاماسىز ەتۋ جانە ۇيىمداستىرۋ ماسەلەلەرىنە ارنالعان ءباسپاسوز ءماسليحاتى ءوتتى. وعان قالالىق جولاۋشىلار كولىگى باسقارماسىنىڭ باسشىسى بەكمىرزا يگەنبەردينوۆ, «استانا LRT» جشس باسقارما باسشىسىنىڭ ورىنباسارى رۋستام حاليلەۆ قاتىستى.
جيىندا قالا مەكەمەلەرىنىڭ جۇمىس ۋاقىتىن سارالاۋ, جاڭا ۋچاسكەلەرگە «Shuttle Bus» باعدارلارىن جانە «Bus Lane» جولاقتارىن ەنگىزۋ, قابانباي باتىر داڭعىلىنىڭ بويىندا سولعا بۇرىلۋعا تىيىم سالۋ, سونىمەن قاتار, كولىكتىك حابتار قۇرۋ ماسەلەلەرى كەڭىرەك ايتىلدى.اۋەلى باستى جاڭالىققا توقتالايىق. 1 ماۋسىمنان باستاپ ەلوردا جاڭا جۇمىس ۋاقىتىنا كوشەدى. ونى جولاۋشىلار كولىگى باسقارماسىنىڭ باسشىسى بەكمىرزا يگەنبەردينوۆ جەتكىزدى. ونىڭ ايتۋىنشا, جىل ساناپ قالا حالقى مەن كولىك سانىنىڭ وسۋىنە بايلانىستى جۇمىس ۋاقىتىن ۇتىمدى پايدالانۋ وزەكتى ماسەلەگە اينالعان. بۇل ءۇردىس الەمدە كەڭىنەن قولدانىلادى. اسىرەسە, «ەكسپو-2017» حالىقارالىق كورمەسى قارساڭىندا جانە كورمە كەزىندە ەلوردادا كولىك سانى ارتادى. ول ءوز كەزەگىندە كەپتەلىستى كوبەيتەدى.
– سوعان بايلانىستى جۇمىس ۋاقىتىن سارالاۋ ەكونوميكالىق ساناتتارمەن جۇرگىزىلدى. قۇقىق قورعاۋ سالاسى, مەديتسينا, ءبىلىم بەرۋ ۇيىمدارىنىڭ, بالاباقشا جانە مەكتەپتەردىڭ جۇمىس ۋاقىتى وزگەرمەيدى. قۇرىلىس ۇيىمدارىنىڭ جۇمىس ۋاقىتىن ساعات 9-دان 7-گە, قالانىڭ كوممۋنالدىق قىزمەتتەرى مەن ونەركاسىپتىك جانە وندىرىستىك سەكتورلارىن 9-دان 7.30-عا, حالىققا قىزمەت كورسەتۋ ورتالىقتارى مەن قارجى ينستيتۋتتارىن 9-دان 10-عا, ساۋدا-ويىن-ساۋىق ۇيىمدارىن 10-نان 10.30-عا, ۇلتتىق كومپانيالاردى 9-دان 9.30-عا اۋىستىرۋ ۇسىنىلادى, – دەدى ول. سونىمەن بىرگە, رەسپۋبليكالىق باسقارۋ جانە جەرگىلىكتى اتقارۋشى ورگانداردىڭ جۇمىس ۋاقىتىن ساعات 9-دان 8.30-عا, ال جوعارى وقۋ ورىندارى مەن مامانداندىرىلعان وقۋ ورىندارىنىڭ جۇمىس ۋاقىتى 9-دان 10-عا اۋىستىرىلاتىندىعىن ايتتى. بۇل وزگەرىستەردىڭ ءبارى كوشەدەگى كەپتەلىستى ازايتادى.
سونداي-اق, ب.يگەنبەردينوۆ قوعامدىق كولىكتىڭ قولجەتىمدىلىگىن قامتاماسىز ەتۋ جانە ەكسپو-نى كولىكپەن جابدىقتاۋ, حالىقارالىق جانە وڭىرلىك دەلەگاتسيالارعا ارنالعان ترانسپورتتى ۇيىمداستىرۋ ءۇشىن 423 اۆتوبۋس ساتىپ الىنعاندىعىن بايانداپ, بارلىق كولىكتەر مامىر ايىنىڭ سوڭىنا دەيىن جەتكىزىلەدى دەپ مالىمدەدى. ونىڭ سوزىنشە, بۇگىندە قالادا 81 قوعامدىق كولىك باعدارى بار. ونىڭ 11-ءى ەكسپو اۋماعى ارقىلى وتەدى. كورمە وتكىزىلەتىن كەزەڭدە اتالعان 11 باعدارعا قىزمەت كورسەتۋ ءۇشىن قوسىمشا 103 اۆتوبۋس بەرىلەدى. بۇل قوعامدىق كولىكتەردىڭ قوزعالىسىنداعى ۋاقىت ارالىعىن 5-7 مينۋتقا قىسقارتادى.
سونىمەن قاتار, قالاداعى جول قوزعالىسىن ۇيىمداستىرۋدى جەتىلدىرۋ ماقساتىندا 28 قيىلىسقا تالداۋ جۇرگىزىلىپ, ناتيجەسىندە قيىلىسقا جاقىن جەردە بولاتىن كەپتەلىستەردى ازايتۋعا 38 وڭ جاققا بۇرىلۋ قۇرىلىسىنىڭ ادرەستىك باعدارلاماسى ازىرلەندى. بۇدان بولەك, جولاۋشىلار تاسىمالىنىڭ ساپاسى مەن قاۋىپسىزدىگىن ارتتىرۋعا ارنالعان كولىك اعىندارىن باسقارۋدىڭ بىرقاتار جاڭا ادىستەرى ەنگىزىلمەك.
بىرىنشىدەن, ەكسپو اياسىندا 12 جاڭا ۋچاسكەدە «Bus Lane» قوعامدىق كولىك جولاقتارى ىسكە اسادى. 20 مامىردان سارىارقا, تۇران, بەيبىتشىلىك داڭعىلدارىندا, 27 مامىردان تاۋەلسىزدىك, سارايشىق, تاشەنوۆ, جۇماباەۆ, قابانباي باتىر داڭعىلدارىندا, ال 3 ماۋسىمنان باستاپ جاڭا جولداردىڭ سالىنۋىنا بايلانىستى ناجىمەدەنوۆ پەن بايتۇرسىنوۆ كوشەلەرىندە جانە رەسپۋبليكا داڭعىلىندا ارنايى اۆتوبۋس جولاقتارى قولدانىسقا ەنەدى. تاعى ءبىر تىڭ جاڭالىق, 27 مامىردان باستاپ ەلوردادا العاشقى اقىلى تۇراق ءوز جۇمىسىن باستايدى.
ازامات ەسەنجول
