استانا اكىمى اسەت يسەكەشەۆ ۇكىمەت وتىرىسىندا ەلورداداعى ەكى كۇنگى تولاسسىز جاۋعان نوسەردەن كەيىنگى احۋالعا قاتىستى ەسەپ بەرىپ, پرەمەر-مينيستر باقىتجان ساعىنتاەۆتىڭ ساۋالدارىنا جاۋاپ بەردى. قالا باسشىسى كاناليزاتسيا جانە سۋ قۇبىرىن تارتۋعا قاتىستى جۇمىستار جۇيەلى تۇردە جۇرگىزىلىپ جاتقانىن مالىمدەدى. اسەت ورەنتايۇلى وسى ماقساتقا بولىنگەن قاراجاتتىڭ شەڭبەرىندە 2019 جىلى باس قالادا نوسەر كاناليزاتسياسى قۇرىلىسىنىڭ اياقتالاتىنىن ايتتى.
«2017 جىلى ءبىز تۇران جانە ۇلى دالا داڭعىلىنداعى, 31-ءشى كوشەدەگى, كوكتال كەنتىندەگى, مىڭجىلدىق اللەياسىنداعى سۋ تازارتۋ نىساندارىن سالىپ بىتىردىك. ءبىر جىلدا جەدەل قارقىنمەن تۇران-سىعاناق كوشەلەرىنىڭ قيىلىسىنداعى تازارتۋ نىساندارىن قايتا جوندەۋدەن وتكىزىپ, سۋ اعىندارىن بەيسەكوۆ كوشەسى – قورعالجىن تاس جولىنان ءارى جىبەرەتىن ۇزىندىعى 15 شاقىرىمدىق سۋ اعىزاتىن كوللەكتوردى ورناتتىق. سونداي-اق, مىڭجىلدىق اللەياسى مەن تەلمان ىقشام اۋدانىندا (تەمىرجول ۆوكزالى اۋدانى) جاڭبىر سۋى اعاتىن جەلىنىڭ قۇرىلىسىن باستادىق» دەپ ەسەپ بەردى اسەت يسەكەشەۆ.
ول ەلوردادا نوسەر سۋىنا قاتىستى كۇردەلى جاعداي قالىپتاساتىن ۋچاسكەلەردىڭ بار ەكەنىن جوققا شىعارعان جوق. «تولاسسىز نوسەر جاۋعاندا سۋ كوپ جينالاتىن جەرلەر – اقبۇلاق, ب.مومىشۇلى كوشەلەرى, بۇل كوشەلەرگە اعىن سۋلار ۇلكەن اۋماقتاردان (ابىلايحان كوشەسى, جاستار جانە وڭتۇستىك-شىعىس ىقشام اۋدانى) جانە جاڭادان سالىنىپ جاتقان اۋماقتار مەن تاس جولداردان – قوشقارباەۆ, تاۋەلسىزدىك, مىڭجىلدىق جانە باسقالارىنان جينالادى. اعىن سۋلاردى ەكى ەسەگە ۇلعايتۋدىڭ تەحنيكالىق شەشىمدەرىن تاپتىق. بۇل ماسەلەنى شەشەتىن جوبانى 2019 جىلى جۇزەگە اسىرامىز. قاراجات ءبولۋدى ەسكەرە وتىرىپ, بۇل باعدارلامانى تەزدەتىپ بىتىرەمىز. نەگىزىنەن, الداعى ءۇش جىلدا ەلورداداعى نوسەر سۋىن اعىزاتىن كاناليزاتسياعا قاتىستى ماسەلەلەر تولىعىمەن شەشىلەدى» دەپ سەندىردى قالا باسشىسى.
اسەت ورەنتايۇلى سوڭعى ەكى كۇندە قالىپتاسقان احۋالدىڭ وڭاي بولماعانىن اتاپ ايتتى. بۇعان سەبەپ – 1,5 سوتكەدە 45 مم نوسەر سۋى جينالعان, ال نوسەر سۋىنىڭ ايلىق مولشەرى 29 مم بولۋى ءتيىس. «ەكى كۇندە ايلىق نورمادان 1,5 ەسەگە كوپ نوسەر جاۋدى. قولدانىستاعى قۇرىلىس ەرەجەلەرى مەن نورمالارىنا سايكەس, نوسەر سۋى اعاتىن جەلىلەر تەك 20 مينۋتتىق جاڭبىرعا عانا ارنالىپ سالىنعان. 20 مينۋت بويى جاۋعان جاڭبىردىڭ سۋى 4 ساعاتتىڭ ىشىندە اعىپ كەتۋى كەرەك. ال 21 تامىز كۇنى جاڭبىر كۇنى بويى تولاستاعان جوق. 20 تامىز كۇنى ساعات 17-لەردىڭ شاماسىندا توقتاماي جاۋعان اق جاۋىننان قالاداعى ءۇش كۇردەلى ۋچاسكەدە سۋ باسۋ وقيعالارى تىركەلدى. بىراق سۋدى بىردەن سورىپ الدىق. باقىتجان ءابدىرۇلى, بارلىق كوممۋنالدىق قىزمەتتەر ەكى سوتكە بويى تۇرعىنداردىڭ نوسەر كاناليزاتسياسى جۇيەسىنىڭ شاعىمى بويىنشا ۇزدىكسىز جۇمىس ىستەدى» دەدى ءا.يسەكەشەۆ. ول ەرەكشە سەلدەتكەن نوسەردىڭ ناتيجەسىندە باس قالانىڭ بىرقاتار كوشەلەرىندە اعىن سۋدىڭ جينالىپ قالعانىن مويىندادى. «مۇنداي جاعداي كەز كەلگەن قالادا بولۋى مۇمكىن. مىسالى, نوسەر سۋى اعاتىن كەرەمەت كاناليزاتسياسى بار سينگاپۋر, ماسكەۋ, كيەۆ سياقتى قالالاردا, گەرمانيا, اقش, فرانتسيانىڭ قالالارىندا دا تولاسسىز جاۋعان جاۋىننىڭ زاردابى بولعانىن بىلەمىز» دەدى قالا باسشىسى.
ءسوز سوڭىندا اسەت يسەكەشەۆ اتالعان ماسەلەنى اكىمدىك قاتاڭ باقىلاۋدا ۇستاپ وتىرعانىن, بۇعان ۇكىمەتتىڭ قولداۋى قاجەتتىگىن العا تارتتى. «باقىتجان ءابدىرۇلى, وسىعان وراي سىزگە ءبىر ءوتىنىشىم بار. قازىر «تابيعي مونوپوليالار تۋرالى» زاڭدا نوسەر اعىندارىنىڭ قىزمەتى رەتتەلمەگەن. ءبىز ەلوردادا «استانا-تازالىق» جشس بازاسىندا نوسەر كاناليزاتسياسى بويىنشا جۇمىس ىستەيتىن كاسىپورىن اشقىمىز كەلەدى. ول كاسىپورىن اتالعان جۇيەنى تولىق باقىلاۋدا ۇستاي الادى. وسىعان وراي, مينيسترلىككە تاپسىرما بەرۋىڭىزدى سۇرايمىن, ءبىز بۇل جۇمىستى ءوز قولىمىزعا الامىز. «استانا-تازالىق» جشس-ءىن جەكەشەلەندىرۋ باعدارلاماسىنان الىپ تاستاۋىڭىزدى سۇرايمىن, ويتكەنى ول تەك اعىن سۋلار قىزمەتىمەن اينالىسادى» دەدى اكىم.
