تاۋەلسىزدىگىمىزدىڭ وتىز جىلدىعى اياسىندا مادەنيەت جانە سپورت مينيسترلىگىنىڭ قولداۋىمەن «استانا بالەت» تەاترىندا بەلگىلى حورەوگراف ۆاسيلي مەدۆەدەۆتىڭ رەداكتسيالاۋىمەن ريكاردو دريگونىڭ مۋزىكاسىنا جازىلعان «راۋشان گۇلى مەن كوبەلەكتىڭ رومانى» اتتى بىرەگەي بالەتتىڭ الەمدىك پرەمەراسى قويىلدى.
قازاق ۇلتتىق حورەوگرافيا اكادەمياسى Temps lié II كاسىبي حورەوگرافيالىق وقۋ ورىندارىنىڭ حالىقارالىق فەستيۆالىن كورنەكتى بالەتمەيستەر ماريۋس پەتيپانىڭ «كىشكەنتاي جاۋھار» اتالعان سپەكتاكلىمەن اشۋىنىڭ ماڭىزى ەرەكشە. اتالعان اكادەميانىڭ رەكتورى التىناي اسىلمۇراتوۆا الەمدىك دەڭگەيدەگى بالەتتىڭ ەرەكشەلىگىنە توقتالا كەلىپ: «ماريۋس پەتيپانىڭ وسى سوڭعى تۋىندىسى ۇلكەن تەاترلار ساحناسىندا قويىلماعان, بىراق ول تۋرالى ەستەلىك ساقتالعان. مىنە, عاسىردان استام ۋاقىت وتكەن سوڭ كوپتەگەن تالانتتى ادامنىڭ كۇش-جىگەرىنىڭ ارقاسىندا ءبىز وسى سپەكتاكلدى قايتا جاڭعىرتىپ, كورەرمەن قاۋىمعا سىيعا تارتىپ وتىرمىز» دەپ اتاپ ءوتتى.
بالەت ليبرەتتوسىن حورەوگراف ۆاسيلي مەدۆەدەۆ پەن يانا تەميز − يۆان ۆسەۆولوجسكيدىڭ تۇپنۇسقالىق ليبرەتتوسى نەگىزىندە قايتا جاساعان. بالەت حورەوگرافياسى ءىس جۇزىندە جوعالىپ كەتكەندىكتەن, ونى تالانتتى حورەوگراف ۆاسيلي مەدۆەدەۆ ەلىمىزدە ساحنالاۋ ءۇشىن قايتا ازىرلەدى. وركەستر پارتيتۋراسىنىڭ اۆتورى, مۋزىكانت ءارى مۋزىكالىق وڭدەۋشى – داۋلەت شاكىروۆ. قويىلىمعا ارنالعان كوستيۋمدەردى يمپەراتور تەاترلارىنىڭ ديرەكتورى يۆان ۆسەۆولوجسكيدىڭ ەسكيزدەرى نەگىزىندە سۋرەتشى ناتاليا پروتاسوۆا دايىنداسا, ستسەنوگرافيا اۆتورى – جاندوس وماروۆ.
ونەرسۇيەر قاۋىمدى قۋانىشقا بولەگەن قويىلىمعا قازاق ۇلتتىق حورەوگرافيا اكادەمياسىنىڭ ۇستازدارى مەن وقۋشىلارى قاتىسىپ, ونداعى باستى پارتيالاردى – كاميلا شاحمانوۆا, حۆان امير, امينا كيسەمباەۆا, ليمارا ايداروۆا جانە الينا زىريانوۆا شەبەر ورىندادى. قىسقاسى, ەموتسيالىق اسەرگە تولى تاماشا ورىنداۋ تەحنيكاسى جاس بالەت ارتىستەرىنە ساحنادا ۇمىتىلماس بەينەلەر جاساۋعا مۇمكىندىك بەردى.
بايان اسىلبەكوۆا
