كەشە ەلباسى نۇرسۇلتان نازارباەۆ استاناداعى تاۋەلسىزدىك سارايىندا وتكەن شەتەلدىك ينۆەستورلار كەڭەسىنىڭ 31-پلەنارلىق وتىرىسىنا قاتىستى.
مەملەكەت باسشىسى باسقوسۋدا سويلەگەن سوزىندە شەتەلدىك ينۆەستورلار كەڭەسىنىڭ قازاقستانداعى بيزنەس احۋالدى جاقسارتۋعا جانە ۇلتتىق ەكونوميكانى قولداۋعا باعىتتالعان جۇمىستارىنىڭ ناتيجەلەرىنە توقتالدى. نۇرسۇلتان نازارباەۆ شەتەلدىك ينۆەستورلار كەڭەسىنىڭ پلەنارلىق وتىرىسىنا قاتىسۋشىلاردىڭ باياندامالارىن تىڭداعان سوڭ, جاھاندىق سىن-قاتەرلەر جاعدايىندا ۇلتتىق ەكونوميكانىڭ تۇراقتىلىعىن قامتاماسىز ەتۋ ءۇشىن قازاقستاننىڭ اتقارىپ جاتقان شارالارى جونىندە ايتتى.
پرەزيدەنت ەلدىڭ ودان ءارى جاڭعىرۋى مەن باسەكەگە قابىلەتتىلىگىن ارتتىرۋ ءۇشىن اتقارىلاتىن جۇمىستىڭ بىرنەشە باعىتىن اتاپ كورسەتتى. – ءبىرىنشى. بۇل – رەتتەۋشى ورتانى جاقسارتۋ. جەر قويناۋى جانە جەر قويناۋىن پايدالانۋ تۋرالى كودەكس, سالىق جانە كەدەن كودەكستەرى سياقتى جاڭا قۇجاتتار كۇشىنە ەندى. كاسىپكەرلىكتى رەتتەۋ ماسەلەلەرى جونىندەگى زاڭنامالىق تۇزەتۋلەر توپتاماسى قابىلداندى. بارلىق باعىتتار بويىنشا ەكونوميكالىق ىنتىماقتاستىق جانە دامۋ ۇيىمىنىڭ ستاندارتتارى ەنگىزىلۋدە, – دەدى مەملەكەت باسشىسى.
قازاقستان پرەزيدەنتى قۇقىق ۇستەمدىگىن قامتاماسىز ەتۋگە جانە مەملەكەتتىك باسقارۋ ءىسىنىڭ ساپاسىنا ەرەكشە نازار اۋدارۋ قاجەتتىگىن اتاپ ءوتتى. – ەكىنشى. بۇل – ەكونوميكانى ديۆەرسيفيكاتسيالاۋ جانە جاڭا تەحنولوگيالاردى ەنگىزۋ. ەلىمىز بويىنشا يندۋستريالاندىرۋ اياسىندا 1200-دەن استام جاڭا كاسىپورىن ىسكە قوسىلدى, – دەدى نۇرسۇلتان نازارباەۆ.
سونداي-اق ەلباسى ءۇشىنشى باسىم باعىت رەتىندە ينفراقۇرىلىمدى جاڭعىرتۋ قاجەتتىگىن اتاپ ءوتتى. – ءبىز ەۋرازيالىق ءمۋلتيمودالدى كولىك-ترانزيت حابىن قالىپتاستىرۋدامىز. جۇزەگە اسىرىلىپ جاتقان «نۇرلى جول» ينفراقۇرىلىمدىق باعدارلاماسى ەۋرازيالىق ينتەگراتسيانى كۇشەيتۋگە جانە قىتايدىڭ «ءبىر بەلدەۋ, ءبىر جول» باستاماسىمەن ۇشتاسۋعا باعىتتالعان. 5 شىلدەدە «استانا» حالىقارالىق قارجى ورتالىعىنىڭ تانىستىرىلىمى بولادى. بۇل ورتالىق قازاقستاننىڭ قارجى ينفراقۇرىلىمىنىڭ وزەگىنە جانە بۇكىل ورتالىق ازيا ءوڭىرىنىڭ حابىنا اينالۋعا ءتيىس, – دەدى نۇرسۇلتان نازارباەۆ. مەملەكەت باسشىسى ەل كولەمىندەگى جانە وڭىرلەردەگى ەكونوميكا سالالارىن تسيفرلاندىرۋ ۇدەرىسىنە كەڭىنەن توقتالدى. – ءتورتىنشى. بۇل – تسيفرلاندىرۋ. ءبىز «تسيفرلىق قازاقستان» مەملەكەتتىك باعدارلاماسىن جۇزەگە اسىرۋدى باستادىق. تسيفرلىق تەحنولوگيانى اگروونەركاسىپ كەشەنىنە, كولىك جانە باسقا دا نەگىزگى سالالارداعى كاسىپورىندارىمىزعا ەنگىزۋ قاجەت, – دەدى قازاقستان پرەزيدەنتى.
– بەسىنشى. بۇل – ادامي كاپيتالدى دامىتۋ. ءبىلىم بەرۋ جۇيەسى ەكونوميكانى جاڭعىرتۋ مەن تسيفرلاندىرۋدى ەسكەرە وتىرىپ ترانسفورماتسيالانۋى قاجەت. وسىعان وراي كەلەسى وتىرىسىمىزدىڭ تاقىرىبى رەتىندە «ادامي كاپيتالدى دامىتۋ» ماسەلەسىن ۇسىنامىن, – دەدى مەملەكەت باسشىسى. ەلباسى ءسوزىنىڭ سوڭىندا قازاقستان ەكونوميكاسىن جاڭعىرتۋ ءۇشىن بىرلەسە ءتيىمدى جۇمىس جۇرگىزۋدىڭ ماڭىزدى ەكەنىن اتاپ ءوتتى.
