ازاماتتىق باستامالاردى قولداۋ ورتالىعى بريجيت باردو قورىنىڭ وكىلى بريدجيت ولۋامەن كەزدەسۋ ۇيىمداستىردى. كەزدەسۋگە جانۋارلاردىڭ قۇقىقتارىن قورعايتىن جەرگىلىكتى ۇكىمەتتىك ەمەس ۇيىمدار قاتىستى.
بريجيت ولۋا ساپارىنىڭ نەگىزگى ماقساتى ۇسىنىلاتىن الەۋمەتتىك قىزمەتتەردىڭ ساپاسىن جاقسارتۋ ءۇشىن جانۋارلاردى قورعاۋ جونىندەگى ۇكىمەتتىك ەمەس ۇيىمداردىڭ حالىقارالىق ۇيىمدارمەن بايلانىس ورناتۋىنا جاردەمدەسۋ بولدى. قور وكىلى جانۋارلاردى قورعاۋعا باعىتتالعان ازاماتتىق باستامالاردى قولداۋ ورتالىعىنىڭ گرانت الۋشىلارىنىڭ جۇمىسىنا وڭ باعا بەردى جانە قازاقستان بۇگىندە جانۋارلاردىڭ قۇقىقتارىن قورعاۋعا دەگەن كوزقاراستى وزگەرتۋگە دايىن ەكەنىن حابارلادى.
«بريجيت باردو قورىنا قازاقستاننان جانۋارلارعا, اتاپ ايتقاندا, يتتەر مەن مىسىقتارعا قاتىستى قاتىگەزدىك تۋرالى كوپتەگەن سۇراۋلار كەلىپ تۇسەتىندىكتەن, كوروناۆيرۋستىق پاندەمياعا دەيىن ءبىز ءسىزدىڭ ەل پرەزيدەنتىنە شارا قولدانۋ تۋرالى حات جازدىق. قاسىم-جومارت توقاەۆ قور جۇمىسىنىڭ ماڭىزدىلىعىن اتاپ ءوتىپ, وعان جاۋاپ بەردى. ول قازاقستاندا جانۋارلارعا قاتىستى جاعداي وزگەرۋى كەرەك دەگەن پىكىرمەن تولىق كەلىسەتىنىن ايتتى. بۇل باعىتتاعى جۇمىس باستالىپ كەتتى دەپ ايتۋعا بولادى» دەدى ب.ولۋا.
قور قازىر سەمەيدە ۆەتەرينارلاردى وقىتۋ باعدارلاماسىن جۇزەگە اسىرۋدا. قازاقستاننىڭ بارلىق ايماقتارىنان كەلگەن ۆەتەرينارلار زارارسىزداندىرۋدى ۇيرەتۋگە جىبەرىلەدى. ازاماتتىق باستامالاردى قولداۋ ورتالىعىنىڭ باسقارما توراعاسى ليما دياس Birgemiz: Ayala جوباسى اياسىندا ۆولونتەرلەردى شاقىرۋ, سونداي-اق ولاردى ۆەتەريناريا, كينولوگيا جانە زووپسيحولوگيا نەگىزدەرىنە وقىتۋ بويىنشا جۇمىس جۇرگىزىلىپ جاتقانىن ايتتى.
سوڭىنان تاراپتار ارىپتەستىكتىڭ بىرقاتار الەۋەتتى باعىتتارىن بەلگىلەپ, جانۋارلاردى قورعاۋدى قامتاماسىز ەتۋ بويىنشا جۇمىستى كۇشەيتۋگە كەلىستى.
