ءبىر جىلدان بەرى نۇر-سۇلتاندا «جانۇيا» وتباسى ينستيتۋتىن قولداۋ ورتالىعى جۇمىس ىستەيدى. وندا ەلورداداعى وتباسىلار قۇقىقتىق, پسيحولوگيالىق جانە الەۋمەتتىك كومەك الادى. ورتالىق جۇمىس تابۋعا, كاسىپتىك وقۋدان وتۋگە, الەۋمەتتىك جانە تۇرعىن ءۇي باعدارلامالارى تۋرالى اقپارات الۋعا, سونداي-اق ولارعا قاتىسۋعا كومەكتەسەدى.
اشىلعان كۇننەن باستاپ ورتالىققا 42 017 ساۋال بويىنشا 23 039 ءوتىنىش كەلىپ ءتۇستى. ادامدار قويعان سۇراقتاردىڭ كوپ بولىگى اتاۋلى الەۋمەتتىك كومەك – 22 620, مەملەكەتتىك جاردەماقى – 6 278 جانە تۇرعىن ءۇي – 3 020 ماسەلەلەرىنە قاتىستى.
ورتالىقتا 12 مەملەكەتتىك ورگان مەن كۆازيمەملەكەتتىك سەكتور ۇيىمدارىنىڭ جۇمىسى ۇيىمداستىرىلعان. وندا «ازاماتتارعا ارنالعان ۇكىمەت» كەاق, جەكە سوت ورىنداۋشىلارىنىڭ وڭىرلىك پالاتاسى, قالا اكىمدىگىنىڭ اكىمشىلىگى, جۇمىسپەن قامتۋ ورتالىعى, تۇرعىن ءۇي قورى, تۇرعىن ءۇي قۇرىلىس جيناق بانكى, بىرىڭعاي جيناقتاۋشى زەينەتاقى قورى, الەۋمەتتىك مەديتسينالىق ساقتاندىرۋ قورى, قازپوچتا, قۇقىق قورعاۋ ورگاندارى جانە باسقا دا قۇرىلىمداردان كەڭەس الۋ مۇمكىندىگى بار.
سونداي-اق «جانۇيادا» «كاسىپكەر انا» انالارعا ءوز بيزنەسىن دامىتۋعا كومەكتەسەدى. كوپبالالى جانە از قامتىلعان وتباسىلار مۇندا ءوز بيزنەسىن باستاۋدا قولداۋ تابا الادى. ول ءۇشىن بيزنەس قۇرۋ تاجىريبەسىمەن بولىسەتىن تابىستى ايەلدەرمەن Self Made موتيۆاتسيالىق بيزنەس-ترەنينگتەر وتكىزىلەدى.
«جانۇيا» ورتالىعىنىڭ الاڭىندا نۇر-سۇلتان قالاسى اكىمىنىڭ قوعامدىق قابىلداۋى دا اشىلدى. ازاماتتاردى كەستە بويىنشا قابىلداۋدى اۋدان باسشىلارى, باسقارمالار مەن باسقا دا ۇيىمداردىڭ باسشىلارى جۇرگىزەدى.
«قيىندىققا كەزىككەن جانۇيالارعا كومەك كورسەتەتىن ورتالىقتىڭ باستى ماقساتى – وتباسىلارعا پسيحولوگيالىق, الەۋمەتتىك جانە زاڭگەرلىك كومەك كورسەتۋ. «جانۇيادا» 70-تەن اسا مەملەكەتتىك قىزمەت كورسەتىلەدى. ورتالىقتا رۋحاني قۇندىلىقتاردى دامىتۋعا, قايىرىمدىلىق, كومەك كورسەتۋگە باعىتتالعان ءىس-شارالار, سونداي-اق كوپ بالالى انالارعا ارنالعان بوس ورىندار جارمەڭكەلەرى مەن سەمينار-ترەنينگتەر وتكىزىلەدى» دەيدى «جانۇيا» وتباسى ينستيتۋتىن قولداۋ ورتالىعىنىڭ ديرەكتورى ايگەرىم تاڭىربەرگەنوۆا.
ەستەرىڭىزگە سالا كەتەيىك, «جانۇيا» وتباسى ينستيتۋتىن قولداۋ ورتالىعىنىڭ جۇمىسى 13 مامىردان باستاپ قايتا جانداندى. قابىلداۋ سانيتارلىق تالاپتاردى ساقتاي وتىرىپ جۇزەگە اسىرىلادى. بۇل رەتتە ورتالىقتىڭ بارلىق قىزمەتتەرىن ونلاين رەجيمدە نەمەسە 57-87-00, 57-88-88 ءنومىرى ارقىلى الۋعا بولادى.
باقىت توقسانباەۆا, كوپبالالى انا
«ورتالىققا تاجىريبەلى موتيۆتورلار كەلىپ, ترەنينگتەر وتكىزەدى. بۇل مەن ءۇشىن ۇلكەن مۇمكىندىك. ءوز بيزنەسىمدى باستاۋ ءۇشىن ءوزىمنىڭ كۇشتى جانە وسال تۇسىمدى انىقتادىم. وسىنداي شارا ۇيىمداستىرىلماسا, بيزنەس باستاۋ مەن ءۇشىن قول جەتپەس ارمان بولىپ قالا بەرەتىن ەدى. تاجىريبەلىك ساباقتار ماعان بيزنەس-جوبا جايىن قاراستىرۋعا سەپتىگىن تيگىزدى. كۇيزەلىستەن ارىلىپ, جاڭاشا ويلاۋعا ۇيرەتتى. شەشىم قابىلداۋعا كومەكتەستى. تۇلعالىق قاسيەتتەرىمدى تالداۋ ارقىلى ءوز باعىتىمدى, ءوز سالامدى تاڭداي الدىم. الداعى ۋاقىتتا كاسىبىمدى اشىپ, قوعامعا پايدامدى تيگىزگىم كەلەدى. ارمانىما قول جەتكىزۋ جولىندا كومەكتەسكەن, شابىتتاندىرعان «جانۇيا» ورتالىعىنا العىس بىلدىرەمىن»
اينۇر ماراتوۆا, قالا تۇرعىنى
«باسىما قيىندىق تۇسكەندە قايدا بارىپ, كىمنەن كومەك سۇراۋدى بىلمەدىم. سودان قۇربىم «جانۇيا» ورتالىعىنا بارىپ كورۋگە كەڭەس بەردى. وعان دەيىن قولداۋ ورتالىقتارىنىڭ بارىنان بەيحابار ەدىم. ماعان ورتالىق اياققا قايتا تۇرۋعا, ءومىر سۇرۋگە ۇيرەتتى. ءۇش بالامەن جۇمىسسىز, ءۇيسىز قالعانىمدا پانا بولدى. ماماندىق بويىنشا جۇمىس تابۋعا كومەكتەستى. قازىرگى تاڭدا پاتەر جالداپ تۇرامىن, بالالارىم نە ىشەمىن, نە جەيمىن دەمەيدى. تولىقتاي اياققا تۇردىم. تاجىريبەلى مامانداردان پسيحولوگيالىق, زاڭگەرلىك تۇرعىدان كەڭەستەر الىپ, رۋحاني مىقتى ادامعا اينالدىم. ورتالىق ماماندارى قۇرمەتكە لايىق»
نايما نۇرالىقىزى
