«ەكسپو-2017» حالىقارالىق مامانداندىرىلعان كورمەسىنە وراي ەلوردادا 100 جاڭا تاكسي-كولىكتەرى پايدالانۋعا بەرىلدى. سۋ جاڭا كولىكتەرگە ەڭ ءبىرىنشى بولىپ قالا اكىمى اسەت يسەكەشەۆ وتىرىپ كوردى. وسى اپتانىڭ باسىنان باستاپ اتالعان اۆتوكولىكتەر ەلوردا تۇرعىندارى مەن قوناقتارىنا قىزمەت كورسەتەتىن بولادى.
قالا اكىمىنىڭ ورىنباسارى ماليكا بەكتۇروۆانىڭ ايتۋىنشا, «Taxi Zhebe» جانە «اۆتوترانس حوزۋ» جشس «AstanaTaxi» ينۆەستيتسيالىق جوباسى اياسىندا سۋ جاڭا كولىكتەرگە يە بولىپ وتىر. ويتكەنى ول «Astana Taxi» جوباسى بيزنەس پەن مەملەكەتتىڭ ءوزارا ارىپتەستىگىنىڭ ارقاسىندا جۇزەگە اسقانىن العا تارتۋدا.
– جوبانى ىسكە اسىرۋ ءۇشىن بيۋدجەتتەن شىعىن شىققان جوق. باستاما ءبىزدىڭ جاقتان بولدى. ءبىز بارلىق پرەفەرەنتسيالاردى, رەسۋرستاردى پايدالانا وتىرىپ, زاڭداستىرىلعان جەكە-جەكە تاكسي-كومپانيالارىن بىرىكتىردىك. ولار بىرىڭعاي نەگىزدە قىزمەت كورسەتەتىن «Astana Taxi» سەرۆيسىن قۇردى. بۇل كولىكتەردىڭ سىرتقى كورىنىسى بىردەي ءارى جولاقىسى بىرىڭعاي تاريفپەن پوستەرمينال ارقىلى تولەنەدى. بۇعان دەيىن «ەكو» نەمەسە «جەبە» تاكسي وپەراتورلارىندا ساپار ءۇشىن ەڭ تومەنگى باعا 750 تەڭگە بولسا, قازىر ونىڭ ەڭ تومەنگى سوماسى 500 تەڭگە بولىپ وتىر, – دەيدى ول.
جوبا اياسىندا الداعى ۋاقىتتا قوسىمشا 200 ءاۆتوموبيلدى ىسكە قوسۋعا بايلانىستى دايىندىق جۇمىستارى ءجۇرىپ جاتىر. جوبانىڭ ەڭ باستى ەرەكشەلىگى – تاكسي-كولىكتەر «Bus Lane» سىزىعىمەن جۇرەدى. بۇل ءوز كەزەگىندە ساعاتتاپ كەپتەلىستە تۇرىپ قالۋ قاۋپىن ازايتادى. «بيپەكاۆتو» كومپانيالار توبىنىڭ كوممەرتسيالىق ديرەكتورى سانجار اجىعاليەۆتىڭ ايتۋىنشا, بۇل جوبا مەملەكەت باسشىسىنىڭ وتاندىق اۆتوكولىك ونەركاسىبىن قولداۋ ماقساتىندا جۇزەگە اسىپ جاتىر. ويتكەنى سۋ جاڭا اۆتوكولىكتەر ەلىمىزدە قۇراستىرىلىپ, شىعارىلعانىن ايتىپ وتكەن ءجون.
– ەلوردا اكىمدىگى مەملەكەت باسشىسىنىڭ تاپسىرمالارىن ءتيىمدى ورىنداپ وتىر. ماسەلەن, جەكە تاكسي-كومپانيالارى «دامۋ» قورى ارقىلى جەڭىلدەتىلگەن نەسيە الدى. ال «ازيا اۆتو» اق وڭتايلى شارتتارمەن ءارى تارتىمدى باعامەن اۆتوكولىك ۇسىندى. وسىنداي بىرلەسكەن شارالاردىڭ ناتيجەسىندە زاماناۋي تاكسي قىزمەتى قۇرىلىپ وتىر. ءبىزدىڭ كومپانيا وسكەمەندە ساپالى كولىك قۇراستىرۋمەن اينالىسادى. ءوندىرىس 2009 جىلى ىسكە قوسىلعان. بىزدە مۋلتيبرەندتىك جەلى قالىپتاسقان, اتاپ ايتاتىن بولساق, «كيا», «شەۆرولە», «شكودا» جانە «لادا» سىندى اۆتوكولىكتەر ەلىمىزدە قۇراستىرىلادى. بۇگىنگى كۇنى اتالعان اۆتوكولىكتەر ەلىمىزدە قۇراستىرىلاتىن ەڭ اۋقىمدى مودەلدەر بولىپ سانالادى, – دەيدى ول. قىركۇيەك ايىنان باستاپ جوبانىڭ ەكىنشى كەزەڭى بويىنشا 300 تاكسي جولاۋشىلارعا قىزمەت كورسەتە باستايدى. بۇل كولىكتەردىڭ سالونىندا «تەگىن Wi-Fi» قىزمەتى ورنالاستىرىلاتىن بولادى. سونداي-اق, قالالىق جانە ءموبيلدى بايلانىس ارقىلى «15-800» ءنومىرى ارقىلى بىرىڭعاي Call Center قوسىلىپ, تاكسي شاقىرۋعا مۇمكىندىك تۋماق.
سەرىك قۇدايبەرگەنۇلى
