1 ماۋسىم – حالىقارالىق بالالاردى قورعاۋ كۇنى. وسىعان وراي استانا قالالىق №11 ەمحانادا «جۇرەكتەن جۇرەككە» اتتى شارا ءوتتى.
اتالعان ەمحانانىڭ باس دارىگەرى جاڭالىق ساعىندىقوۆتىڭ ايتۋىنشا, ەمحانادا 7 مىڭنان استام بالا تىركەلگەن. ونىڭ 89-ى مۇمكىندىگى شەكتەۋلى بالالار بولىپ سانالادى. ولاردىڭ 57,3 پايىزى جۇيكە جۇيەسى اۋرۋىنا شالدىققان. سونداي-اق, دامۋدىڭ ءتۋابىتتى كەمىستىگى 12,3 پايىز بولسا, قانت ديابەتى اۋرۋىنا 9 پايىز بالا دۋشار بولعان.– مەملەكەت باسشىسى نۇرسۇلتان نازارباەۆ «بالالار ءبىزدىڭ قوعامنىڭ ەڭ ءالسىز, ءارى قورعاۋسىز بولىگى, سوندىقتان ولاردىڭ قۇقىعىن اركەزدە دە قورعالىپ, ساقتالۋى كەرەك. ءبىزدىڭ جەردە دۇنيەگە كەلگەن كەز كەلگەن بالا – قازاقستاندىق. مەملەكەت ولاردى قامقورلىعىنا الۋى كەرەك» دەگەن بولاتىن. وسى ءسوزدى باستى نازارعا الىپ, بالالار مەن ولاردىڭ وتباسى مۇشەلەرىنە ەم-دوم جۇمىستارىن جۇرگىزەمىز. ويتكەنى مۇمكىندىگى شەكتەۋلى بالالاردى تاربيەلەپ وتىرعان اتا-انالارعا دا كومەك قاجەت بولىپ جاتادى, – دەيدى ول.
باس دارىگەردىڭ ايتۋىنشا, مۇمكىندىگى شەكتەۋلى بالالارعا ەمحانا تاراپىنان جان-جاقتى ەم-دوم جۇمىستارى جۇرگىزىلىپ تۇرادى. «جاقسى ءسوز جان سەمىرتەدى» دەگەن ماتەلدى باسشىلىققا العان دارىگەرلەر ەمدەلۋشىلەرگە رۋحاني تۇرعىدان قولداۋ رەتىندە كونتسەرتتىك باعدارلامالار ۇسىندى.
سەرىك جولداسباي
