اقوردادا ەلباسى نۇرسۇلتان نازارباەۆ قازاقستانعا رەسمي ساپارمەن كەلگەن جاپونيا پرەمەر-ءمينيسترى سيندزو ابەمەن كەزدەستى.
كەزدەسۋ بارىسىندا نۇرسۇلتان نازارباەۆ س.ابەنى پرەمەر-مينيستر لاۋازىمىنا قايتا سايلانۋىمەن قۇتتىقتاپ, قىزمەتىنە تابىس تىلەدى. پرەزيدەنتتىڭ ايتۋىنشا, قازاقستان مەن كۇنشىعىس ەلى اراسىنداعى قارىم-قاتىناستىڭ ءتۇپ-تامىرى تەرەڭدە جاتىر. ەكى ەلدىڭ اراسىن جاقىنداستىرا تۇسەتىن ورتاق ماسەلەلەر دە بارشىلىق. اتاپ ايتقاندا, قوس مەملەكەت تە يادرولىق قارۋدى سىناقتان وتكىزۋدىڭ قاسىرەتىن تارتتى. بۇگىندە جاپپاي قىرىپ-جويۋ قارۋلارىن تاراتپاۋ, اتوم ەنەرگەتيكاسىن تەك بەيبىت ماقساتقا پايدالانۋ – ەكى ەلدىڭ دە ورتاق جوباسى بولىپ وتىر.
– ەلىمىزدىڭ تاۋەلسىزدىگى قالانعالى بايلانىسىمىز نىق ورنىعىپ, ارىپتەستىك قارىم-قاتىناسىمىز بارلىق سالا جاعىنان دامىپ كەلەدى. ءبىز ارقاشان ءبىر-ءبىرىمىزدى قولداپ كەلەمىز. جاڭا ەلوردا – استانا قۇرىلىسى جاپون ارحيتەكتورى كيسە كۋروكاۆانىڭ باس جوسپارى بويىنشا سالىندى. وسى جىلدار ىشىندە استانا مەن توكيو سەنىمدى سەرىكتەس رەتىندە قالىپتاستى. كەلەشەكتە دە ىنتىماقتاستىعىمىز ارتا بەرەتىنىنە سەنىم مول, – دەدى مەملەكەت باسشىسى.
سيندزو ابە جاپونيانىڭ پرەمەر-ءمينيسترى بولعان توعىز جىل ىشىندە ەلىمىزگە ءبىرىنشى رەت كەلىپ وتىر ەكەن. بۇگىنگە دەيىن ەلباسى نۇرسۇلتان نازارباەۆپەن ءتۇرلى حالىقارالىق شارالاردا بىرنەشە رەت كەزدەسكەنىن اتاپ وتكەن سيندزو ابە ەكى ەل اراسىنداعى جاراسىمدى بايلانىس بەلسەندى تۇردە دامىپ كەلە جاتقانىن اتاپ ءوتتى. پرەمەر-مينيستر وزىمەن بىرگە ىسكەر توپتار وكىلدەرىنەن تۇراتىن كەڭ اۋقىمداعى دەلەگاتسيانى ەرتە كەلىپتى. قۇرامىندا 100-دەن استام جاپون كومپانياسىنىڭ وكىلى بار دەلەگاتسيا ءوزارا سەرىكتەستىكتى كەڭەيتۋ ماسەلەسىندە ۇلكەن ناتيجەلەرگە قول جەتكىزەتىندەرىنە سەنىمدى.
جاپونيا پرەمەرىنىڭ قازاقستانعا رەسمي ساپارى اياسىندا استانادا ەكى ەل ىسكەرلەرىنىڭ قاتىسۋىمەن بيزنەس فورۋم ءوتتى. قوس تاراپ ساياسات, ەكونوميكا, اۆياتسيا جانە عارىش, ەلەكترونيكا, ماشينا جاساۋ, جىلجىمايتىن مۇلىك پەن قارجى, الەۋمەتتىك سالالار توڭىرەگىندە وي-پىكىر الماستى.
