بۇگىندە استاناداعى 83 مەكتەپتە جاراتىلىستانۋ باعىتىنداعى پاندەر اعىلشىنشا وتۋدە. ونىڭ ىشىندەگى 28 مەكتەپ 10-11 سىنىپتار ءۇشىن 4 ءپاندى تولىقتاي اعىلشىن تىلىندە وقىتسا, 53 مەكتەپ 8-9 سىنىپتار ءۇشىن پاندەردى اعىلشىن تىلىندە وقىتۋدىڭ ەلەمەنتتەرىن ەنگىزگەن. بۇل تۋرالى نۇر-سۇلتان قالاسى ءبىلىم بەرۋدى جاڭعىرتۋ ورتالىعىنىڭ ۇيىمداستىرۋىمەن وتكەن «Science club» وتىرىسىندا ءمالىم بولدى.
ەلوردا مەكتەپتەرىندەگى ءۇش تىلدە ءبىلىم بەرۋدىڭ العاشقى قادامدارى 2016-2017 وقۋ جىلىندا جاسالعان ەدى. ول كەزدە قالاداعى 25 مەكتەپ وسى جاڭالىقتى وقۋ باعدارلامالارىنا ەنگىزگەن بولاتىن. بۇل مەكتەپتەر ماتەماتيكا, بيولوگيا, فيزيكا, حيميا, گەوگرافيا جانە لوگيكا پاندەرىن اعىلشىن تىلىندە وقىتا باستادى.
بىلتىرعى وقۋ جىلىندا استانانىڭ 20 مەكتەبى جاراتىلىستانۋ-ماتەماتيكا باعىتىنداعى پاندەردى, اتاپ ايتساق, فيزيكا, حيميا, بيولوگيا جانە ينفورماتيكانى تولىقتاي اعىلشىن تىلىندە وقىتۋ بويىنشا پيلوتتىق مەكتەپتەردىڭ قاتارىنا ەندى, 61 مەكتەپتە اعىلشىن تىلىندە وقىتۋ ەلەمەنتتەرى ەنگىزىلدى.
نۇر-سۇلتان قالاسى ءبىلىم بەرۋدى جاڭعىرتۋ ورتالىعىنىڭ ادىسكەرى راۋشان ايعاراەۆانىڭ ايتۋىنشان, 2018 جىلدىڭ 1 قىركۇيەگىنەن باستاپ بيولوگيا, حيميا, فيزيكا, ينفورماتيكا پاندەرى بويىنشا اعىلشىن ءتىلىن B1, B2, C1, C2 دەڭگەيىندە مەڭگەرگەن 859 وقىتۋشى ساباقتارىن اعىلشىن تىلىندە بەرىپ ءجۇر. بۇل ءۇشىن ولاردىڭ ەڭبەكاقىلارىنا 35 مىڭ تەڭگە ۇستەمە اقى قوسىلادى.
– پەداگوگتار قالا بويىنشا ءۇش جەردە – نازارباەۆ زياتكەرلىك مەكتەبىندە, «Study Inn» ءتىل مەكتەبىندە جانە «ۇستاز» بىلىكتىلىكتى ارتتىرۋ ورتالىعىندا ءۇش ايلىق تەگىن ءتىل كۋرستارىنان وتەدى. اعىلشىن ءتىلىن مەڭگەرۋ دارەجەسىنە قاراي ساباقتى تولىقتاي اعىلشىنشا (مىسالى, C1, C2 دەڭگەيىندە مەڭگەرسە) نەمەسە اعىلشىن تىلىندە وقىتۋدىڭ ەلەمەنتتەرىن (مىسالى, ۆ1, ۆ2 دەڭگەيىندە مەڭگەرسە) ەنگىزە وتىرىپ بەرۋگە دە بولادى. ساباقتى اعىلشىنشا وقىتۋداعى ەڭ باستى ماقسات – شاكىرتتەردى, اسىرەسە جوعارى سىنىپ وقۋشىلارىن اعىلشىن تىلىندە عىلىمي زەرتتەۋمەن اينالىسۋعا ۇيرەتۋ, بۇل ولارعا كۇنى ەرتەڭ شەتەلدىڭ وزىق ۋنيۆەرسيتەتتەرىنە تۇسەردە اسا قاجەت, – دەيدى ول.
ايتا كەتۋ كەرەك, مۇنداي وزگەرىس اتا-انا مەن وقۋشىلاردىڭ قالاۋى بويىنشا جۇزەگە اسىرىلۋدا. ياعني ەگەر شاكىرت ساباقتى اعىلشىنشا وقۋدى قالاماسا, بۇدان باس تارتۋىنا رۇقسات.
– قازىرگى تاڭداعى پروبلەمالاردىڭ ءبىرى وقۋلىققا تىرەلىپ تۇر. ادەتتە مەكتەپتەر InterPress نەمەسە Macmillan حالىقارالىق ءتىل ورتالىقتارى ازىرلەگەن اعىلشىنشا وقۋلىقتارمەن وقيدى. ولارعا ءار وقۋ جىلىنىڭ باسىندا مەكتەپ كىتاپحاناشىلارى تاپسىرىس بەرۋى ءتيىس. كىتاپحاناشىلار جەتكىلىكتى تۇردە تاپسىرىس بەرمەگەندىكتەن, وقۋلىقتار ازىرشە قات بولىپ تۇر, – دەيدى ر. ايعاراەۆا.
ايتا كەتەيىك, 2020-2021 وقۋ جىلىندا ەلوردانىڭ بارلىق مەكتەپتەرى جاراتىلىستانۋ-ماتەماتيكا باعىتىنداعى فيزيكا, حيميا, بيولوگيا جانە ينفورماتيكا پاندەرىن اعىلشىن تىلىندە وقىتۋعا اۋىسادى.
