كەشە استانا قالاسى اكىمدىگى مەن قالالىق پروكۋراتۋرانىڭ بىرلەسىپ ۇيىمداستىرۋىمەن «ەلورداداعى قاۋىپسىزدىك پەن جايلىلىق» جوباسى شەڭبەرىندە اياقتالماعان قۇرىلىس نىساندارىنىڭ جارمەڭكەسى ءوتتى.
وسىمەن ءۇشىنشى رەت وتكىزىلىپ وتىرعان جارمەڭكەدە 70-تەن استام قۇرىلىس كومپانيالارى وكىلدەرىنىڭ نازارىنا «ارابي-2», «ءۇمىت بەرەكە», «كوكتال-2», «انيسا-2» تۇرعىن ءۇي كەشەندەرى سياقتى قالاداعى قۇرىلىسى اياقسىز قالعان 21 نىسان ۇسىنىلدى.
– جارمەڭكەنى وتكىزۋدەگى ماقساتىمىز – پروبلەمالىق نىسانداردىڭ قۇرىلىسىن اياقتاۋدى قولعا الۋ ءۇشىن كاسىپكەرلەر مەن ينۆەستورلاردى تارتۋ. ينۆەستورلارعا جوبالاردىڭ رەنتابەلدىگىن كورسەتىپ, ۇلەسكەرلەرگە
وزدەرى قارجىسىن سالعان باسپانالارىنا قول جەتكىزۋگە كومەكتەسۋ, – دەيدى استانا قالالىق پروكۋراتۋراسىنىڭ ءبولىم پروكۋرورى تەمىرلان ءادىلحانوۆ. جارمەڭكەدەگى ۇسىنىلىپ وتىرعان 21 نىساننىڭ الدى – 2006 جىلى, سوڭى 2014-2015 جىلدارى سالىنا باستاعان. ۇلەسكەرلەردىڭ قارجىسىن جىمقىرىپ, قۇرىلىستى اياقسىز قالدىرعان كومپانيالار تەكسەرىلىپ, ۇستىنەن قىلمىستىق ءىس قوزعالعان. ولاردىڭ 29-ى تەمىر تورعا توعىتىلىپ, مۇلىكتەرى تاركىلەنگەن.
تەمىرلان ءادىلحانوۆتىڭ ايتۋىنشا, رەنتابەلدىلىك جەتكىلىكتى بولماسا, قۇرىلىس جۇرگىزۋشى كومپانيا قولدانىستاعى زاڭناماعا سايكەس, تقك مەن قۇزىرلى ورگانداردىڭ كەلىسىمىمەن جوبانى وزگەرتىپ, ءتيىمدى ەتىپ قايتا دايىنداۋعا قۇقىلى ەكەن. وتكەن جولعى جارمەڭكەلەردىڭ ناتيجەسىندە 500 ادامنىڭ ۇلەسى بار 6 نىساننىڭ قۇرىلىسىن اياقتاۋ جونىندە قۇرىلىس كومپانيالارى مەن ۇلەسكەرلەر اراسىندا كەلىسىمشارت
جاسالعانىن ايتادى قالالىق پروكۋراتۋرانىڭ ءبولىم پروكۋرورى.
اكىمدىكتەگى جيىندار مەن وتكەن جولعى جارمەڭكەلەردىڭ ناتيجەسىندە «Kaz Capital Invest» جشس «بايتاۋ» تۇرعىن ءۇي كەشەنىنىڭ قۇرىلىسىن ءارى قاراي جانداندىرۋدى قولعا العان.
– «بايتاۋ» تۇرعىن ءۇي كەشەنى جاقسى جەردە ورنالاسقان, ماڭگىلىك ەل داڭعىلىنىڭ بويىندا. الايدا نىساننىڭ تەحنيكالىق جاعىنان ءبىراز كەمشىلىكتەرى بار. 2 قاباتتان ءارى قاراي سالىنباعان. 200 پاتەرلى تۇرعىن ءۇيدىڭ قازىر قۇجاتتارى دايىندالىپ جاتىر, – دەيدى «Kaz Capital Invest» جشس-ءتىڭ جوبا جەتەكشىسى اسىلحان ەسەنوۆ.
جارمەڭكەگە جينالعان كاسىپكەرلەرگە ءار جوبا جەكە تانىستىرىلىپ, بوس الاڭدار, جەر تەلىمدەرى, جوبالاردىڭ نوبايلارى كورسەتىلىپ, تەحنيكالىق جاعدايلار جاسالعانى تۋرالى اقپاراتتار ۇسىنىلدى. بۇل تۇرعىدا قاي نىساننىڭ كىمگە بۇيىراتىنى الداعى ۋاقىتتىڭ ەنشىسىندە بەلگىلى بولماق.
نۇرداۋلەت كاكىشەۆ
