استانادا دەمالىس كۇندەرى الماتى, اتىراۋ جانە سولتۇستىك قازاقستان وبلىستارىنىڭ جارمەڭكەسى ءوتتى. استانا قالاسىنىڭ اكىمى اسەت يسەكەشەۆ پەن سولتۇستىك قازاقستان وبلىسىنىڭ اكىمى قۇمار اقساقالوۆ جارمەڭكەنى ارالاپ, ازىق-تۇلىكتەردىڭ باعاسىمەن تانىستى.
ازىق-تۇلىك باعاسىن تۇراقتاندىرۋ ماقساتىندا ۇيىمداستىرىلعان جارمەڭكەگە ايماقتاردان بارلىعى 2500 توننا ءونىم اكەلىندى. ناقتىراق ايتساق, اۋىلشارۋاشىلىق ونىمدەردىڭ اراسىندا ەت, ءسۇت, ماكارون ونىمدەرى جانە قانت, كارتوپ, كوكونىس سىندى تاعى دا باسا تاۋارلار جەتەرلىك. سونداي-اق, ءۇش وبلىس قالا كۇنى قارساڭىندا ەلوردا تۇرعىندارى مەن قوناقتارىنا تاعامداردىڭ 100 ءتۇرىن اكەلدى. سولتۇستىك قازاقستان وبلىسى, اقجار اۋدانى اۋىل شارۋاشىلىعى ءبولىمىنىڭ باسشىسى ءابدىجاپپار كەمانوۆتىڭ ايتۋىنشا, تۇتىنۋشىلار بازار باعاسىنان 15-20 پايىزعا ارزانعا ساتىپ الۋدا.
– ءبىزدىڭ اقجار اۋدانىنىڭ كاسىپكەرلەرى جارمەڭكەگە نەگىزىنەن ەت ونىمدەرىن اكەلدى. ناقتىراق ايتسام, 20 جىلقى, 10 سيىر, 50 قويدىڭ ەتىن استانا تۇرعىندارى مەن قوناقتارىنا ۇسىنىپ وتىرمىز. ماسەلەن, جىلقىنىڭ ەتى – 1500 تەڭگە, سيىر ەتى – 1300 تەڭگە, ال قوي ەتى 1100-1150 تەڭگەدەن ساتىلىپ جاتىر. سونداي-اق, ءبىزدىڭ اۋدان جەمىس-جيدەك پەن كوكونىس ونىمدەرىن الىپ كەلىپ, تۇتىنۋشىلارعا ارزان باعادا ۇسىنۋدا. جالپى ساتۋشى دا, الۋشى دا ءدان ريزا. سەبەبى جارمەڭكەدەگى ونىمدەر نارىق باعاسىنان 15-20 پايىزعا ارزان بولىپ وتىر, – دەيدى ول.
راسىندا جارمەڭكەگە كەلىپ, وزىنە كەرەك ازىق-تۇلىكتى الۋشى حالىقتىڭ سانىندا ەسەپ جوق. سولاردىڭ ءبىرى – ەلوردا تۇرعىنى جادىرا تالجانوۆا.
– ءار اپتا سايىن جارمەڭكەگە كەلىپ, ءارتۇرلى كەرەكتى ازىق-تۇلىكتى ساتىپ الۋعا تىرىسامىن. سەبەبى مۇنداعى ونىمدەر ساپالى ءارى ونى ءتيىمدى باعادا ساتىپ الۋعا مۇمكىندىك بار. ونىڭ ۇستىنە بۇل اپتاداعى جارمەڭكە بۇعان دەيىنگى جارمەڭكەلەرمەن سالىستىرعاندا ءتاۋىر بولىپ وتىر. شىنى كەرەك, بۇعان دەيىنگى جارمەڭكەلەر جۇتاڭ بولۋشى ەدى. ال بۇل اپتادا ءۇش وبلىس بىردەن كەلىپ وتىرعاننان كەيىن بولسا كەرەك, جارمەڭكەدە ۇسىنىلعان تاۋارلاردىڭ ءتۇرى باسىم ەكەن. الداعى ۋاقىتتا دا وسىنداي دەڭگەيدە وتسە نۇر ۇستىنە نۇر بولار ەدى, – دەيدى ول.
ايتا كەتەيىك, جارمەڭكەدە ءارتۇرلى فەستيۆالدەر, ەلىمىزدىڭ ايماقتارىنان شىعارماشىلىق ۇجىمدار ويىن-ساۋىق, كونتسەرتتىك باعدارلاما ۇسىنىپ جاتىر. مىسالى, جىل باسىنان بەرى استانا اكىمدىگى وسىنداي 20 جارمەڭكە ۇيىمداستىردى. تۇرعىندار وسىنداي جارمەڭكەلەردىڭ وزدەرىنە ۇلكەن جاردەم بەرىپ وتىرعانىن ايتادى. كەلەسى اپتادا اقمولا, قىزىلوردا, اتىراۋ, باتىس قازاقستان وبلىستارىنىڭ كاسىپكەرلەرى ءوز ونىمدەرىن اكەلەدى.
ميراجان ماقاجان
