«ەكسپو-2017» حالىقارالىق مامانداندىرىلعان كورمە اياسىندا قوستاناي وبلىسىنىڭ اۋىلشارۋاشىلىق جارمەڭكەسى ءوتتى. جارمەڭكەگە استانا قالاسىنىڭ اكىمى اسەت يسەكەشەۆ پەن قوستاناي وبلىسىنىڭ باسشىسى ارحيمەد مۇحامبەتوۆ قاتىستى.
قوستاناي وبلىسى اكىمىنىڭ ءبىرىنشى ورىنباسارى عاۋەز نۇرمۇحامبەتوۆتىڭ ايتۋىنشا, وبلىستىڭ 3 قالاسى مەن 11 اۋدانىنان 50-دەن استام كاسىپورىن اۋىلشارۋاشىلىق ونىمدەرىن اكەلگەن.
– جالپى, جارمەڭكەدە 650 توننا اۋىلشارۋاشىلىق ونىمدەرى ساتىلدى. 100-گە جۋىق اتاۋلى
تاۋار ساتىلىمعا قويىلدى. 33 توننا ەت, 90 توننا ءسۇت ونىمدەرى, 52 توننا شۇجىق پەن ەت ونىمدەرى, 57 توننا نان مەن كونديتەرلىك ءونىم, 200 مىڭ دانا جۇمىرتقا, 93 توننا ۇن جانە باسقا دا ازىق-تۇلىك تۇرلەرى بار. باعاسى استانا بازارلارىمەن سالىستىرعاندا ءبىرشاما ارزان. شىنى كەرەك, استانادا قوستاناي ونىمىنە دەگەن سۇرانىس وتە جوعارى. ويتكەنى ءبىز تەك قانا تابيعي تازا تاۋار الىپ كەلدىك. سوندىقتان دا ءبىزدىڭ ونىمدەرىمىزدى اسىعا كۇتىپ جۇرگەن تۇتىنۋشىلار جەتەرلىك دەپ ويلايمىن, – دەدى عاۋەز تورسانۇلى.
استانالىقتار «قازاقستان» سپورت كەشەنىنىڭ جانىندا ورنالاسقان جارمەڭكەدەن وزدەرىنە قاجەتتى ءارتۇرلى ونىمدەردى ساتىپ الدى. ەرمەك قاسەنۇلىنىڭ ايتۋىنشا, جارمەڭكەدەگى باعا نارىق باعاسىنان قاراعاندا الدەقايدا ارزان.
– ەكى اپتادا ءبىر رەت وسىندا كەلىپ, اۋىلشارۋاشىلىق ونىمدەرىن ساتىپ الامىن. ويتكەنى مۇنداعى باعا كوڭىلىمنەن شىعادى. ماسەلەن, قالاداعى بازارلاردا جىلقى ەتى 1600-1700 تەڭگە بولسا, جارمەڭكەدە – 1500 تەڭگە. سونداي-اق, كارتوپتى – 100, جۋانى – 130, ءسابىزدى 120 تەڭگەدەن ساتىپ الدىم. ال بازاردا اتالعان ونىمدەردىڭ باعاسى 20-30 تەڭگە قىمبات. ءبىز سياقتى زەينەتكەر ءۇشىن جارمەڭكە كوپ كومەك بولىپ وتىر. سوڭعى كەزدەرى قىمباتشىلىق قىسىپ كەتتى عوي. وسىنداي قيىن-قىستاۋ زاماندا جارمەڭكەنىڭ ءوز جاردەمى ءتيىپ جاتىر, – دەيدى اقساقال.
