ەلوردالىق تىلدەردى دامىتۋ باسقارماسى «كورنەكى اقپارات – ناسيحات قۇرالى» تاقىرىبىندا ءىس-تاجىريبەلىك سەمينار ۇيىمداستىردى. وعان قالالىق مەملەكەتتىك ساۋلەت جانە قۇرىلىس باقىلاۋ, كاسىپكەرلىك جانە ونەركاسىپ باسقارمالارىنىڭ وكىلدەرى, ساۋدا ورتالىقتارى مەن جارناما اگەنتتىكتەرىنىڭ ديرەكتورلارى قاتىستى.
شارا بارىسىندا سىرتقى جانە ىشكى جارنامانى ساۋدا نىساندارىندا ورنالاستىرۋعا بايلانىستى ءسوز بولدى. جارناماعا تاپسىرىس بەرۋشىلەر مەن ورىنداۋشىلارعا قازاقستان رەسپۋبليكاسىنىڭ ءتىل تۋرالى زاڭنامالارىنداعى تالاپتارى ءتۇسىندىرىلدى. سونداي-اق, سىرتقى جارناما مەن كورنەكى اقپارات ماتىندەرىندە كەزدەسەتىن قاتەلەردىڭ الدىن الۋ ماسەلەلەرى تالقىلاندى.
جيىندا الدىمەن ءسوز العان بەلگىلى قوعام قايراتكەرى ورازگۇل اسانعازى مەملەكەتتىك ءتىلدىڭ مارتەبەسى جايىندا كەڭىرەك پاراساتتى وي ءوربىتتى.
– بۇگىن وتە ءبىر جاقسى سەمينار ءوتىپ جاتىر. بۇعان قالاداعى جارناما بەرۋشىلەر مەن ورىنداۋشىلار شاقىرىلىپتى. دۇرىس دەپ ەسەپتەيمىن. بايقاساق, اعىلشىن مەن ورىس تىلىندە جازىلعان جارنامادا قاتە بولمايدى. قاتە مەملەكەتتىك تىلدە كەزدەسەدى. بۇل – كوپتەن بەرى ايتىلىپ كەلە جاتقان ماسەلە. ءبىز – الەم تانىعان ەلمىز. ءبارى دە مويىندادى. ەندى ءبىز ءوزىمىزدى تاربيەلەۋىمىز قاجەت. بارلىق قازاقستان ازاماتى مەملەكەتتىك ءتىلدى قۇرمەتتەۋ كەرەك. قر تىلدەر تۋرالى زاڭىنىڭ 21-بابىندا جارناما الدىمەن مەملەكەتتىك تىلدە, سودان كەيىن ورىس تىلىندە جازىلادى دەپ تايعا تاڭبا باسقانداي كورسەتىلگەن. ال كوشەدە ىلىنگەن كوپ جارنامالار قازاق تىلىندە جازىلمايدى. مۇنى سۇرايتىن ۋاقىت جەتتى, – دەدى ءتىل جاناشىرى.
ودان كەيىن قر پرەزيدەنتىنىڭ جانىنداعى مەملەكەتتىك باسقارۋ اكادەمياسىنىڭ «مەملەكەتتىك باسقارۋ جانە مەملەكەتتىك قىزمەت» كافەدراسىنىڭ دوتسەنتى نۇرزادا ماحامبەتۇلى جەرگىلىكتى قۇقىقتىق اكتىلەر ساپاسى تۋرالى ءسوز قوزعاسا, عالىم بەكجان ءابدۋاليۇلى «كورنەكى اقپارات جانە قازىرگى ونوماستيكا ماسەلەلەرى» تاقىرىبىندا بايانداما جاسادى. فيلولوگيا عىلىمدارىنىڭ كانديداتى ومار جالەل «ءتىل جانە ۇلتتىق دۇنيەتانىم» باعىتىندا وي ساراپتادى. سەمينار ەمىن-ەركىن پىكىرلەسۋ جاعدايىندا ءوتتى. جينالعاندار وزدەرىن تولعاندىرعان ماسەلەلەردى ورتاعا سالدى. ءبىر قاتىسۋشى قالاداعى پاتەر يەلەرى كوپپەراتيۆتەرىنىڭ مەملەكەتتىك تىلگە نەمقۇرايلى قارايتىنىن ءسوز ەتتى. قىسقاسى, ماعىنالى شارادان انا تىلىمىزدە جازىلاتىن جارناما جابىرقاماسا ەكەن دەگەن وي ءتۇيىپ قايتتىق.
ازامات ەسەنجول
