قازان ايىنىڭ 12-ءنشى جۇلدىزىندا ەلىمىزدىڭ بارلىق كينوتەاترلارىندا «قايرات نۇرتاس PRODUCTION» ۇسىنعان «ارمان» اتتى فيلم قالىڭ كورەرمەنگە جول تارتتى. «قايرات باستى ءرولدى سومدايدى» دەگەن سوڭ كورەرمەننىڭ فيلمگە دەگەن قىزىعۋشىلىعى ويانادى. ونىمەن قويماي, «جۇبايىنىڭ بەت-بەينەسىن كورسەتەدى» دەگەندى ەستىگەن كەزدە كينوتەاتردا انشلاگ بولاتىنىنا سەنىمدى ەدىم. سەبەبى ەسترادادا جۇرگەن تانىمال جۇلدىزدى وتباسىمەن ۇلكەن ەكراننان كورۋ قاراپايىم حالىققا قاشاندا قىزىقتى. شوۋ-بيزنەستە جارقىراپ جۇرگەن جۇلدىزدى وتباسى كورەرمەنگە ەكىنشى رەت فيلم ۇسىنىپ وتىر. العاشقى ءفيلمى «وكىنىش» اتتى بيوگرافيالىق فيلم بولسا, «ارمان» – دراما جانرىندا تۇسىرىلگەن فيلم.
فيلم قوس عاشىقتىڭ توي الدىنداعى باقىتتى ساتتەرىنەن باستالادى. ءبىر ايدان سوڭ شاڭىراق قۇرۋ كەرەك بولعان ەكى جاس قىمبات ءدامحانادا بايدىڭ بالالارىمەن قاقتىعىسىپ قالادى. بۇل جانجالدىڭ ارتى قىزدى ۇرلاپ اكەتىپ, ارتىنشا زورلاۋمەن اياقتالادى. باي بالالارىنا قارسى تۇرا الماعان جاستار اقىر سوڭىندا جازىقتى بولىپ, بىرەۋى تەمىر توردىڭ ار جاعىنان شىقسا, بىرەۋى ادىلەت سوتىن ورناتۋدى كوزدەيدى.
فيلم پروكاتقا شىقپاي تۇرىپ كوپتەگەن افيشا, پوستەرلەر قالانى جاۋلاپ الدى. جارنامالاردىڭ كوپتەپ ءىلىنۋى, ءارتۇرلى جەرلەردە پوستەرلەردىڭ قاپتاپ تۇرۋى كوپتەگەن كورەرمەندەردى وزىنە تارتتى. قاي ارنانى قوسپا «ارمان» ءفيلمىنىڭ ترەيلەرىن كورەسىڭ, قاي كينوتەاترعا كىرمە ونىڭ پوستەرى ءىلىنىپ تۇرادى, قاي كوشەنىڭ جارناماسىنا مويىن بۇرىپ قاراما – تاعى دا وسى كينو. ءبىزدىڭ جاقسى دەگەن فيلمدەرگە جاسالمايتىن جارنامانى وسىنداي جەڭىل تۋىندىعا بارىنشا جاقسى جاساۋعا تىرىسقان. ال ءفيلمنىڭ ساپاسى بۇل جارنامانىڭ ەشقايسىسىنا دا تاتىمادى. فيلمدەگى كەمشىل تۇستارعا توقتالا كەتسەك:
1. ەڭ ءبىرىنشى مازالايتىن سۇراق: ءفيلمنىڭ اتى نەگە «ارمان»؟ باستى رولدەگى ارمان قىزدىڭ ەسىمىن بىلدىرە مە؟ الدە كەك الۋ باستى كەيىپكەر ءۇشىن ارمان با ەكەن؟ فيلم اتاۋى قىزدىڭ ەسىمى بولعاننىڭ وزىندە ءبىرتۇرلى ەرسى ەستىلەدى, سولاي ەمەس پە؟ ءفيلمنىڭ باسىندا ارماننىڭ اتاسىنىڭ (تىلەكتەس مەيراموۆ) ايتۋى بويىنشا جول اپاتىنان قازا تاپقان ارماننىڭ اتا-اناسى ۇلدى بولامىز دەپ جۇرگەندە قىز بالا تۋعان سوڭ اتىن ارمان دەپ قويعان ەكەن. ارماننىڭ جەتىم, تۋعان باۋىرلارى جوق ەكەندىگىنە اكتسەنت جاسالىنادى. ونىڭ سۇيىكتىسى, «قايرات» كلۋبىنىڭ ويىنشىسى قۇرمان دا جەتىم. بالالار ۇيىندە وسكەن. كوپتەگەن كوممەرتسيالىق فيلمدەردىڭ رەجيسسەرلەرى كورەرمەندەردىڭ اياۋشىلىق سەزىمىن تۋدىرۋ ءۇشىن وسىنداي ايلا-ءتاسىل قولدانادى.سوندىقتان فيلم بارىسىندا باستى كەيىپكەرلەرمەن بىرگە مۇڭايىپ, بىرگە قۋانىپ وتىراسىڭ (اسىرەسە, ايەلدەر قاۋىمى).
سونداي-اق, رەجيسسەر قوعامداعى ماسەلەلەردى كورسەتەدى دە, ونى شەشۋگە تىرىسپايدى. رەجيسسەر رەنجىتكەن ادامداردى ءوز قولىڭمەن ءولتىرۋ كەرەكتىگىن ناسيحاتتاعىسى كەلە مە, تۇسىنبەدىك. ءبىز زايىرلى, قۇقىقتىق مەملەكەت ەمەسپىز بە؟ قاتىگەزدىككە تولى تاقىرىپتاردىڭ سانىن كوبەيتىپ جۇرگەن رەجيسسەر راشيد سۇلەيمەنوۆ بۇل فيلمگە ەشقانداي دا جاڭاشىلدىق الىپ كەلمەدى. جاڭالىق ەمەس, ءتىپتى پلاگيات ءفيلمنىڭ قاتارىن تولىقتىردى دەپ تە ايتۋعا بولادى (ەسىڭىزگە 1999 جىلى شىققان رەسەيدىڭ «ۆوروشيلوۆ اتقىشى» ءفيلمىن ءتۇسىرىڭىزشى).
2. كوركەم فيلم بولعان سوڭ باستى رولدەردە وينايتىن اكتەرلەرگە ۇلكەن جۇك ارتىلاتىنى ءمالىم. اكتەر دەگەن رەجيسسەر مەن كورەرمەندى بايلانىستىراتىن التىن كوپىر ەمەس پە؟ ال بۇل جەردەگى كوپىرلەر نە سوڭىنا دەيىن تۇرعىزىلماي قالعان, نە بىتپەي جاتىپ قۇلاعان. ءيا, ءسوز باستى ءرولدى سومدايتىن (تيزەر بويىنشا ايتقاندا) قايرات نۇرتاس جايىندا. اكتەرلىك ويىنى «وكىنىش» فيلمىنە قاراعاندا الدەقايدا ىلگەرى باسقان. قايراتتى اكتەر رەتىندە قاراستىرىپ جاتقانىم وعاش كورىنەتىن دە شىعار, دەگەنمەن وسىمەن ەكىنشى ۇلكەن فورماتتى فيلمدە باس كەيىپكەر بولعان بۇل «اكتەردىڭ» ويىنىنا كوز جۇمىپ, ءۇنسىز قالۋ جاراماس. ارمان رولىندە – جۇلدىز ابدىكارىموۆا. ءيا-ءيا, نۇرتاستىڭ 10 جىل بويى جاسىرىپ كەلگەن زايىبى. «اكتەرلىك ماماندىق العان» دەگەن سىبىستى دا ەستىگەن شىعارسىز. ءسىزدى قايدام, ءوز باسىم سەنىڭكىرەمەيمىن. تىم اسىرا سىلتەيتىنى بىردەن كوزگە تۇسەدى. ءتۇسىرىلىم الاڭىندا ءوز كەيىپكەرىنىڭ بەينەسىنە كىرە الماعان. تەرگەۋشى كەلىپ, كۇدىگى ارمانعا ءتۇسىپ تۇرعانىن ايتقاندا, ارماننىڭ جاساعان ءىس-قيمىلىنا, بەت-الپەتىنە قاراساڭ, «اكتەر» دەگەن ماماندىقتان تىم الشاقتا تۇرعانداي كورىنەدى.
3. اۋرۋحانادا پالاتانىڭ الدىندا وتىرعان قۇرماننىڭ قولىنداعى كىسەن. كىم تاعىپ كەتتى؟ قالاي؟ قايدان پايدا بولدى؟ قولىنا كىسەن تاعىلعان ادام ەشكىمنىڭ قاراۋىنسىز قالاي جالعىز وتىرادى؟ كەيىن اۋرۋحاناعا ەممج-نىڭ (ومون) باسىپ كىرۋى, ارماننىڭ تۇنگى كلۋبتى اڭ اتاتىن مىلتىقپەن ەركىن كەزىپ ءجۇرۋى, تاعى سول سياقتى شىندىق اۋىلىنان شالعاي كورىنىستەر بىردەن كوزگە ۇرادى.
دەگەنمەن فيلم بارىسىندا جاقسى ەپيزودتار دا كەزدەسەدى. ارمان مەن ونىڭ تاتەسى اراسىنداعى كەي ديالوگتار كوڭىلگە وي سالادى. جانە ەڭ سوڭعى كادر. ەش كىناسىز ارمان ءوزىنىڭ حال-جاعدايىن وزىنەن باسقا ەشكىم تۇسىنبەيدى دەپ ويلايدى. حالىق تۇسىنەدى. بولعان جاعدايدى تىم جاقسى تۇسىنەدى. بىراق «جوياندارعا» قارسى شىعا المايدى. باي-قۋاتتى ادامداردىڭ قاسىندا دارمەنسىز…
كورەرمەندەردىڭ «قايرات نۇرتاس PRODUCTION» ۇسىنعان فيلمگە اعىلىپ كەلىپ جاتقانىنا, «قايرات شىندىقتى كورسەتتى, ايتىلماي جاتقان ماسەلەلەردى ايتتى» دەگەن پىكىرلەردى ەستىگەن كەزىڭدە قارنىڭ اشادى. كوزگە كورىنبەي جاتقان تىڭ تۋىندىلاردىڭ جارناماسى جاقسى بولعاندا, حالىق سولارعا بارىپ, ناعىز كينو قانداي بولاتىنىن كورگەندە, ورتانقول فيلمدەردىڭ بيلەتتەرى كاسسادا جاتار ما ەدى, كىم ءبىلسىن؟ تالعامى بيىك كورەرمەن كوبەيسىن دەگەن تىلەكتەمىن.
ەڭلىك ەگەۋباەۆا,
قازاق ۇلتتىق ونەر ۋنيۆەرسيتەتىنىڭ 1-كۋرس ستۋدەنتى
