جارقىن بايلانىستار جالعاسا بەرەدى
كەشە ەلباسى نۇرسۇلتان نازارباەۆ ەلىمىزگە رەسمي ساپارمەن كەلگەن يسپانيا كورولدىگى ۇكىمەتىنىڭ توراعاسى ماريانو راحويمەن كەزدەستى.
كەزدەسۋ بارىسىندا ەكى ەل اراسىنداعى ەكونوميكا, ينۆەستيتسيا, كولىك, ونەركاسىپ, ەنەرگەتيكا, مادەنيەت توڭىرەگىندەگى ىنتىماقتاستىق ماسەلەسى كەڭىنەن تالقىلانىپ, ستراتەگيالىق سەرىكتەستىكتى ودان ءارى دامىتۋ جايى ءسوز بولدى.
يسپانيا – قازاقستانمەن ستراتەگيالىق سەرىكتەستىك تۋرالى قۇجاتقا قول قويعان ەكىنشى ەۋروپالىق ەل. مەملەكەتىمىز تاۋەلسىزدىگىن العالى بەرى ەكى ەل اراسىنداعى جاراسىمدى بايلانىس ۇزىلگەن ەمەس.
– ءبىز يسپانيا كورولدىگىنىڭ قولداۋى مەن ىقىلاسىن ۇدايى سەزىنىپ كەلەمىز. قازاقستانعا ساپارمەن كەلگەن يسپانيانىڭ بۇرىنعى پرەمەر-مينيسترلەرىمەن ءاردايىم دوستىق قارىم-قاتىناستا بولدىق. ەكسپو-2017 بۇكىلالەمدىك كورمەسىن وتكىزۋگە ارنالعان كونكۋرستا دا يسپانيا بىزگە تىلەۋلەس بولدى, – دەدى مەملەكەت باسشىسى.
ەلىمىزدىڭ ەقىۇ-عا توراعالىعى تۋرالى ماڭىزدى شەشىم يسپانيا استاناسى – مادريدتە قابىلدانعانى بەلگىلى. ونىڭ رەسپۋبليكامىز ءۇشىن سيمۆولدىق ءمانى ەرەكشە ەكەندىگىن اتاپ وتكەن ەلباسى ەكى ەل اراسىنداعى ستراتەگيالىق سەرىكتەستىك تۋرالى كەلىسىم ءارى قاراي دامي بەرەتىنىنە سەنىم ءبىلدىردى.
– قازاقستاندا يسپانيانىڭ ءىرى كومپانيالارى جانە 70-تەن استام بىرلەسكەن كاسىپورىن جۇمىس ىستەيدى. ءبىز ۇكىمەتتىڭ قىزمەتى ارقاسىندا يسپانيانىڭ ەكونوميكالىق دامۋى قالپىنا كەلە باستاعانىن جانە ورنىقتى دەڭگەيگە شىققانىن كورىپ وتىرمىز, – دەدى مەملەكەت باسشىسى.
قازاقستان پرەزيدەنتىنىڭ جىلى لەبىزىنە العىسىن بىلدىرگەن ماريانو راحوي مىرزا ەكى ەل اراسىندا قالىپتاسقان جارقىن بايلانىس جالعاسا بەرەتىنىن ايتا كەلە, مۇنداعى تابىستى جۇمىس ىستەپ جاتقان بىرلەسكەن كومپانيالار ەكىجاقتى تۇسىنىستىكتىڭ ايقىن كورىنىسى ەكەندىگىن اتاپ ءوتتى.
– يسپانيا مەن قازاقستان اراسىندا بۇرىننان جاقسى قارىم-قاتىناس ورنىققان. ءسال كەيىنىرەك مەن سىزگە اسا مارتەبەلى يسپانيا كورولىنىڭ ءوز قولىمەن جازعان حاتىن تاپسىراتىن بولامىن. ءبىزدىڭ كومپانيالارىمىز مۇندا شىن مانىندە وتە تابىستى جۇمىس ىستەۋدە. بىرلەسكەن قىزمەتكە اتسالىسۋ نيەتىمەن يسپانيا كاسىپورىندارى وكىلدەرىنىڭ قالىڭ توبىن وزىممەن بىرگە ەرتە كەلدىم. ءبىزدىڭ ەلدە قازىرگى كۇنى وڭ ناتيجەلەر كورىنە باستادى. وسى توقساندا ەكونوميكا سالاسىندا ءسال ءوسىم بار. جۇمىسسىزدىق ماسەلەسى دە وڭتايلى شەشىلىپ كەلەدى. كەلەسى جىلى احۋال تىپتەن جاقسارادى دەگەن ۇمىتتەمىز. ءبىز اۋقىمدى رەفورمالار جۇرگىزۋدى جالعاستىرا بەرەمىز, – دەدى يسپانيا ۇكىمەتىنىڭ توراعاسى.
كەلىسسوزدەر بارىسىندا پرەزيدەنت نۇرسۇلتان نازارباەۆ يسپان تاراپىنا ەكىنشى دۇنيەجۇزىلىك سوعىس كەزەڭىندە قاراعاندى ەڭبەكپەن تۇزەۋ لاگەرىندە بولعان يسپاندىق ازاماتتارعا قاتىستى مەملەكەتتىك مۇراعاتتان الىنعان ماتەريالدار كوشىرمەسىن تاپسىردى.
قىمبات توقتامۇرات